ޔޫކުރެެއިންގެ އުތުރުގެ ކާކިވް ސިޓީގެ ހިމާޔަތުގައި، ރަޝިއާ ސިފައިންނާ ދެކޮޅަށް ހަގުރާމަ ދިޔަމުންދިޔަ ޔޫކުރެއިން ސިފައިން، ރަޝިއާ ސިފައިން ފަހަތަށް ޖައްސަމުން ގޮސް، ރަޝިއާގެ ބޯޑަރާއި ހައަށް ކުރިޔަށް ޖެހިފައިވާކަމަށް، ޔޫކުރެއިންގެ ޑިފެންސް މިނިސްޓްރީން ހާމަ ކޮށްފިއެވެ.
ކާކިވް ސިޓީއަކީ ޔޫކުރެއިންގެ ދެވަނައަށް އެންމެ ބޮޑު ސިޓީއެވެ.
ޔޫކުރެއިންގެ ޑިފެންސް މިނިސްޓްރީންވަނީ، އެގައުމުގެ ގިނަ އަދަދެއްގެ ސިފައިން ރަޝިއާގެ ބޯޑަރު ކަައިރީގައި، ދެގައުމުގެ އިން ވަކިކުރުމަށް ނުލާއި ރީދޫކުލައިން ކުރަހާފައި ހުންނަ ބޯޑަރލައިން ކަރީގައި ތިބޭ މަންޒަރު ދައްކުވައިދޭ ވީޑިއޯއެއްވެސް އާންމު ކޮށްފައެވެ.
ކާކިވްގެ ގަވަރަނަރު ވިދާޅުވެފައިވާ ގޮތުގައި، ޔޫކުރެއިންގެ ސިފައިންވަނީ، ބޯޑަރު މާރކު ކުރުމަށް ޖަހާފައި ހުންނަ ސައިން ބޯޑު އަލުން ޖަހާފައެވެ.
ޔޫކުރެއިންގެ ރައީސް ވިދާޅުވެފައިވާ ގޮތުގައި، ރަޝިއާ ސިފައިން، ކާކިވްގެ ދެކުނުން އޮންނަ ލުހާންސް ސަރަހައްދަށް ދިން ހަމަލާތަކުގައި ދެމީހުން މަރުވެ އިތުރު 9 މީހަކަށް ވަނީ އަނިޔާވެފައެވެ. މިމީހުން މަރުވެފައިވަނީ، މި ސަރަަހައްދުގެ ސިވަޑޮނެސްކް ހޮސްޕިޓަލަށް ރަޝިއާ ސިފައިން ދިން ހަމަލާތަކުގައެވެ.
އިނގރޭސިވިލާތުގެ ޖޮއިންޓް ފޯސެސް ކޮމާންޑުގެ ކުރީގެ ވެރިޔާ ޖެނެރަލް ސާރ ރިޗަރޑް ބެރޮންސް ވިދާޅުވެފައިވަނީ، ކާކިވް ހިފުމަށް ރަޝިއާއިން ކުރި ހަނގުރާމާގައި އެގައުމު ބަލިވުމަކީ ރަޝިއާއަށް ކުރިމަތިލާން ޖެހުނު ވަރަށް ބޮޑު ނާކާމިޔާބީއެކެވެ.
މިސިޓީއަކީ 1.4 މިލިއަން މީހުންގެ އާބާދީއެއް އޮންނަ ސިޓީއެކެވެ. އަދި މިސިޓީ އޮންނަނީ ރަޝިއާގެ ބޯޑަރާއި އެންމެ 50 ކިލޯ މީޑަރު ދުރުގައެވެ.
