އެތައް ޒަމާނެއް ވަންދެން ތައުލީމީ ދާއިރާގެ މުވައްޒަފުންގެ ޝަކުވާއަކީ ކުރާ މަސައްކަތާއި އެއްވަރުގެ މުސާރައެއް ނުލިބޭ ކަމުގެ ޝަކުވާއެވެ. ގިނަވަގުތު މަސައްކަތުގައި އެޅެން ޖެހި، އެހެންނަމަވެސް ކުރާ މަސައްކަތާއި އެއްވަރުގެ އުޖޫރަ ނުލިބޭކަމުގެ އުދާސްތަކެވެ.

އޭގެ ނަތީޖާއެއްގެ ގޮތުން، ތައުލީމީ ދާއިރާފަދަ، ގައުމުގެ މުސްތަގުބަލާއި ގުޅުންހުރި، އަދި ހެދި ބޮޑުވަމުން އަންނަ ޅަ ދަރިން ތަރުބިއްޔަރު ކުރާ ތައުލީމީ ދާއިރާގެ މުވައްޒަފުންގެ މި އުދާސްތަކަށް ހައްލު ހޯދާ ދޭނޭކަމުގެ ވައުދުތައް އެކި ފަހަރު މަތިން އެކި އިންތިޚާބުތަކުގައާއި ރިޔާސީ ދައުރުތަކުގައި އެކި ވެރީން ވަނީ ވެވަޑައިގެންފައެވެ.

އެހެންނަމަވެސް އެތައް އިންތިޚާބެއް ފަސްދީ ގޮސް، އެތައް ރިޔާސީ ދައުރެއް މާޒީއާއި އެކުވެގެން ގޮސްފައިވި ނަމަވެސ،ް ތައުލީމީ ދާއިރާގައި މަސައްކަތް ކުރަމުންދާ 9،000 އާއި ގާތްކުރާ އަދެއްގެ މުވައްޒަފުންގެ މި އުދާސްތަކާއި ޝަކުވާރަކަށް އެކަށިގެންވާ ހައްލެއް ފާއިތުވެދިޔަ ތަނުގައި އެއްވެސް ސަރުކާރަކަށް ހޯދާ ދެވިފައެއް ނުވެއެވެ.

ރައީސް އިބުރާހިމް މުހައްމަދު ސާލިހުވެސް ވެރިކަމަށް ވަޑައިގަންނަވަން ވެވަޑައިގެންނެވި އެއްމެ މުހިންމު ވައުދުކަށް ވެގެން ދިޔައީ މުވައްޒަފުންގެ މި އުދާސްތަކަށް ތަސައްލީއެއް ހޯއްދަވާ ދެއްވުމުގެ ވައުދެވެ. ދައުލަތުގެ މުވައްޒަފުންގެ މުސާރަތަކުގައި ހުރި އުނިކަން ފިލުވާލަ ދެއްވާ، ގިންތިތަކުގައި ހުރި ތަފާތުތައް ނައްތާލާ، އިޖުތިމާއީ އިންސާފާއި ގުޅުންހުރި މި ބޮޑު މައްސަލައަށް އެކަށީގެންވާ ހައްލެއް ހޯއްދައްވާ ދެއްވުމުގެ ވައުދެވެ.

މިގޮތުން، މިއަހަރު، އާދައުރަކަށް ރައްޔިތުންގެ މަޖިލިސް ހުޅުއްވާ ދެއްވަމުން ރައީސް ސާލިހު ވައުދުވެ ވަޑައިގެންނެވީ މިއަރުގެ މަސައްކަތްތެރީންގެ ދުވަހު، ތައުލިމީ ދާއިރާގެ މުވައްޒަފުންގެ މުސާރަތަކަށް ހެޔޮ ބަދަލު ގެނެސް ދެއްވާނެކަމުގައެވެ. އަދި އެ ބަދަލުތަކަށް ފަހު، ސިއްޙީ ދާއިރާގެ މުވައްޒަފުންގެ މުސާރައަށްވެސް މިބަދަކު ގެނެސްދެއްވާނޭ ކަމުގައި ރައީސް ސާލިހުވަނީ ވައުދުވެ ވަޑައިގެންފައެވެ.

މުސާރަތަކަށް ބޮޑު ހެޔޮ ބަދަލެއް!

ތައުލީމީ ދާއިރާގެ މަސައްކަތްތެރީންގެ މުސާރައަށް ހެޔޮ ބަދަލުތަކެއް ގެނެސްދެއްވާނޭ ކަމުގައި ރައީސް ސާލިހު ވެވަޑައިގެންނެވި ވައުދު އެމަނިކްފާނު ފުއްދަވާ ދެއްވީ ވަރަށްވެސް ފުރިހަމައަށެވެ. ޓީޗަރުންގެ މުސާރަތައް ބޮޑު ވެގެން ދިޔައީ، ބައެއް ޓީޗަރުން އުއްމީދު ކުރި ވަރަށްވުރެވެސް ބޮޑުތަނުންނެވެ.

މިގޮތުން، ޓީޗަރުންގެ މުސާރައަށް މިގެނައި ބޮޑު ބަދަލާއެކު، ސިވިލް ސާވިސްގެ މުވައްޒިފުންގެ ތެރެއިން 8،000 އެއްހާ މުވައްޒިފުންގެ މުސާރައަށް މިހާރު މިވަނީ، އެމީހުންނަށް މީގެ ކުރިން ލިބެމުންދިޔަ މުސާރައިގެ އެންމެ ކުޑަވެގެންވެސް %50ގެ ކުރިއެރުމެއް އައިސްފައެވެ. އަދި ބައެއް މުވައްޒިފުންގެ މުސާރައަށް %80އިން ކުރިއެރުން ލިބިގެން ގޮސްފައިވާއިރު، ތައުލީމީ ދާއިރާގައި މަސައްކަތް ކުރާ އިދާރީ މުވައްޒިފުންގެ މުސާރައަށްވެސް %35ގެ ކުރިއެރުމެއް އަންނާނޭކަމުގައި އެޑިއުކޭޝަން މިނިސްޓްރީން ވަނީ ހާމަކޮށްފައެވެ.

ޓީޗަރުންގެ މުސާރައަށް ސަރުކާރުން ގެންސްފައިވާ މި ބަދަލާއެކީ ޓީޗަރުންގެ މުސާރަތައް އެވްރެޖް ގޮތެއްގައި 56 ޕަސެންޓު ބޮޑުވެގެން ދިޔައިރު، މި ބަދަލާއެކު ރޭންކް 1 ގެ ޕްރިންސިޕަލުންނަށް 82 އިންސައްތަ އަދި ރޭންކް 2ގެ ޕްރިންސިޕަލުންނަށް 59 އިންސައްތައިގެ މުސާރައިގެ ކުރިއެރުމެއް އައިސްފައި ވެއެވެ. އެހެންކަމުން، ތައުލީމީ ދާއިރާގެ މުވައްޒަފުންނަށް، ވަކީން ޚާއްސަކޮށް، އަމިއްލަ ރަށުގައި މަސައްކަތް ކޮށްގެން މިހާރު ގެއަށް ގެންދާން ލިބޭ މުސާރައަކީ، ކުރެވޭ މަސައްކަތާއި އެއްވަރުގެ، އަދި އަބުރުވެރި ދިރިއުޅުމަކަށް ފުދޭވަރުގެ ރަގަޅު މުސާރައެއްގެ ގޮތުގައި ގިނަ މުދައްރިސުން ދެކެއެވެ.

އަދި މަސް ނިމި، މުސާރަ ލިބިގެން ދިޔައިރު، އަލަށް ބޮޑުވި މުސާރަ ލިބި، ޓީޗަރުން ތިބީ ހިތުންވެފައެވެ. އެތައް ޒަމާނެއްގެ އުދާސްތަކާއި ދުރަށްދެވި، ކުރާ ބުރަ މަސައްކަތާއި އެއްވަރުގެ މުސާރަ ލިބޭ ކަމުގެ އިހުސާސް، ހަޔާތުގައި ފުރަތަމަ ފަހަރަށް ގިނަ އަދަދެއްގެ މުވައްޒަފުންނަށް ވަނީ ކުރެވެން ފަށާފައެވެ.

ޓީޗަރުންނަށް ހިނިތުންވުން، އެހެންނަމަވެސް ވަށައިޖެހޭ ހައްލެއް ބޭނުން! ގޮންޖެހުން އެބަހުރި!

ތައުލީމީ ދާއިރާގެ މުވައްޒަފުންގެ މުސާރައަށް މި ބަދަލު ގެނައުމަށްޓަކާ، ދައުލަތުގެ ބަޖެޓުން އަހަރަކު 488 މިލިއަން ރުފިޔާ އިތުރަށް ހޭދަކުރަން ޖެހޭނެކަމަށް ފިނޭންސް މިނިސްޓްރީ ހާމަކޮށްފައިވެއެވެ. އަދި ގަބޫލުކުރަން ޖެހޭ އެއްހަގީގަތަކީ، ތަރައްގީގެ މަޝްރޫޢުތަކަށް ކުރަމުންއަންނަ ބޮޑެތި ހޭދަތަކަށް ހުއްޓުމެއް ނުގެނެސް، އިތުރުވަމުންދާ ސިޔާސީ މަގާމްތަކަށް ކުރާ ހޭދަތަކަށް އެއްވެސް ސަރުކާރަކުން ހުއްޓުމެއް ނުގެނެސް، ހަމައެއާއެކު ދައުތަށް ލިބޭ އާމްދަނީ އިތުރުނުކޮށް، މުސާރައިގެ އޮނިގަޑަށް ބޮޑެތި ބަދަލު ގެނައުމުން، ހަގީގަތުގައިވެސް ދައުލަތުގެ ބަޖެޓަށް ބުރަ ބޮޑުވެގެން ދާނޭކަމެވެ. އިގްތިސާދީ ގޮތުން އުފެއްދުންތެރި ބަދަލުތަކެއް ނުގެނެސް، މުސާރައަށް އިތުރު 488 މިލިއަން ރުފިޔާ ދައުލަތުގެ މާލިއްޔަތުން ޚަރަދު ކުރުމުން ކުރިމަތިވެދާނޭ ގޮންޖެހުންތަކެއް ހުރެދާނެއެވެ.

ހަމައެއާއެކު ފާހަގަ ކޮށްލާން ޖެހޭ އަނެއް ނުކުތާއަކީ، ހަމަ މިބީދައިން މުސާރައަށް ހެޔޮ ބަދަލުތައް ގެންނާންޖެހޭ، ކުރާ މަސައްކަތާއި އެއްވަރުގެ މުސާރަ ލިބެމުން ނުދާކަމުގެ ޝަކުވާތައް އެތައް މުވައްޒަފުންނެއް އަދިވެސް ކުރަމުންދާ ކަމެވެ. ތައުލީމީ ދާރާގެ މުވައްޒަފުންގެ މުސާރަ ބޮޑު ވެގެން ދިއުމާއެކު، ޔުނިވަރސިޓީގެ ލެކްޗަރަރއިން ވަނީ އެމުވައްޒަފުންގެ މުސާރަ ބޮޑު ކޮށްދިނުމަށް މުޒާހިރާ ކުރަން ފަށާފައެވެ. އެއާއެކު ލެކްޗަރަރއިންގެ މުސާރަތައްވެސް ހަމަ މި ބީދައިން ބޮޑު ކޮށްދެއްވާނޭކަމުގެ ވައުދު ސަރުކާރުން މިހާރުވަނީ ވެފައެވެ.

އަދި ސިއްޙީ ދާއިރާގެ މުވައްޒަފުންގެ މުސާރަތައް ބޮޑު ކޮށްދެއްވާނޭކަމަށް ރައީސް ސާލިހު ވެވަޑައިގެންފައިވާ ވައުދުވެސް، ދައުލަތުގެ ބަޖެޓުން ބޮޑު ހޭދައެއް ކޮށްގެން ފުއްދާދޭން އޮތީ ޖެހިފައެވެ. މިގޮތުން، ތައުލިމީ ދާއިރާގެ މުވައްޒިފުންގެ މުސާރަތައް އާދަޔާ ޚިލާފަށް ބޮޑު ކުރުމާއެމު، ސިއްޙީ ދާއިރާއާއި އަދި އެނޫން ސިވިލް ސާވަންޓުންގެ މުސާރަވެސް، އަޅާކިޔޭ އެއް މިންގަޑަކުން ބޮޑު ކުރުން ނޫން އެހެން ހައްލެއް އެއްވެސް ސަރުކާރެއްގެ ކުރިމަތީގައި ދެން އޮންނާނޭ ކަމަށް ނުބެލެވެއެވެ.

އެހެންނަމަވެސް ހަނދާން ބަހައްޓަންވީ އެއްކަމަކީ، އިޖުތިމާއީ އިންސާފު މިބީދައި ގާއިމް ކުރެވެމުން މިދަނީ، އާދަޔާ ޚިލާފް ބޮޑު މުސާރަލިބޭ ސިޔާސީ މަގާމްތަކުގެ މުސާރަ ކުޑަ ކުރުމަކާ ނުލާ، ސަރުކާރުން ކުރާ ތަރައްގީއާއި ގުޅުންހުރި އެއްވެސް ހޭދައެއް ކުޑަ ނުކޮށް، އަދި ދައުލަތުގެ ދަރަނި "ހެސްކިޔާފަ" އުފުލި، ދައުލަތަށް އާމްދަނީ ލިބޭނެ އިތުރު މަގުތަކެއް ފަހި ކުރެވުމަކާ ނުލައިކަމެވެ.

އެހެންކަމުން، ކުރިޔަށް އޮތްތަނުގައި، ދައުލަތުގެ ރިކަރަންޓް ޚަރަދު އެއް މިންގަޑެއްގައި ހިފަހައްޓާ، އަދި މުސާރައަށް ކުރާ ބޮޑު ހޭދައިގެން އަސަރު، ނުރަގަޅު ބަދަލެއްގެ ގޮތުގައި އިގްތިސާދުން ފެނިގެން ދިޔަ ނުދިނުމަށްޓަކާ، ޚަރަދު ކުޑަކުރުމާއި، ތަރައްގީގެ ބޮޑެތި ޕްރޮޖެކްތައް ހިންގުމުގައި އިގްތިސާދު ކުރުމާއި، ދަރަނި ބޮޑުވެގެން ދިޔަ ނުދީ ހިފެހެއްޓެން ނޫން އެހެން ހައްލެއް ސަރުކާރުގެ ކުރިމަތީގައި ނުއޮންނާނޭ ކަމަށް ނުބެލެވެއެވެ.

ނަތީޖާއެއްގެ ގޮތުން، އިޖުތިމާއީ އިންސާފާއިި ގުޅުންހުރި، މި ބޮޑު މައްސަލައަށް ވަށައިޖެހޭ އަވަސް ހައްލެއް ހޯދުމަށް ސަރުކާރުގެ މައްޗައް އޮތް ޒިންމާ އިތުރަށް ބޮޑުވެއްޖެއެވެ. އެހެންނަމަވެސް، މުސާރަތައް ބޮޑު ކުރުމާއި، މިއުސޫލުން ދައުލަތުން ކުރެވޭ ހޭދައަކީ ގެނެވޭ އިގްތިސާދީ ހެޔޮ ބަދަލްތަކާއި އެކީ އަންނަ ބަދަލުތަކަށް ވެގެން ނުގޮސްފި ނަމަ، މިބަދަލުތަކުގެ ނުރަގަޅު ނަތީޖާއާއިވެސް ކުރިމަތިލާން ޖެހިދާނޭކަމުގައިވެސް ހަނދާން ބަހައްޓަން ޖެހެއެވެ.