ސީޕީ ހަމީދުވެސް ޖެހޭނީ ގެއަށް ދާން ކަމަށާއި، ނޫނީ ޖެހޭނީ ދިގު މުއްދަތުގައި ޖަލުގަ ހޭދަކުރަން ކަމުގައި ކުރީގެ ރައީސް އަބުދު ﷲ ޔާމިން ވިދާޅުވެއްޖެއެވެ.
ރައީސް ޔާމިން މިހެން ވިދާޅުވީ ވިލިމާލޭ އަންހެނުން ތަރައްގީއަށް މަސައްކަތްކުރާ ކޮމެޓީއަށް ޕީޕިއެމްގެ ޓިކެޓްގައި ވާދަކުރާ ފާތިމަތު ނާޒިމާގެ ކެމްޕޭން ޖަލްސާގައި މިއަދު ވާހަކަފުޅު ދައްކަވަމުންނެެވެ.
ރައީސް ޔާމިން ވިދާޅުވީ، ހާލަތު ބަދަލު ނުވާނެކަމުގައި ބަޔަކު މީހުން ހީކުރި ނަމަވެސް ހާލަތު ބަދަލު ވާނެކަމަށާއި، ﷲގެ ނިންމެވުމަށް ގޮންޖެހޭނެ އެއްވެސް ބަޔަކު ނޫޅޭނެ ކަމުގައެވެ.
މިއަދުގެ ކެމްޕޭން ޖަލްސާގައި ވާހަކަ ދައްކަވަމުން ރައީސް ޔާމިން ވިދާޅުވީ، މިހާރުގެ ޗީފް އޮފް ޑިފެންސް ފޯރސް ޝަމާލްވެސް ހުންނެވީ މަގާމުގެ ދަހިވެތި ކަމުގައި ކަމުގައެވެ. އަދި ޔާމިން ވިދާޅުވީ ރައީސުލްޖުމްހޫރިއްޔާ ގާނޫނާއި ޚިލާފަށް ނެރުއްވާ ގަރާރެއް ނެރުއްވައިގެން އެ ގަރާރު ތަންފީޒު ކުރުމަށް ފުލުހުންނަށްވެސް އަދި އެމްއެންޑީއެފްއަށްވެސް މަސައްކަތެއް ނުކުރެވޭނެ ކަމުގައެވެ. އަދި އެއީ އައިރު ގާނުނީ ގަރާރެއްކަމުގައި ވިދާޅުވަމުން ޔާމިން ވިދާޅުވީ، ގަރާރަކުން ޚިޔާލު ފާޅުކުރުމުގެ މިނިވަންކަން ނުހިފެހެއްޓޭނެ ކަމުގައެވެ.
ޕީޕީއެމްގެ ކެނޑިޑޭޓުގެ ކެމްޕޭން ޖަލްސާގައި ވާހަކަ ދައްކަވަމުން ރައީސް ޔާމިން މިއަދު ވިދާޅުވީ ކުރީގެ ރައީސް މައުމޫން އަބުދުލްގައްޔޫމް ހައްޔަރުކުރީވެސް އެމަނިކުފާނު އަންގަވައިގެން ނޫން ކަމަށާއި، އެހެންނަމަވެސް، ރައީސް މައުމޫން ހައްޔަރުކޮށްފައިވަނީ ދައުލަތަށް މަޖުބޫރު ވެގެން ކަމުގައެވެ.
"މީގައި ހަގީގަތް ނޭގޭތީ އަޅުގަނޑު މިދަންނަވާލަނީ، އެއީ އަޅުގަނޑުގެ ނިންމުމެއް ނޫން. ރައީސް ނިންމާ މިކަހަލަ ބޮޑެތި ކަންކަން ނިންމާއިރު އޮންނާނެ ގައުމީ ސަލާމަތާއި ބެހޭ ކޮމެޓީއެެއް. އެއީ ވަޒީރުންގެ ކޮމެޓީއެއް. އެ ކޮމެޓީގައި ތިބޭނެ މުހިންމު ދާއިރާތަކުގެ ވަޒީރުންގެ އިތުރަށް އެކޮމެޓީގައި ތިއްބަވާނެ އެމްއެންޑީއެފްގެ ޗީފާ ވައިސް ޗީފާ، އެބޭފުޅުން ދުނިޔޭގައި ތިއްބެވި ބޭފުޅުން ހާޒިރުވާނެ. އަޅުގަނޑެއް ނޫން ރައީސް މައުމޫން ޖަލަށްލާން ނިންމީ. އެކީ ކޮމެޓީގެ ނިއްމުމެއް އެމައްސަލަ އިސްވެ ހުށައެޅީ ވެސް އަޅުގަނޑެއް ނޫން. ރައްޔިތުންނާއި ހަމަޔަށް މި ހަގީގަތް ވެސް މިދަންނަވާލީ" ރައީސް ޔާމިން ވިދާޅުވިއެވެ.
ރައީސް ޔާމިން ވިދާޅުވި ގޮތުގައި ރައީސް މައުމޫން އޭރު ހައްޔަރު ކޮށްފައިވަނީ، ގައުމީ ސަލާމަތާއި ބެހޭ ކޮމިޓީން ނިންމައިގެން ކަމަށާއި، އެނިންމުމުގެ ޒިންމާ އުފުލަން ޖެހޭނީ ގައުމީ ސަލާމަތު ކޮމިޓީގައި ދިއްބެވި ބޭފުޅުން ކަމުގައެވެ. ރައީސް ޔާމިން ވިދާޅުވީ އެކޮމިޓީއަކީ، ވަޒީރުންނާއި އެމްއެންޑީއެފްގެ ޗީފްއާއި ވައިސް ޗީފް ހިމެނޭގޮތަށް އެލުލެވިފައި އޮންނަ ކޮމިޓީއެއް ކަމުގައެވެ.
