ސިއްޙީ ތަހުލީތަކެއް ކުރުމަށްފަހު، އަދި ކުރިމަތިވެ ވަޑައިގެންނެވި ސިއްޙީ އާލާސްކަންފުޅަށް ކާމިޔާބުކަމާއެކު ފަރުވާ ލިބިގަތުމަށްފަހު، ސައުދީ އަރަބިއާގެ ރަސްގެފާނު، ކިންގ ސަލްމާން ބިން އަބުދުލް އަޒީޒު މިހާރު ހޮސްޕިޓަލުން ދޫކޮށްލާފައިވާކަން، ސައުދީ ރޯޔަލް ކޯޓުން ހާމަ ކޮށްފިއެވެ.
ކިންގ ސަލްމާން މެޑިކަލް ޓެސްޓުތަކެއް ހެދުމަށްޓަކާ، ސައުދީ ރެޑް ސީގެ ސިޓީއެއް ކަމުގައިވާ ޖިއްދާގެ ހޮސްޕިޓަލެއްގައި އެޑްމިޓް ކުރީ މި މެއިމަހުގެ 8 ވަނަ ދުވަހުއެވެ.
ސައުދީ ރޯޔަލް ކޯޓުން އޭރު ނެރުނު ސްޓޭޓްމަންޓަކާއި ހަވާލާދީ، ސައުދީ ޕްރެސް އޭޖެންސީއިން ރިޕޯޓު ކޮށްފައިވަނީ، ރަސްގެފާނު އެޑްމިޓް ކުރެވުނީ މެޑިކަލް ޓެސްޓުތަކެއް ހެދުމަށްޓަކާ ކަމަށެވެ. އަދި މި ސްޓޭޓްމަންޓުގައި އިތުރު ތަފްސީލުތަކެއް ހާމަ ކޮށްފައެއް ނުވެއެވެ.
އެހެންނަަމަވެސް ފަހުން ރޯޔަލް ކޯޓުން ބުނެފައިވަނީ، ކިންގ ފައިސަލް ސްޕެޝަލިސްޓް ހޮސްޕިޓަލުގައި ކިންގ ސަލްމާން ކޮލޮނޮސްކޯޕީގެ ކުޑަ އޮޕަރޭޝަނެއް ކުރައްވާފައިވާ ކަމަށާއި، ހެއްދެވި ޓެސްޓުތަކުގެ ނަތީޖާތައްވެސް މުޅިން ރަގަޅު ކަމުގައެވެ. އަދި މި ކުޑަ އޮޕަރޭޝަނަށްފަހު ޑޮކްޓަރުން ލަފާ ދީފައިވަނީ ރަސްގެފާނު ހޮސްޕިޓަލުގައި އޭރު މަޑު ކުރެއްވުމަށް ކަމަށެވެ.
"ރަސްގެފާނުވަނީ، އެމަނިކްފާނުގެ ދަރިދަރި ކަލުންނަށާއި، ދަރިދަރި ކަނބަލުންގެ އިތުރުން ސައުދީ އަރަބިއާގެ އެންމެހާ ރައްޔިތުންނަށްވެސް، އެ އެންމެހާ ފަރާތްތަކުގެ ހެޔޮ ދުއާތަކަށް ޝުކުރު ދަންނަވާފަ،" ސައުދީގެ ދައުލަތުގެ ނޫސް އޭޖެންސީން އާންމުކުރި ބަޔާނުގައި ބުނެފައި ވެއެވެ.
ދުނިޔޭގައި އެންމެ ގިނައިން ތެޔޮ އެކްސްޕޯޓުކުރާ އަދި، މުސްލިމުންގެ އެންމެ މުގައްދަސް ދެބިނާ ހުންނަ، ސައުދި އަރަބިއާގެ ރަސްކަމަށް ކިންގް ސަލްމާން އިސްވެވަޑައިގަތީ 2015ވަނަ އަހަރުއެވެ. ކިންގް ސަލްމާން ސައުދީގެ ރަސްކަމަށް އިސްވެވަޑައިގަތީ ވަލީ އަހުދުގެ މަގާމްގައި ހުންނަވާތާ 2-1/2 ވުމަށްފަހުއެވެ.
މިހާރު އުމުރުފުޅުން 82 އަހަރުގެ ރަސްގެފާނުވަނީ 2020ވަނަ އަހަރު ގޯލްޑުބްލަޑަރގެ އޮޕަރޭޝަނެއް ކުރައްވާފައެވެ. އަދި ވަނީ މިއަހަރުގެ މާރޗްމަހު ހިތަށް ލައްވާފައިވާ ޕޭސްމޭކަރުގެ ބެޓެރީ ބަދަލު ކުރައްވާފައެވެ.
ކިންގް ސަލްމާނަށްފަހު ސައުދީ އަރަބިއާގެ ރަސްކަމަށް އިސްވެވަޑައިގަންނަވާނީ ރަސްގެފާނުގެ ދަރިކަލުން، މިހާރުގެ ވަލީއަހުދު މުހައްމަދު ބިން ސަލްމާންއެވެ. ސައުދީ އަރަބިއާގެ ސަރުކާރު ދުވަހުން ދުވަހަށް ހިންގެވުމުގެ އެންމެހާ ޒިންމާއަކާއި މިހާރުވެސް ރަސްގެފާނުގެ ފަރާތުން ހަވާލުވެ ވަޑައިގެން ހުންނެވީ ވަލީއަހުދު މުހައްމަދު ބިން ސަލްމާންއެވެ.
ކިންގް ސަލްމާން ސައުދީގެ ރަސްކަމަށް އިސްވެވަޑައިގަތީ އޭނާގެ އެއްބަފާ ބޭބޭފުޅު އަބުދﷲ ރަސްގެފާނު 2015ވަނަ އަހަރު އަވަހާރަ ވެވަޑައިގަތުމާއި ގުޅިގެންނެވެ. އަބުދުﷲ ރަސްގެފާނު ސައުދީގެ ރަސްކަމަށް އިސްވެވަޑައިގަތީ 2005ވަނަ އަހަރު އެއްބަފާ ބޭބޭފުޅު ފަހުދު ރަސްގެފާނު އަވަހާރަ ވުމާއި ގުޅިގެންނެވެ. ފަހުދު ރަސްގެފާނަކީ މިހާރުގެ ސައުދީ އަރަބިއާގެ ބާނީ ކަމުގައިވާ ކިންގ އަބުދުލް އަޒީޒުގެ 8 ވަނަ ދަރިކަލުންނެވެ. ފަހުދު ބިން އަބުދުލް އަޒީޒު އަލް ސައުދު ސައުދީ އަރަބިއާގެ ރަސްކަން ކުރައްވާފައިވަނީ 1982 އިން 2005 އަހަރާއި ހަމައަށެވެ.
