ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ދިން ޓެރެރިސްޓް ހަމަލާއާ ގުޅިގެން ދަޢުވާ އުފުލާފައިވާ މީހުންގެ ޝަރީޢަތުގެ އަޑުއެހުން މާދަމާ ބޭއްވުމަށް ތައާވަލުކޮށްފިއެވެ. މި ޝަރީޢަތް ބޭއްވުމަށް ތައާވަލުކޮށްފައިވަނީ މާދަމާ ހެނދުނު 10:00އަށެވެ.

މާދަމާ މި ޝަރީޢަތް ބޭއްވުމަށް ތައާވަލުކޮށްފައިމިވަނީ، މިދިޔަ މަހުގެ 30 ވަނަ ދުވަހު ބޭއްވުމަށް ތައާވަލުކުރުމަށްފަހު، މޫސުން ގޯސްވުމުގެ ސަބަބުން އެ ޝަރީޢަތް ކެންސަލްވުމަށްފަހުއެވެ. ރައީސް ނަޝީދު އަވަހާރަކޮށްލުމަށް ދިން ހަމަލާއާއި ގުޅިގެން ހައްޔަރުކޮށް މޯލްޑިވްސް ކަރެކްޝަނަލް ސާރވިސްގެ ބެލުމުގެ ދަށުގައި ތިބި މީހުން ޝަރީޢަތަށް ޙާޒިރުނުކުރެވުނީ މޫސުން ގޯސްވެ ކަނޑުގަދަވުމުގެ ސަބަބުންކަމަށް ކަރެކްޝަނަލް ސާރވިސްއިން ވަނީ ވިދާޅުވެފައެވެ.

މިދިޔަ އަހަރުގެ މެއި 6ވަނަ ދުވަހު ދިން ނުރައްކާތެރި ޓެރަރިސްޓް ހަމަލާއާއި ގުޅިގެން 10 މީހެއްގެ ޝަރީއަތް މިވަގުތު ކޯޓުގައި ކުރިއަށްދެއެވެ. އެ ދިހަމީހުންގެ ތެރެއިން އަޑުއެހުން ބޭއްވުމަށް ތައާވަލުކޮށްފައިވަނީ، ތަހްނީމް އަހުމަދާއި، މުޖާޒު އަހުމަދާއި، އިސްހާގުއާއި، ފަހުމީ އަލީއާއި، އަލީ ހައިޝަމްއާއި، ފަހުމީ އަލީއާއި، މުހައްމަދު ނާޒިމްގެ މައްޗަށް ޝަރީޢަތް ހިންގުމަށެވެ.

ރައީސް ނަޝީދަށް ދިން ހަމަލާއާއި ގުޅިގެން މިހާތަނަށް ކުށް ސާބިތުވެފައިވަނީ އަހްމަދު އަދުހަމް މައްޗަށެވެ. އޭނާއަކީ ރައީސް ނަޝީދަށް ދިން ހަމަލާގައި ބޮން ގޮއްވާލި މީހާއެވެ. އޭނާގެ މައްޗަށް ކޯޓުން ވަނީ 23 އަހަރުގެ ޖަލު ހުކުމެއް އިއްވާފައެވެ.

ރައީސް ނަޝީދު އަވަހާރަކޮށްލަން ދިން ޓެރެރިސްޓް ހަމަލާގެ ޝަރީއަތްތައް އޮބްޒާވުކުރުމުގެ ފުރުސަތު މިހާރު ވަނީ އެމަނިކުފާނުގެ ވަކީލުންނަށް ދިނުމަށް ކްރިމިނަލް ކޯޓުން ނިންމާފައެވެ.

މެއި 6ގެ ހަމަލާގެ އެންމެ ބޮޑު ޝިކާރައަކަށްވީ ރައީސް ނަޝީދަށް ކަން ފާހަގަކުރައްވާ އެ މައްސަލާގައި ކުރިޔަށް ގެންދާ ޝަރީއަތް އޮބްޒާވުކުރުމަށް އެމަނިކުފާނުގެ ވަކީލުންނަށް ފުރުސަތު ދެއްވުމަށް ކޯޓްގައި އެދިވަޑައިގަތީ ރައީސް ނަޝީދުގެ ވަކީލު އަދި ކޮއްކޯފުޅު ނާޒިމް ސައްތާރެވެ. މާދަމާ ބާއްވާ ޝަރީއަތުން ފެށިގެން އޮބްޒާވުކުރުމުގެ ފުރުސަތު ކޯޓުން ދެއްވާފައިވާކަމަށް ރައީސް ނަޝިދުގެ ވަކީލުންނަށް ދިނުމަށް ކޯޓުން ނިންމާފައިވެއެވެ.