ދުނިޔޭގެ 12 ގައުމަކުން މަންކީޕޮކްސްގެ 80 ކޭސް މިހާތަނަށް ފެނިއްޖެކަމުގައި ދުނިޔޭގެ ސިއްހަތު ޖަމިއްޔާއިން ބުނެފިއެވެ.
އަދި އެ ޖަމިއްޔާއިން ބުނެފައިވަނީ، މީގެ އިތުރު 50 ކޭސްއެއް މިހާރު ތަހުގީގު ކުރެވެމުންދާ ކަމުގައެވެ. މަންކީޕޮކްސް ފެންނަމުންދާ ގައުމުތަކުގެ ނަން ހާމަނުކޮށް، ޑަބްލިއުއެޗްއޯއިން ބުނެފައިވަނީ، މިބަލީގެ އިތުރު ކޭސްތައް ފެނުމުގެ ފުރުސަތު ވަރަށް ބޮޑު ކަމުގައެވެ.
މަންކީޕޮކްސް ބަލި މިހާރު ޔޫރަޕްގެ 9 ގައުމަކުންނާއި އެމެރިކާ، ކެނެޑާ އަދި އޮސްޓްރޭލިއާއިންވެސް ވަނީ ފެނިފައެވެ.
މަންކީޕޮކްސް ބަލި އެންމެ އާންމުގޮތެއްގައި މިހާތަނަށް ފެތުރިފައިވަނީ މެދުތެރޭ އަދި ހުޅަނގު އެފްރިކާގެ އެކަހެރި ސަރަހައްދުތަކުގައެވެ.
އެހެންނަމަވެސް، އިނގިރޭސިވިލާތުގެ ނޭޝަނަލް ހެލްތު ސާވިސްއިން ހާމަ ކޮށްފައިވާ ގޮތުގައި، މަދުން ނޫނީ ނުފެތުރޭ، ވައިރަކުން ޖައްސާ މިބައްޔަކީ ޖެހުމަށްފަހު އާންމުކޮށް މަދު ހަފްތާތަކެއްގެ ތެރޭގައި އަމިއްލައަށް ރަގަޅުވެގެން ދާ ބައްޔެއް ކަމުގައެވެ. އަދި ހާމަކޮށްފައިވާ ގޮތުގައި، މިއީ ގައިންގަޔަށް އަރާ ބައްޔަކަށް ނުވުމާއެކު، މިބައްޔަކީ އާންމު ސިއްޙަތަށް ހުރި ނުރައްކަލަކަށް ވެގެންދިއުމުގެ ފުރުސަތު ވަރަށް ކުޑަ ކަމުގައެވެ.
މިހާތަނަށް، ޔޫރަޕްގެ ޕަބްލިކް ހެލްތު އޭޖެންސީންވަނީ މިބަލި އިނގިރޭސިވިލާތާއި، ސްޕެއިން، ޕޯޗުގަލް، ޖާރމަނީ، ފްރާންސް، ނެދަރލޭންޑްސް، އިޓަލީ އަދި ސުވިޑްންއިން ފެނިފައިވާކަން ޔަގީން ކޮށްދީފައެވެ.
ޑަބްލިއުއެޗްއޯއިން ހުކުރުދުވަހު ނެރެފައިވާ ބަޔާނެއްގައި ބުނެފައިވަނީ، ބަހުން ފެނިފައިވާ މި ބަލީގެ އައުޓުބްރޭކްއަކީ އާންމުކޮށް މިބަލި ފެންނަ އުސޫލާއި ޚިލާފަށް ފެނިފައިވާ އައުޓްބްރޭކެއް ކަމުގައެވެ. ސަބަބެއްކަމުގައި ޑަބްލިއުއެޗްއޯއިން ބުނެފައިވަނީ، މިބަލި ފެންނަމުންދަނީ ބަލި އާންމުކޮށް ފެތުރެމުން ގޮސްފައިވާ ގައުމުތަކުން ކަމުގައި ނުވާތީއެވެ.
ދުނިޔޭގެ ސިއްހަތު ޖަމިއްޔާއިން ބުނެފައިވަނީ، އެ ޖަމިއްޔާއިން މިހާރުދަނީ، މިބަލި ފެތުރެމުންދާ ގޮތް ދެނެގަތުމަށާއި އަދި ބަލީގެ އަސަރު ކުރަމުންދާ މީހުންނަށް އެހީތެރިކަން ފޯރުކޮށްދިނުމަށް މަސައްކަތް ކުރަމުން ކަމުގައެވެ.
