އަވަށްޓެރި އިންޑިއާ އާއި ދިވެހިރާއްޖޭގެ ގުޅުމަކީ ޒަމާންވީ ދިގު ތާރީހެއް އޮތް އަހުވަންތަ ގުޅުމެކެވެ. ދިވެހިން ކުރިމަތިލާ ކޮންމެ ވޭނާ ތަކުލީފެއްގައި، ކުކުރާލާއިރު އެންމެ ގާތުގައި އޮވެ، އެއަޑު އަހައި ހަމްދަރުދީގެ އަތެއް ދިއްކޮށްލަނީ އަވަށްޓެރި އިންޑިއާ އިންނެވެ.

ފަހުގެ، ހަނދާން ހުންނަ ވަރުގެ ތާރީހުތަކަށް ބަލާލި ނަމަވެސް ފެންނަން އޮތީ އެކަމެވެ. ނޮވެމްބަރު 3ގެ ޓެރެރިސްޓް ހަމަލާއާއި، ސުނާމީ ކާރިސާއާއި، ރާއްޖޭގެ ބޮޑު އާބާދީއެއް ފެނަށް ޖެހުނު ހާދިސާ ފަދަ އެތައް ފަހަރެއްގައި އެންމެ އަވަހަށް އެހީގެ އަތް ދިއްކޮށްލާ ދިވެހީންގެ ބޮލުގައި ފިރުމާލީ އަވަށްޓެރި އިންޑިއާއިންނެވެ.

ކަން މިހެން އޮތްކަމުގައި ވީނަމަވެސް މިކަންކަމަކީ، މިފަދަ 21 ވަނަ ގަރުނުގައި، މިނިވަން އިސްތިގުލާލީ ދައުލަތެއްގެ މައްޗަށް އަނެއް ދައުލަތަކުން އަތްގަދަކޮށް، މާސިންގާ ބޮޑު ގައުމަކުން އައިސް، ހުރިހާ ގޮތަކުންވެސް އެގައުމަށްވުރެ ނިކަމެތި ގައުމެއް ފިތާލައި ނޭވާ ހާސްކޮށްލަންވީ ސަބަބެއް ނުވަތަ ހުއްޖަތެއްވެސް ނޫނެވެ. މިފަދަ ޒަމާނެއްގައި އެގޮތަށް އަތްދަށުލާން ބޭނުންވިޔަސް އެކަން އެގޮތަށް ނުކުރެވޭނެ ކަމަށްވެސް ގިނަ ބަޔަކު ދެކެއެވެ. ނަމަވެސް މިއީ ނުހިގައިދާނެ ކަމެއް ކަމަށް ބެލެވޭނެ ޖާގައެއްވެސް ނެތެވެ.

މިހާ ހިސާބުން އުފެދޭ ސުވާލު ވަރަށް ތިލަކޮށް، ސާފުކޮށް، ސީދާކޮށް އަހާލެވިދާނެއެވެ. އިންޑިއާއިން ރާއްޖެއަށް އަތްގަދަކުރަން ބޭނުންވޭ ހެއްޔެވެ؟ ރާއްޖޭގެ މިނިވަންކަމާއި އިސްތިޤްލާލު ނަގާލައި އަޅުވެތިކުރަން ބޭނުންވޭ ހެއްޔެވެ؟ އިންޑިއާގެ އެކި ދާއިރާތަކުގެ މީހުން ރާއްޖޭގައި ތިބީ ކޮންބަޔަކު، ބޭނުންވެގެން، ކޮންބަޔަކަށް، ކޮންކޮން ޚިދުމަތްތަކެއް ކޮށްދޭން ހެއްޔެވެ؟

އިންޑިއާއިން ރާއްޖެފަދަ ގައުމަކަށް އަތްގަދަކޮށްގެން މިފަދަ ޒަމާނެއްގައި އެގައުމަށް ލިބޭނެ މާބޮޑު ފައިދާއެއް ބަލާބެލުމަށް ފެންނާކަށް ނެތެވެ. ރާއްޖޭގެ މިނިވަންކަމާއި އިސްތިޤްލާލު ނަގާލަން އަވަށްޓެރި އިންޑިއާއިން ބޭނުންވާނެ މާބޮޑު ސަބަބެއްވެސް ފެންނާކަށްނެތެވެ. ރާއްޖެއަކީ ޔަގީނުންވެސް ހުރިހާގޮތަކުންވެސް އިންޑިއާއަށްވުރެ ކުޑަ ގައުމެކެވެ. އަތްގަދަކޮށް އަޅުވެތިކޮށްގެން އެގައުމަށް މާބޮޑު ފައިދާއެއް ނެރެވެންވެސް އޮތް ގައުމެއް ނޫނެވެ.

ދެން އޮތީ އެގައުމުގެ މީހުން ރާއްޖޭގައި ތިބެގެން ކުރާ ކަންކަމުގެ ވާހަކައެވެ. ތައުލީމީ ދާއިރާގެ ޚިދުމަތްތެރިން ޖީލުތައް ބިނާކޮށްދެނީއެވެ. ސިއްހީ ދާއިރާގެ ޚިދުމަތްތެރިން ބަލިމަޑުކަމުން ދިވެހި ރައްޔިތުން ސަލާމަތްވުމަށް އެހީތެރި ވަނީއެވެ. ދެން އޮތީ ގިނަ ދިވެހިން ކަންބޮޑުވާ ސަލާމަތީ ޚިދުމަތްތެރިންގެ ވާހަކައެވެ. އެމީހުން ރާއްޖޭގައި ތިބީ ދިވެހި ދައުލަތުން އެދުނު އެދުމެއްގެ މައްޗަށް އެ މަސައްކަތް ކުރާށެވެ. ހެލިކޮޕްޓަރެއްގެ އެހީތެރިކަމަށް އެގައުމުގެ ކިބައިން އެދުނީ ދިވެހި ދައުލަތުންނެވެ. ރާއްޖޭގެ ކަނޑުގެ ސަރަހައްދުގެ ރައްކާތެރިކަން ބެލެހެއްޓުމަށް ރާޑަރު ހަރުކޮށްދިނުމަށް އިންޑިއާގެ ކިބައިން އެދުނީ ދިވެހި ދައުލަތުންނެވެ. ކޯސްޓް ގާޑުގެ އުޅަނދުތައް މަރާމާތުކޮށް އެތަކެތި ބެހެއްޓުމަށް ޑޮކްޔާޑް ތަރައްގީކުރުމަށް އެދުނީ ވެސް ހަމަ ދިވެހި ދައުލަތުންނެވެ.

އިންޑިއާގެ ފޮރިން ސެކެޓްރީ ވިނޭ ކްވަތުރާ ވިދާޅުވީ ދިވެހިރާއްޖޭގައި އިންޑިއާގެ ބަޔަކު ތިބިނަމަ ތިބޭނީ ދިވެހި ދައުލަތުން އެދުނު ކަމެއް އެދުނު މިންވަރަށް ފުއްދައިދިނުމަށް ބޭނުންވާ އަދަދަށް ކަމަށެވެ. އެއީ ކޮންމެ ދާއިރާއަކުން ކޮންމެ ބާވަތެއްގެ ޙިދުމަތެއް ދިނުމަށް ކަމަށްވިޔަސް ކަން ފޮރިން ސެކެޓްރީ ފާހަގަކުރެއްވިއެވެ. އެހެންކަމުން ރާއްޖޭގައި ތިބި އިންޑިއާގެ ސިފައިންވެސް ތިބީ ދިވެހި ދައުލަތުން ބޭނުންވާ މިންވަރަށް، ބޭނުންވާ ޚިދުމަތްތައް ފޯރުކޮށްދިނުމަށް ކަން ދިވެހި ނޫސްވެރިންނާއެކު ބޭއްވި ބައްދަލުކުރެއްވުމުގައި އިންޑިއާގެ ފޮރިން ސެކެޓްރީ ވަނީ ވިދާޅުވެފައެވެ.

ކަން މިހެން އޮތްއިރު އަވަށްޓެރި މިދެގައުމުގެ ދެމެދުގައި ގުޅުން ގޯސްވާނޭހެން ހިންގޭ ހަރަކާތެއްގެ އެންމެ ބޮޑު ގެއްލުމެއް ވާނީ ކޮން ބަޔަކަށް ތޯއެވެ. ހަމަ ޔަގީނުންވެސް އެއޮއްފަދަ ބޮޑު އިންޑިއާއަށް އެކަމުން ވާނޭ ގެއްލުމެއް ނޯންނާނެއެވެ. ގެއްލުމަކާއި ދައްޗެއް ވީނަމަވެސް ވާނީ މި ކުޑަކުޑަ ދިވެހި ރާއްޖެއަށާއި ދިވެހި ރައްޔިތުންނަށެވެ.

ދެން އޮތީ މިކަމުގައި ދޭތެރެ މެދުގެ ހައްލެއް ހޯދުމެވެ. ހަމަޔަގީނުންވެސް އެފަދަ ހައްލެއްކަމުގައި ވާނީ ދިވެހި ދައުލަތުން އެހެން ގައުމުތަކުގެ މައްޗަށް ބަރޯސާވާ މިންވަރު ކުޑަކުރުމެވެ. ތަރައްގީވަމުން އަންނަ ގައުމުތަކުގެ ލިސްޓުން ޖާގަހޯދާފައިވާ ދިވެހިރާއްޖެ، ކޮންމެ ކަމެއްގައި ގައުމުތަކުގެ ކައިރީ ސަލާންޖެހުމުގެ އާދަ ދޫކޮށްލަން ޖެހެއެވެ. ދިވެހިރާއްޖެއަކީ އަބަދު އިންޑިއާ އާއި ޗައިނާ ފަދަ ބޮޑެތި ގައުމުތަކަށް ނާށިގަނޑު ދިއްކޮށް އަބަދު ސަލާން ޖަހަން ޖެހޭނެ ގައުމެއް ނޫނެވެ. މީގެ މާނައަކީ މުޅި ދުނިޔެއާއި ގުޅުން ކަނޑާލައި އެކަހެރިވެގަތުމެއްވެސް ނުމެނޫންމެއެވެ.