ރަގަޅު އާއިލާއެއް ބިނާކުރުމަށް އެދޭނަމަ ކައިވެނިކުރުމަށް ރަގަޅު ބައިވެރިޔަކު އިޚްތިޔާރު ކުރުމަށް މިއަދުގެ ހުކުރު ޚުތުބާގައި ގޮވާލައްވައިފިއެވެ.
"ހަރުދަނާ އާއިލާއެއް ބިނާކުރުން" މި މައުޟޫއުގެ މައްޗަށް މިއަދު ދެއްވި ޚުތުބާގައި ވިދާޅުވެފައިވަނީ، ދީންވެރި ޚުލްގު ހެޔޮ މީހަކު ދެނެގަތުމަށްޓަކާ އެމީހެއްގެ އާއިލާގެ މީހުންގެ އުޅުމަށް ބަލައިފިނަމަ އެކަން ގިނަފަހަރަށް އެނގޭނެ ކަމުގައެވެ. އަދި ތިމާ ނުދަންނަ އަދި އެމީހެއްގެ މައިންބަފައިންނާއި އާއިލާވެސް ނުދަންނަ މީހަކު، ޙަޔާތުގެ ބައިވެރިއަކަށް އިޚްތިޔާރު ކޮށް، ހިތި ތަޖުރިބަތާކާއި ކުރިމަތި ލާންޖެހެނީ މަދުފަހަރު ނޫންކަމަށްވެސް ޚުތުބާގައި ވިދާޅުވެފައި ވެއެވެ.
ޚުތުބާގައި ވިދާޅުވެފައިވަނީ، އަލަށް ޒަވާޖީ ހަޔާރެއް ފަށާ ކޮންމެ މީހަކުވެސް ކައިވެނި ކުރުމުގެ ކުރިން އެކަމާއި ބެހޭގޮތުން އާއިލާގެ ބޮޑެތި މީހުންނާއި، ކަމުގެ ތަޖުރިބާ ހުރި ފަރާތްތަކާއި މަޝްވަރާކޮށް އެފަރާތްތަކުގެ ލަފަޔާއި މަޝްވަރާ ހޯދުމަކީ ވަރަށް މުހިންމު ކަމެއް ކަމުގައެވެ. ސަބަބަކީ ކައިވެންޏަކީ މުޅި އުމުރަށް ވެވޭ ވަރުގަދަ ޝަރުޢި އަޤުދަކަށް ވާތީކަމުގައި ޚުތުބާގައި ބަޔާން ކޮށްފައި ވެއެވެ.
ކައިވެނި ކޮށްގެން އުޅޭ ދެމަފިރިންނަށް އެކަކު އަނެކެއްގެ ފަރާތުން ލިބެންވާ އުފަލާއި ހިންހަމަޖެހުން ފުރިހަމަޔަށް ނުލިބޭކަމުގެ ޝަކުވާއަކީވެސް މަދު ޝަކުވާއެއް ނޫންކަމުގައި ފާހަގަ ކުރައްވަމުން، ޚުތުބާގައި ވިދާޅުވެފައިވަނީ ބުރަ ދުވަހެއް މަސައްކަތުގައި ހޭދަކޮށް ފިރިމީހާ ނުވަތަ އަނބިމީހާ ގެއަށް އަންނައިރު ނިދާފައި އޮވެދާނެ ކަމަށާއި، ނުވަތަ ގެއިން ބޭރުގައިވެސް ވެދާނެ ކަމުގައެވެ. އަދި ހޭލައި އުޅޭނަމަ ފިލްމެއް ބަލައިލާން އިނދެދާނެ ކަމަށާއި، އަދި ވަޒީފާގެ ވާޖިބުތައް އަދާ ކުރުމަށް ގެއިން ބޭރުގައި އުޅުމަށްފަހު ގެއަށް އައިސް ގޭގައި އުޅޭވަގުތު ހޭދަކުރާތަން ފެންނަނީ ސޯޝަލް މީޑިއާގައާއި ނުވަތަ ފޯން ކޯލެއްގައި ނުވަތަ އެހެން ކޮންމެވެސް ކަމެއްގައި ކަމަށެވެ.
އޭގެ ނަތީޖާއެއްގެ ގޮތުން އާއިލާއަށާއި ދަރިންނަށް ދޭންވާ ސަމާލުކަން އޮންނަނީ ނުދެވިފައި ކަމަށާއި، މިފަދައިން ދެމަފިރިންގެ ކަންކަން ހުރެއްޖެނަމަ އާއިލައެއް ބާއްޖެވެރިވެގެން ނުދާނޭކަމުގައިވެސް ޚުދުބާގައި ބަޔާން ކޮށްފައި ވެއެވެ.
ޚުތުބާގައި އިތުރަށް ބަޔާން ކޮށްވަނީ، އާއިލާއަށް ހެޔޮކޮށް ހިތުމަށް ރަސޫލާ އިސްލާމީ އުންމަތަށް އިރުޝާދު ދެއްވާފައިވާ ކަމަށާއި، އިރުޝާދު ދެއްވާފައިވަނީ އާއިލާގެ މީހުންނާމެދު ރިވެތިކޮށް މުއާމަލާތް ކުރުމަށް ކަމަށެވެ. އަދި އޭގެ ސަބަބުން ދެމަފިރިންނަށްވެސް ހިތްހަމަ ޖެހުމާއި އުފާވެރިކަން ހާސިލްވެ، އަދި އާއިލީ ގުޅުންތައް ބަދަހި ވާނެ ކަމަށް ޚުތުބާގައި ވިދާޅުވެފައި ވެއެވެ.
