މާލޭގައި އިދިކޮޅުން ރޭ ބޭއްވި "އިންޑިއާ އައުޓް" މުޒާހަރާ ރޫޅާލަން އުޅުނު ފުލުހަކު ނޫސްވެރިއަކަށް އިންޒާރު ދިން ކަމަށް ބުނާ މައްސަލައެއް ބަލައިދޭން މޯލްޑިވްސް މީޑިއާ ކައުންސިލް (އެމްއެމްސީ) އިން ފުލުހުންގެ ކިބައިން މިއަދު އެދިއްޖެއެވެ.
މި މައްސަލައާ ގުޅިގެން މީޑިއާ ކައުންސިލުން ކުރި ޓްވީޓެއްގައި ބުނެފައިވަނީ ރާއްޖޭގައި ތިބި އިންޑިއާ ސިފައިން ރާއްޖެއިން ބޭލުމަށް ގޮވާލައި ކުރިއަށް ގެންދާ "އިންޑިއާ އައުޓް" ހަރަކާތްތަކުގެ ތެރެއިން ރޭ މާލޭ މަގުމަތީގައި ކުރިއަށް ގެންދިޔަ އެއްވުން ކަވަރު ކުރަން އުޅުނު ނޫސްވެރިންނަށް "ސޯލިހް" ނަމަކަށް ކިޔާ ފުލުހަކު އިންޒާރުދީފިކަމަށް ބުނެ މީޑިއާތަކުގައި ރިޕޯޓުކޮށްފައިވާކަން އެ ކައުންސިލުގެ ސަމާލުކަމަށް އައިސްފައިވާކަމަށެވެ.
އެހެންވެ، އެ މައްސަލަ ބަލައި، ކަން ހިނގައިދިޔަ ގޮތުގެ ތަފުސީލު މީޑިއާ ކައުންސިލާ ހިއްސާކުރަން ފުލުހުންގެ ކިބައިން މިހާރު އެދިފައިވާނެ ކަމަށް އެ ކައުންސިލުން ބުނެއެވެ. ބައެއް މީޑިއާތަކުން ރިޕޯޓްކުރި ގޮތުގައި "ސޯލިހު" ކިޔާ އެ ފުލުސް މީހާ، ރޭގެ މުޒާހަރާގައި ނޫސްވެރިއަކަށް އަމާޒުކޮށް "ހޭއަރުވައިލާނެ" ކަމުގެ އިންޒާރު ދިނެވެ. އަދި އެ ވަގުތު އެ ތަނުގައި ތިބި ބައެއް ނޫސްވެރިން އެކަން ޓުވިޓާގައި އާންމުކޮށް، ފުލުހުންނަށް ރިޕޯޓްކުރި ކަމަށް ވެއެވެ. ރޭގެ މުޒާހަރާގެ ތެރެއިން ތިން މީހަކު ހައްޔަރު ވެސް ކުރިއެވެ.
އިދިކޮޅުގެ "އިންޑިއާ އައުޓް" ހަރަކާތަކީ ގައުމީ ސަލާމަތަށް ހުރި ނުރައްކަލެއް ކަމަށް ގައުމީ ސަލާމަތާ ބެހޭ މަޖިލީހުން މިދިޔަ މަހުގެ 21 ގައި ވަނީ ކަނޑައަޅައިފައެވެ.
