މާލެ ސަރަހައްދުގައި އަޅާ ބްރިޖުގައި، މާލެ އާއި ވިލިމާލެ ގުޅާލުމުގެ މަސައްކަތް ކުރަމުންދާ އިންޑިއާގެ އެފްކޮން ގުޅިފައިވަނީ އިންޑިއާ އަސްކަރީ ފައި ހިއްޕުންތަކާއި ކަމުގައި ރައްޔިތުންގެ މަޖިލީހުގެ މާވަށު ދާއިރާގެ މެމްބަރު ޕީއެންސީގެ ނައިބް ރައީސް މުހައްމަދު ސައީދު ވިދާޅުވެއްޖެއެވެ.
ސައީދު މިހެން ވިދާޅުވީ މާލެ ސަރަހައްދުގައި އަޅާ ބްރިޖުގައި، މާލެ އާއި ވިލިމާލެ ގުޅާލުން އަވަސްކޮށް އަންނަ އަހަރުގެ ޖުލައި މަހު ދަތުރުތައް ފެށޭވަރަށް ނިންމަން އިންޑިއާގެ އެފްކޮންސް އިން އިތުރަށް 26 މިލިއަން ޑޮލަރު (400 މިލިއަން ރުފިޔާ)އަށް އެދިފައިވާތީ އެކަމަށް ފާޑުވިދާޅުވެ ކުރެއްވި ޓުވީޓެއްގައެވެ.
ސައީދު ވިދާޅުވީ، އިންޑިއާގެ އެފްކޮން ގުޅިފައިވަނީ އިންޑިއާގެ އަސްކަރީ ފައިހިއްޕުން ތަކާއި ކަމަށެވެ. މިކުންފުންޏަކީ ބްރިޖް އެޅުމުގެ ތަޖުރިބާ ކުޑަ ކުންފުޏެއްކަމަށް ސައީދު ވިދާޅުވިއެވެ. މިހާރުވެސް ވިލިމާލެ ބްރިޖަށް 7.7 ބިލިއަން ދަރަނި ދިވެހިން ދައްކަން ޖެހޭއިރު، ބްރިޖްގެ މަަސައްކަތް އަވަސް ކުރުމުގެ ނިޔަތުގައި އިތުރު ފައިސާ ހޯދައި މަސައްކަތް ކުރަން އުޅެނީ ކުރިއަށް އޮތް ރިޔާސީ އިންތިޚާބުގެ ކެމްޕެއިނަށް ނުފޫޒު ފޯރުވުމަށް ކަމަށް ސައީދު ވިދާޅުވިއެވެ.
އެފްކޮން ގުޅިފައިވަނީ އިންޑިއާ އަސްކަރީ ފައި ހިއްޕުންތަކާއި. ބްރިޖް އެޅުމުގެ ތަޖުރިބާ ކުޑަ. މިހާރުވެސް ތިޔަ ބްރިޖަށް 7.7 ބިލިއަންގެ ދަރަނި ދިވެހިން ދައްކަން ޖެހޭ. އަވަސް ކުރުމުގެ ނަމުގައި 400 މިލިޔަން ރުފިޔާ ދޭން ޑިމާންޑް އެކުރަނީ 2023 ގެ ކެމްޕެއިނަށް ނުފޫޒު ފޯރުވަން.
– ސައީދު ވިދާޅުވިއެވެ.
ތިލަމާލެ ބްރިޖާ ގުޅޭގޮތުން އެފްކޮންސްއިން ހިއްސާކުރި މަޢުލޫމާތުގައި ވާގޮތުން މިހާރު ކުރިއަށްދަނީ ޖިއޯޓެކްނިކަލް ސަރވޭގެ މަސައްކަތެވެ. އެ ސާރވޭގެ %50އަށްވުރެ ބޮޑު ބައެއް މިހާރު ވަނީ ނިންމާލާފައެވެ. ކަނޑު ގަދަވުމުގެ ސަބަބުން ސާރވޭގެ މަސައްކަތް ކުރިއަށް ގެންދިއުމަށް ގޮންޖެހުންތަކެއް ހުރިނަމަވެސް މިއަހަރުގެ އޮކްޓޫބަރު މަހުގެ ތެރޭގައި އެ ސާރވޭގެ މަސައްކަތް ނިންމާލެވޭނެކަމަށް އެކުންފުނިން ބުންޏެވެ.
އެފްކޮންސް އިން ބުނީ، ބްރިޖް މަޝްރޫޢުގެ ދަށުން ކުރާ ސާރވޭއަށް ރިޔާއަތްކޮށް ޑިޒައިންގެ މަސައްކަތްވެސް ކުރަމުން އަންނަކަމަށާ، މައި ބުރިޖު އެޅުމަށްޓަކައި އަޅާ ވަގުތީ ބްރިޖުގެ މަސައްކަތްވެސް ވަރަށް އަވަހަށް ފެށޭނެކަމަށެވެ. މީގެ އިތުރުން ބްރިޖުގެ ކޮންކްރީޓް ޓެސްޓިންގެ މަސައްކަތްވެސް ވަރަށް ކާމިޔާބުކަން ފާހަގަކޮށް އެކުންފުނިން ވަނީ 2024ގައި ބްރިޖުގެ މަޝްރޫޢު މުޅިން ނިންމާލެވޭނެކަމަށް ބުނެފައެވެ. އަދި މާލެއާއި ވިލިމާލެ ގުޅުވާލާ ބްރިޖުގެ މަސައްކަތް އަންނަ އަހަރުގެ ޖުލައި މަހުގެ ނިޔަލަށް ނިންމައި ބޭނުންކުރަން ފެށޭނެކަމުގެ ޔަޤީންކަންވެސް އެކުންފުނިން ދިނެވެ. އަދި ގުޅިފަޅާއި ތިލަފުށި އަންނަ އަހަރު ޑިސެމްބަރުގައި ގުޅާލާ ނިމޭނެކަމަށްވެސް އެކުންފުނިން ބުންޏެވެ.
ތިލަމާލެ ބްރިޖަކީ 6.7 ކިލޯ މީޓަރުގެ ބްރިޖެކެވެ. މިއީ 500 މިލިއަން ޑޮލަރުގެ މަޝްރޫއެކެވެ. އެއީ 7 ބިލިއަނަށްވުރެ ގިނަ ރުފިޔާއެވެ. މި މަޝްރޫޢު ކުރިއަށް ގެންދަނީ އިންޑިއާ ސަރުކާރުން ދޭ 100 މިލިއަން ޑޮލަރުގެ ގްރާންޓާއި 400 މިލިއަން ޑޮލަރުގެ ލައިން އޮފް ކްރެޑިޓްގެ ދަށުންނެވެ. އަދި ދަޢުލަތުން ޚަރަދުކުރުމަށްވެސް ވަނީ ހަމަޖެހިފައެވެ.
