ބޭރުގެ ދަރަނި ނުދެެއްކި، ފާއިތުވި 23 އަހަރުތެރޭ، އޭޝިއާ ޕެސިފިކް ސަރަހައްދު ސޯވެރިންގ ޑީފޯލްޓަކަށް ދިޔަ ފުރަތަމަ ގައުމަކަށް ސްރީ ލަންކާ ވެގެން ހިގައްޖެއެވެ.
މިއަދު ސްރީ ލަންކާގެ ސެންޓްރަލް ބޭންކުންވަނީ، ގައުމުގެ ބޭރުގެ ދަރަނި ނުދެއްކި، ފުރަތަމަ ފަހަރަށް އެގައުމުން ސޮވެރިންގ ޑީފޯލްޓަކަށް ގޮސްފައިވާކަން ހާމަ ކޮށްފައެވެ.
ސްރީ ލަންކާއިން، ދެ އިންޓަރނޭޝަނަލް ބޮންޑަކަށް އިންޓަރެސް ޕޭމަންޓް ދައްކަންޖެހޭ 30 ދުވަހުގެ ގްރޭސް ޕީރިއަޑް މި ބުދަ ދުވަހަށް ވަނީ ހަމަވެފައެވެ. އޭގެ ނަތީޖާއެއްގެ ގޮތުން، އިގްތިސާދީ ތަޖުރިބާ ކާރުން ވިދާޅުވާ ގޮތުގައި ސްރީ ލަންކާ މިހާރުވަނި "ހާރޑް" ޑީފޯލްޓް (ރިއަލް ޖީޑީޕީ ކައިރި މުސްތަގުބަލެއްގައި އަލުން އިއާދަކުރުމަށް އުގަގޫ މިންވަރަކަަށް ދަށަށް ގޮސް، ޝެޑިއުލްއާ އެއްގޮތަށް އިންޓަރަސްޓު ނުދެއްކޭ ހާލަތަށް ދިއުން) އަކަށް ގޮސްފައެވެ. އަދި މިހާލަތުގައި އޮތް އިގްތިސާދީ ކާރިސާގެ އިތުރުން ގައުމު މިވަގުތު އޮތީ، އިގްތިސާދީ ކާރިސާއިން އުފަންކުރި ސިޔާސީ ކާރިސާއެއްގައި ވެސްމެއެވެ.
މޫޑީއިން އެންމެ ފަހުން ރޭޓް ކޮށްފައިވާ ގޮތުގައި، ބޭރުގެ ދަރަނި ނުދެއްކި ސޯވެރިންގ ޑީފޯލްޓަކަށް ގޮސްފައިވަނީ 1999 ވަނަ އަހަރު ޕާކިސްތާނެވެ.
ސްރީ ލަންކާއަށް ކުރިމަތި ވެފައިވާ އިގްތިސާދީ ކާރިސާއަށް ހައްލު ނުހޯދި، ހާލަތު ގޯހުން ގޯހަށް ދަތުރުކޮށް، ގައުމުގެ ބޭރު ފައިސާގެ ރިޒާވް ނުރައްކާތެރި މިންވަރަކަށް ދަށަށްގޮސް، ދައުލަތުގެ މުވައްޒަފުންނަށް މުސާރަ ދިނުމަށްޓަކާ ފައިސާ ޗާޕުކުރަން މަޖުބޫރުވެ، ތަކެއްޗާއި އާންމު ޚިދުމަތުގެ އަގު އިންތިހާއަށް މަތިވެ، ގައުމަށް އެތެރެ ކުރަންޖެހޭ އަސާސީ ކާބޯތަކެއްޗާއި، ތެލާއި ބޭހަށް ފައިސާ ދެއްކޭނެ ގޮތެއްނެތި، އެގައުމުވަނީ ބަގުރޫޓު ވުމާއި ކައިރި ވެފައެވެ.
ސްރީ ލަންކާއަށް ކުރިމަތިވެފައިވާ އިގްތިސާދީ ކާރިސާއަކީ، 1948ވަނަ އަހަރު އެގައުމަށް މިނިވަަންކަން ލިބުނުފަހުން އެގައުމު ވެއްޓިފައިވަ އިގްތިސާދީ އެންމެ ބޮޑު ވަޅުގަޑެވެ.
