އިދިކޮޅު ކޯލިޝަނުން ރޭ ކުރިއަށް ގެންދިޔަ "އިންޑިއާ އައުޓް" ހަރަކާތުގައި 5 މީހަކު ފުލުހުންގެ ބެލުމުގެ ދަށަށް ގެންގޮސްފައިވާކަމަށް އިދިކޮޅު ކޯލިޝަނުން ބުނެފިއެވެ.
ރޭގެ މުޒާހަރާގެ އެންމެ ކުރީ ސަފުގައި ތިބީ އަތް ދިގު ހުދު ގަމީހުގައި ތިބި ފަރާތްތަކެވެ. ކޮންމެ މީހެއްގެ މޫނުގައި މާސްކެއް އޮތް އިރު ކޮންމެ މާސްކަކީ ވެރިކަން ކުރާ ކޯލިޝަނުގެ ކޮންމެވެސް އެއް ލީޑަރުގެ މޫނެވެ. މުޒާހަރާގެ ބައިވެރިން މާލޭގެ ބޮޑު ތަކުރުފާނު މަގުން ކުރިއަށް ދިއުމަށް ހުރަސް އަޅައި ބާރުގެ ބޭނުންކޮށް ވަނީ މުޒާހަރާ ރޫޅާލާފައެވެ.
ޕީޕީއެމްގެ ތަރުޖަމާން ހީނާ ވަލީދު ވިދާޅުވީ މުޒާހަރާގެ ތެރެއިން މީހުން ހައްޔަރު ކުރުމުގައި ފުލުހުން ހާލަތާއި ނުބައްދަލު ބާރުގެ ބޭނުން ކުރުމުގެ ސަބަބުން މުޒާހަރާގެ ބައިވެރިންނަށް އެކިވަރުގެ އަނިޔާ ލިބިފައުވާކަމަށެވެ. އިދިކޮޅު ކޯލިޝަނުން މާލެ ސަރަހައްދުގައި މިފަހުން ބާއްވާ ކޮންމެ އެއްވުމެއްގައި ފުލުހުންގެ ބެލުމުގެ ދަށަށް މީހުން ގެންގޮސް ބާރުގެ ބޭނުންކޮށްގެން މުޒާހަރާތައް ރޫޅާލައެވެ.
ރާއްޖޭގައި އިންޑިއާ ސިފައިން ޤާއިމްވެ ތިބުމާއި ދެކޮޅަށް ހިންގާ ހަރަކާތުގެ ތެރެއިން މާލޭގެ ބައެއް ސަރަހައްދުތަކާއި އަތޮޅުތަކުގެ ބައެއް ރަށްރަށުގައިވެސް އިންޑިއާ އައުޓް އަންނަނީ ލިޔަމުންނެވެ. ނަމަވެސް އެ ހަރަކާތަކީ އިންޑިއާ މެދު ނަފްރަތު އުފެއްދުމުގެ މަޤްޞަދުގައި ހިންގާ އަދި ޤައުމީ ސަލާމަތަށް ނުރައްކާހުރި ހަރަކާތެއްކަމަށް ބުނެ ސަރުކާރުން ވަނީ އެހަރަކާތް ހުއްޓުވުމަށް އެކި ގޮތްގޮތުން މަސައްކަތް ފަށާފައެވެ. މިގޮތުން ރައީސް ޞާލިޙްގެ ރިޔާސީ ޤަރާރަކުން ވަނީއެ ހަރަކާތް ހުއްޓުވުމަށް ކަމާގުޅުންހުރި އިދާރާތަކަށް އަމަުރުކުރައްވާފައެވެ.
ނަމަވެސް އެ ޤަރާރަށް ގޮންޖަހާ އެ ހަރަކާތް އަންނަނީ ހިންގަމުންނެވެ. މިގޮތުން ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ ގެކޮޅު މާފަންނު ވިލާ، އަދި ރާއްޖޭގައި ހުންނަ އިންޑިއާ ހައިކޮމިޝަނުގެ ފާރުގައިވެސް ދާދިފަހުން ވަނީ އިންޑިއާ އައުޓް ލިޔެފައެވެ.
އިންޑިއާ އައުޓް ހަރަކާތުގައި އެންމެ އިސްކޮށް އުޅުއްވަނީ އިދިކޮޅު ލީޑަރު އަދި ކުރީގެ ރައީސް ޔާމީނެވެ.
