ކޯވިޑްގެ ބަލިމަޑުކަން އިންޑިއާގައި ފެތުރޭ މިންވަރު އަނެއްކާވެސް އިތުރުވަމުންދާކަން ރެކޯޑް ކުރެވިފައިވާ މި ދަނޑިވަޅުގައި ބޮލީވުޑްގެ ގިނަ ތަރިންތަކެއް އަނެއްކާވެސް ކޯވިޑަށް ޕޮޒިޓިވް ވެއްޖެއެވެ.
މީގެ ދުވަސްކޮޅެއް ކުރިން ކާތިކް އާރިޔާން 2 ވަނަ ފަހަރަށް ޕޮޒިޓިވް ވީކަން ހާމަކޮށްފައި ވާއިރު، އަދިއްތިޔާ ރޯއީ ކަޕޫރުވެސް ވަނީ ކޯވިޑަށް ޕޮޒިޓިވްވެފައެވެ.
މި ލިސްޓަށް މިއަދު އިތުރުވެފައިވަނީ ބޮލީވުޑްގެ ރަސްގެފާނު ޝާހްރުކް ޚާނެވެ. މީގެއިތުރުން ކެޓްރީނާ ކައިފް ވެސް ދެވަނަ ފަހަރަށް ކޯވިޑަށް ޕޮޒިޓިވް ވެފައި ވާކަމަށް ރިޕޯޓްތައް ވަނީ ބުނެފައެވެ. މީގެ ސަބަބުން މިއަހަރުގެ އައިފާ އެވޯޑްގައިވެސް ކެޓްރީނާއަށް ބައިވެރިވެވިފައި ނުވެއެވެ. އެ ހަފްލާގައި އޭނާގެ ފިރިމީހާ ވިކީ ކޯޝަލްއަށް ވަނީ އެންމެ މޮޅު ފިރިހެން އެކްޓަރގެ އެވޯޑްވެސް ލިބިފައެވެ.
ކެޓްރީނާ އާއި ވިކީ ވަނީ މޭ 25 ވަނަ ދުވަހު ބޭއްވި ކަރަން ޖޯހަރުގެ ޕާޓީގައިވެސް ބައިވެރިވެފައެވެ. ފިލްމު އިންޑަސްޓްރީގެ ގިނަ ބަޔަކު ބައިވެރިވި މި ހަފްލާއަށް ދިޔަ ގިނަބަޔަކު ކޯވިޑަށް ޕޮޒިޓިވް ވެފައި ވާކަމުގެ ޚަބަރުތައްވެސް އަންނަނީ ލިބެމުންނެވެ.
#ShahRukhKhan has tested covid positive.We wish the actor a speedy recovery. pic.twitter.com/VzzrbxBttT
— Filmfare (@filmfare) June 5, 2022
ކަރަންގެ ޕާޓީގައި ޝަހްރުކްގެ އަންހެނުން ގޯރީ ޚާންވެސް ބައިވެރިވެފައިވެއެވެ.
މުމްބާއީގައި ކޯވިޑް ފެތުރޭ މިންވަރު އިތުރުވަމުން ދިއުމާއި ގުޅިގެން މުމްބާއީގެ މުނިސިޕަލް ކޯޕަރޭޝަނުން ވަނީ ސަމާލުވުމަށް އިލްތިމާސްކޮށް ހޮސްޕިޓާތައް ތައްޔާރީ ހާލަތަށް ގެނެސްފައެވެ.
