ސުލްހަވެރިކަމާއެކު ޚިޔާލު ފާޅުކުރަމުންދާ ފަރާތްތަކަށް ސަރުކާރުން ހުރަސް އަޅާކަމަށް ބުނެ، އެމްނެއްޓީ އިންޓަރނޭޝަނަލް އިން ދިވެހި ސަރުކާރަށް ފާޑު ވިދާޅުވެއްޖެއެވެ.
އެމެންސްޓީ އިންޓަރނޭޝަަނަލްގެ ސައުތު އޭޝިއާ ރީޖަނަލް އޮފީހުން މީގެ ކުޑައިރު އިރުކޮޅެއް ކުރިން ކޮށްފައިވާ ޓުވީޓެއްގައި ވިދާޅުވެފައިވަނީ، ރާއްްޖޭގައި، ސުލްހަވެރިކަމާއެކު މުޒާހިރާ ކުރުމާއި ޚިޔާލުފާޅުކުރުމަށް މުވައްސަސާތަކުން ހުރަސް އަޅަމުންދާ ކަމަށާއި، އަދި އިދިކޮޅު ފަރާތްތަކުން ކުރިޔަށް ގެންދާ އިންޑިއާ އައުޓު ހަރަކާތުން ގައުމީ ސަލާމަށް ނުރައްކާވާކަމަށް ބުނެ، ނެރެފައިވާ ރައީސުލްޖުމްހޫރިއްޔާގެ ގަރާރުން ސުލްހަވެރިކަމާއެކު އެއްވުންތައް ބޭއްވުމުގެ ހައްގު ނިގުޅައިގެންފައި ވާކަމުގައެވެ.
We are deeply concerned by reports and visuals of crackdown on peaceful protestors and journalists in the Maldives and a recent decree restricting the right to protest in the country in the pretext of containing threats to national security posed by the "India Out" campaign. 1/2 https://t.co/Zoo9KeuIew
— Amnesty International South Asia (@amnestysasia) May 20, 2022
އެމްނެސްޓީ އިންޓަރނޭޝަނަލްއިން ކޮށްފައިވާ ޓުވީޓުގައި އިތުރަަށް ވިދާޅުވެފައިވަނީ، ސުލްހަވެރިކަމާއިއެކު އެއްވެ އުޅުމުގެ މިނިވަންކަމާއި ޚިޔާލު ފާޅުކުރުމުގެ މިނިވަންކަން ހަނި ކުރެވެންވާނީ، ހާލަތާއި ބައްދަލު މިންވަރަކަށް ބަލާ، ގާނޫނުތަކުގައި ކަނޑައެޅިފައިވާ ގޮތުގެ މަތިން ކަމުގައެވެ. އަދި މީގެ އިތުރުން، މުޒާހިރާ ކުރަމުންދާ ފަރާރްތަކާއި ދެކޮޅަށް ހާލަތާއި ނުބައްދަލު ބާރުގެ ބޭނުން ކުރަމުންދާ ކަމަށާއި، މިކަންކަން ތަހުގީގު ކުރުމަށްވެސް އެޖަމިއްޔާއިންވަނީ ސަރުކާރަށް ގޮވާލާފައެވެ.
އިދިކޮޅު ފަރާތްތަކުން މާލޭގެ މަގުތަކުގައި ކުރިޔަށް ގެންދާ އިންޑިއާ އައުޓު ހަރަކާތްތައް ހުއްޓުވުމަށް ސަލާމަތީ ބާރުތަކުން ހިންގަމުންދާ ހަރަކާތްތަކުގެ ތެރޭގައި، ސަލާމަތީ ބާރުގައި ހިމެނޭ ސިފައިންގެ މީހަކު އިދިކޮޅު ކޯލިޝަނުން ރޭ މާލޭގައި ކުރިއަށްދިޔަ ހިނގާލުމުގައި އަންހެނެއްގެ އަތުގައި އޮތް "އިންޑިއާ އައުޓް" ދިދައެއް އަތުލަން އެއަންހެން މީހާ ފަހަތުން ދުވާ ވީޑިއޯއެއް އާންމުވެ، ގިނަ ބައެއްގެ ފާޑުކިޔުން ވަނީ އެމްއެންޑީފަށް އަމާޒު ވެފައެވެ.
އުމުރުން 19 އަހަރުގެ ޕީޕީއެމްގެ ޔޫތު މެންބަރެއް ކަމުގައިވާ ނުހާގެ ފަހަތުން ސިފައިންގެ އޮފިޝަލު ދުވަންފެށީ އޭނާ އަތުގައި އޮތް "އިންޑިއާ އައުޓް" ދިދަ އަތުލުމަށެވެ. ސިފައިންގެ ފިރިހެން އޮފިސަރަށް އެއަންހެން މީހާ އަތުނުލެވި ހުސްއަތާ އަންނަތަން ވީޑިއޯއިން ފެނެއެވެ.
ރޭގެ އެއްވުމުން ނުހާ ވަނީ ހައްޔަރުކޮށް ފުލުހުންގެ ބެލުމުގެ ދަށަށް ގެންގޮސްފައެވެ. އޭނާ ގެންދިޔަ ފަހުން ފުލުހުން އޭނާއަށް އަނިޔާކުރިކަމުގެ ތުހުމަތު އިދިކޮޅު ކޯލިޝަނުން ވަނީ ކޮށްފައެވެ. ސަބަބަބީ އޭނާ ފުލުހުންގެ ބެލުމުގެ ދަށަށް ގެންދިޔައިރު އެއްވެސް އަނިޔާއެއް ލިބިފައިނުވާއިރު، ފުލުހުންގެ ބެލުމުގެ ދަށަށް ގެންދިޔަ ފަހުން އޭނާ ހޮސްޕިޓަލަށް ގެންގޮސް ފަރުވާ ދޭން ޖެހުމުގެ ސަބަބުން ކަމުގައި އިދިކޮޅު ކޯލިޝަންއިންވަނީ ބުނެފައެވެ.
ރައީސް ސާލިހު ނެރުއްވި ރިޔާސީ ގަރާރަކުން އިންޑިއާ އައުޓު ހަރަކާތް މަނާކުރިފަހުން، މާލޭގައި އިންޑިއާ އައުޓު ހަރަކާތް ކުރިޔަށް ގެންދިއުމުގެ ފުރުސަރު ފުލުހުން ދީފައެއް ނުވެއެވެ. އަދި ފުލުހުން މިހާރުވަނީ މި ހަރަަކާތް ރޭވުމުގައި އިސްކޮށް ހަރަކާތްތެރިވާ ފަރާތްތައް ހައްޔަރުވެސް ކުރަން ފަށާފައެވެ.
