އިންޑިއާގެ ޓީވީ ޗެނަލްއަކުން ބޭއްވި ބަހުސެއްގައި، ކިރިތި ރަސޫލާއަށް ފުރައްސާރަ ކުރުމާއި ގުޅިގެން އިންޑިއާގެ ވެރިކަން ކުރާ ހިންދޫ ވަތަނީ ޕާޓީ ބީޖޭޕީން އެޕާޓީގެ އިސް ތަރުޖަމާން ނުޕުރު ޝަރުމާ ސަސްޕެންޑް ކޮށްފިއެވެ. އަދި އޭނާގެ އިތުރުން އެޕާޓީންވަނީ ޕާޓީގެ މީޑިއާ އިންޗާރޖު ކަމަށްވާ ނަވީން ކުމާރު ޖިންޑާލްވެސް ޕާޓީން ސަސްޕެންޑް ކޮށްފައެވެ.
ޕީޖޭޕީގެ ތަރުޖަމާން ނުޕުރު ޝަރުމާ ރަސޫލާއަށް ފުރައްސާރަ ކުރުމާއި ގުޅިގެން ދުނިޔޭގެ ގައުމުތަކުން ދަނީ އޭނާގެ އަމަލު ކުށްވެރި ކުރަމުންނެވެ. އަދި އަރަބި އިސްލާމީ ގައުމުތަކުގައި ދަނީ އިންޑިއާގެ އުފެއްދުންތައް ބޮއިކޮޓް ކުރުމަށްވެސް ގޮވާލާ އަޑު އުފުލަމުންނެވެ.
ބީޖޭޕީގެ އިސް އޮފިޝަލަކު ރަސޫލާއަށް ފުރައްސާރަ ކުރުމާއި ގުޅިގެން، މި އަމަލަކީ އެޕާޓީއާއި އެއްވެސް ގުޅުމެއް އޮތް އަމަލެއް ނޫންކަން ހާމަކޮށްދެމުން، މިހަފްތާގެ އާދީއްތަ ދުވަހު ބީޖޭޕީންވަނީ ޚާއްސަ ނޫސް ބަޔާނެއްވެސް ނެރެފައެވެ. އަދި މި ބަޔާނުގައިވަނީ އެޕާޓީން ހުރިހާ ދީނަކަށްވެސް އިހުތިރާމް ކުރާކަމަށް ބުނެފައެވެ. އަދި އެއްވެސް ދީނެއްގެ ޝަޚުސިއްޔަތަކަށް ފުރައްސާރަ ކުރުން އެ ޕާޓީން ކުށްވެރިކުރާ ކަމަށްވެސް ބުނެފައި ވެއެވެ.
"އެއްވެސް ދީނަކާއި އަދި ނަސްލަކާއި ދެކޮޅު އެއްވެސް ފިކުރުކަށް (އައިޑިއޮލޮޖީ އަކަށް) ތާއީދެއް ނުކުރާނަން،" ޖޫން މަހުގެ 5 ވަނަ ދުވަހު، ބީޖޭޕީގެ ޖެނެރަލް ސެކެޓްރީ އަރުން ސިންގ ނެރުއްވާފައިވާ ބަޔާނުގައި އެޕާޓީން ބުނެފައި ވެއެވެ. "މި ޕާޓީން ހުރިހާ ދީނަކަށްވެސް، ދީނީ ޝަޚުސިއްޔަތުތަކަށްވެސް އިހުތިރާމް ކުރާނެ،" މި ބަޔާނުގައި އިތުރަށް ބުނެފައި ވެއެވެ.
އެހެންނަމެސް، ރަސޫލާއަށް ފުރައްސާރަ ކުރި އޮފިޝަލު ސަސްޕެންޑްކޮށް، އަދި މި އަމަލާއި ގުޅިގެން ޕީޖޭޕީން ނެރުނު ބަޔާނުގައި ރަސޫލާއަށް ފުރައްސާރަ ކުރިކުރުން ސީދާ ގޮތެއްގައި ކުށްވެރި ކޮށްފައެއް ނުވެއެވެ. އަދި މި ހާދިސާގެ ވާހަކަވެސް ސީދާކޮށް މި ބަޔާނުގައި ފާހަގަ ކޮށްފައި ނުވެއެވެ. އަދި މިބަޔާނުގައި، ރަސޫލާއަށް ފުރައްސާރަކުރި އޮފިޝަލްގެ ނަންވެސް ފާހަގަ ކޮށްފައި ނުވާއިރު، ބަޔާން ނެރެންޖެހުނު ސަބަބެއްވެސް މިބަޔާނުގައި ހާމަ ކޮށްފައެއް ނުވެއެވެ.
ބީޖޭޕީގެ އިސް އޮފިޝަލު، މާތް ނަބިއްޔާއަށް ފުރައްސާރަ ކުރުމާއި ގުޅިގެން ފާއިތިވެދިޔަ ހުކުރު ދުވަހު، އިންޑިއާގެ ކަމްޕޫރުގައާއި، އުއްތަރަ ޕްރަދޭޝްގައި ވަނި ހަމަނުޖެހުން ހިނގާފައެވެ. މި ހަމަނުޖެހުންތައް ހިނގާފައިވަނީ މުސްލިމް ޖަމިއްޔާއަކުން ފިހާރަތައް ބަންދުކޮށް، ބީޖޭޕީން ގައުމީ ތަރުޖަމާން ނުޕުރު ޝަރުމާގެ މި އަމަލާއި ދެކޮލަށް ހިނގާލުމަކަށް ގޮވާލުމާއި ގުޅިގެންނެވެ.
އިންޑިއާގެ ޓީވީ ޗެނަލެއްގައި ބީޖޭޕީން ގައުމީ ތަރުޖަމާން ނުޕުރު ޝަރުމާ ރަސޫލާއަށް ފުރައްސާރަ ކޮށްފައިވަނީ، އިންޑިއާގެ ވަރަނަސީ ގިޔަންވަޕީ މިސްކިތުގެ ތެރެއިން ޝިވްލިން (ލޯރޑް ޝިވާގެ ރަމްޒެއްކަމަށް ހިންދޫން ގަބޫލުކުރާ ބުދެއްކަމަށް ބުނާ އެއްޗެއް) ފެނުމާއި ގުޅޭގޮތުން ވާހަކަ ދައްކަމުންނެވެ. މުސްލިމުން ބުނުފައިވަނި މިއީ ފެންއަރުވާވަޑާމެއް ކަމުގައެވެ.
ނުޕުރު ޝަރުމާ އާއި ދެކޮޅަށް މިހާރުވަނީ، ދީނީ އެއްބައިވަންތަކަން ނަގާލުމަށް މަސައްކަތް ކުރިކަމަށް ބުނެ، އިންޑިއާގެ ހައިދަރުއާބާދު، ޕޫނޭ އަދި މުމްބާއިގެ ކޯޓުތަކަށް މައްސަލަވެސް ހުށަހަޅާފައެވެ.
އިންޑިއާގެ ވެރިކަންކުރާ ޕާޓީގެ އިސް ތަރުޖަމާން ނުޕުރު ޝަރުމާ ރަސޫލާއަށް ފުރައްސާރަ ކުރުމާއި ގުޅިގެން ދުނިޔޭގެ އިސްލާމީ ގައުމުތަކުންވެސް ދަނީ އޭނާގެ އަމަލު ކުށްވެރި ކުރަމުންނެވެ. މިގޮތުން ސައުދީ ފޮރިން މިނިސްޓްރީން ވަނީ މިއަމަލު ކުށްވެރިކޮށް ޚާއްސަ ބަޔާނެއް ނެރެފައެވެ. އަދި ޕާކިސްތާނުގެ ބޮޑުވަޒީރު ޝެހެބާޒް ޝަރީފްވެސް ވަނީ މިއަމަދު ކުށްވެރި ކުރައްވާފައެވެ.
