ދުނިޔޭގައި އެންމެ ފަހުން މަންކީޕޮކްސް ބަލި ފެނުނު ދެގައުމު ކަމުގައި އިސްރާއީލާއި ސުވިޒަރލޭންޑް ވެ، މި ބަލި ފެނިފައިވާ ގައުމުތަކުގެ އަދަދު 14އަށް އަރައިފިއެވެ.
މި ދެގައުމުންވެސް ބުނެފައިވަނީ، ކޮންމެ ގައުމަކުންވެސް އެންމެ މީހެއްގެ ގައިން ބަލި ފެނިފައިވާ ކަމަށާއި، މި މިހުންނަކީ ގައުމުން ބޭރަށް ދަތުރު ކޮށްފައިވާ މީހުން ކަމުގައެވެ. އަދި އިސްރާއީލުން ބުނެފައިވަނީ މިބަލި ޖެހިފައިވާކަމަށް ބެލެވޭ އިތުރު މީހެއްގެ ތަހުލީލުތައް އަގައުމުގައި މިހާރު ހަދަމުން ދާކަމުގައެވެ.
މިހާތަނަށް ދުނިޔޭގައި މަންކީޕޮކްސްގެ 80 ކޭސްއެއްވަނީ ފެނިފައެވެ. މިބަލީގެ އައުޓުބްރޭކެ މިހާތަނަށް ފެނިފައިވަނީ ޔޫރަޕާއި، އެމެރިކާ، ކެނެޑާ އަދި އޮސްޓްރޭލިއާއިންނެވެ.
މަންކީޕޮކްސް ބަލި އެންމެ އާންމުގޮތެއްގައި ފާއިތުވެދިޔަ ތަނުގައި ފެތުރިފައިވަނީ މެދުތެރޭ އަދި ހުޅަނގު އެފްރިކާގެ އެކަހެރި ސަރަހައްދުތަކުގައެވެ.
މިހާރު ބައެއް ގައުމުތަކުގައި މަންކީޕޮކްސް ފެތުރެމުންދަނީ ސައިންވެރިންނަށް ހައިރާންކަން ގެނުވަމުންނެވެ. ސަބަބަކީ، މަންކީޕޮކްސްއަކި ފަސޭހަކަމާއެކު ގައިންގަޔަށް އަރާ ބައްޔަކަށް ނުވެފައި، އާންމުކޮށް ބަލި ފެތުރިގެން ދިއުމުގެ ރިސްކުވެސް ކުޑަވުމުގެ ސަބަބުންނެވެ.
އިނގިރޭސިވިލާތުގެ ނޭޝަނަލް ހެލްތު ސާވިސްއިން ހާމަ ކޮށްފައިވާ ގޮތުގައި، މަދުން ނޫނީ ނުފެތުރޭ، ވައިރަކުން ޖައްސާ މިބައްޔަކީ ޖެހުމަށްފަހު އާންމުކޮށް މަދު ހަފްތާތަކެއްގެ ތެރޭގައި އަމިއްލައަށް ރަގަޅުވެގެން ދާ ބައްޔެއް ކަމުގައެވެ. އަދި ހާމަކޮށްފައިވާ ގޮތުގައި، މިއީ ގައިންގަޔަށް ފަސޭހަކަމާއެކު އަރާ ބައްޔަކަށް ނުވުމާއެކު، މިބައްޔަކީ އާންމު ސިއްޙަތަށް ހުރި ނުރައްކަލަކަށް ވެގެންދިއުމުގެ ފުރުސަތު ވަރަށް ކުޑަ ކަމުގައެވެ.
ދުނިޔޭގެ ސިއްޙަތު ޖަމިއްޔާއިން ބުނެފައިވަނީ، މިބަލީގެ 50 ކޭސްއެއް މިހާރު ތަހުގީގު ކުރެވެމުންދާ ކަމުގައެވެ. މަންކީޕޮކްސް ފެންނަމުންދާ ގައުމުތަކުގެ ނަން ހާމަނުކޮށް، ޑަބްލިއުއެޗްއޯއިން ބުނެފައިވަނީ، މިބަލީގެ އިތުރު ކޭސްތައް ފެނުމުގެ ފުރުސަތު ވަރަށް ބޮޑު ކަމުގައެވެ.
މިހާތަނަށް، ޔޫރަޕްގެ ޕަބްލިކް ހެލްތު އޭޖެންސީންވަނީ މިބަލި އިނގިރޭސިވިލާތާއި، ސްޕެއިން، ޕޯޗުގަލް، ޖާރމަނީ، ފްރާންސް، ނެދަރލޭންޑްސް، އިޓަލީ އަދި ސުވިޑްންއިން ފެނިފައިވާކަން ޔަގީން ކޮށްދީފައެވެ.
ޑަބްލިއުއެޗްއޯއިން ހުކުރުދުވަހު ނެރެފައިވާ ބަޔާނެއްގައި ބުނެފައިވަނީ، ފަހުން ފެނިފައިވާ މި ބަލީގެ އައުޓުބްރޭކްއަކީ އާންމުކޮށް މިބަލި ފެންނަ އުސޫލާއި ޚިލާފަށް ފެނިފައިވާ އައުޓްބްރޭކެއް ކަމުގައެވެ. ސަބަބެއްކަމުގައި ޑަބްލިއުއެޗްއޯއިން ބުނެފައިވަނީ، މިބަލި ފެންނަމުންދަނީ ބަލި އާންމުކޮށް ފެތުރެމުން ގޮސްފައިވާ ގައުމުތަކުން ކަމުގައި ނުވާތީއެވެ.
ދުނިޔޭގެ ސިއްހަތު ޖަމިއްޔާއިން ބުނެފައިވަނީ، އެ ޖަމިއްޔާއިން މިހާރުދަނީ، މިބަލި ފެތުރެމުންދާ ގޮތް ދެނެގަތުމަށާއި އަދި ބަލީގެ އަސަރު ކުރަމުންދާ މީހުންނަށް އެހީތެރިކަން ފޯރުކޮށްދިނުމަށް މަސައްކަތް ކުރަމުން ކަމުގައެވެ.
