ދުނިޔޭގެ ސިއްހަތު ޖަމިއްޔާގެ ޔޫރަޕް ސަރަހައްދުގެ މެމްބަރު ގައުމުތަކުން، ރަޝިއާއިން ޔޫކުރެއިންގައި ކުރަމުންދާ ހަނގުރާމަ ކުށްވެރިކޮށް ގަރާރެއް ފާސްކޮށްފިއެވެ. އަދި މިގަރާރުގެ ސަބަބުން، ރަޝިއާގައި ހުންނަ ޑަބްލިއުއެޗްއޯގެ ރީޖަނަލް އޮފީސް ބަންދުކޮށް، އަދި ރަޝިއާގައި، ޔޫއެން ހެލްތު އޭޖެންސީގެ އެއްވެސް ބައްދަލުވުމެއް ބޭއްވުން މަނާވެގެން ދިއުމުގެ ފުރުސަތުވަނީ ވަރަށް ބޮޑުވެގެން ގޮސްފައެވެ.
ޑަބްލިއުއެޗްއޯގެ ޔޫރަޕްރީޖަންގެ މި ޚާއްސަ ސެޝަންގައި މި ގަރާރު ފާސްކޮށްފައި ވަނީ، ޔޫކުރެއިންއާއި ޔޫރަޕިއަން ޔޫނިއަން ހިމެނޭ ގޮތުން ޖުމްލަ 43 މެމްބަރު ގައުމުގެ ތާއީދާ އެކީއެވެ. ގަރާރާ ދެކޮޅަށް 3 ގައުމަކުން ވޯޓު ދީފައިވާއިރު، އެއްވެސް ކޮޅަކަށް ވޯޓު ނުދީފައިވަނީ އެންމެ ދެގައުމަކުންނެވެ.
މި ސެޝަންގައި ބައިެވެރިވެ ވަޑައިގެންނެވި ރަޝިއާގެ އެންވޯއި ޕްލުޓުނިސްކީ ވިދާޅުވެފައިވަނީ މިގަރާރާ ދެކޮޅު ހައްދަވާފައެވެ. އަދި ވިދާޅުވެފައިވަނީ، މިގަރާރު ފާސްކުރުމަކީ އޭނާ އިންތިހާއަށް ހިތާމަ ކުރައްވާ ކަމެއް ކަމުގައެވެ.
ޑަބްލިއުއެޗްއޯގެ ޔޫރަޕް ރީޖަންގެ މި ޚާއްސަ ބައްދަލުވުމުގައި ފާސްކުރި މި ގަރާރުގައި، ޔޫކުރެއިންއަށް ކުރިމަތިވެފައިވާ ހެލްތު އެމަރޖެންސީއަށް ރިއާޔަތްކޮށް، އެގައުމަށް ރަޝިއާއިން ދެމުންދާ އުދުވާނީ ހަމަލާތައް ކުށްވެރި ކުރުމުގެ އިތުރުން، ބުނެފައިވަނީ، މި ހަމަލާތަކުގެ ސަބަބުން، އެތައް ބަޔަކަށް ބޮޑެތި އަނިޔާތައް ލިބިފައި ވާއިރު، ސިއްޙީ ޚިދުމަތް ފޯރުކޮށްދިމުގައިވެސް ބޮޑެތި ހުރަސްތައް ކުރިމަތިވެފައި ވާކަމުގައެވެ. އަދި ހިތުގެ ބަލިތައް ޖެހުމުގެ ފުރުސަތު އިތުރުވެގެން ދިއުމުގެ އިތުރުން، އިންފެކްޝަސް ބަލިތައް ޖެހުމާއި، ރޭޑިއޮލޮޖިކަލް އަދި ކެމިކަލް އިވެންޓްތައްތައްވެސް ޔޫކުރެއިންގެ އިތުރުން، އެހެނިގެން ސަރަހައްދުތަކަށް ފެތުރިގެން ދިއުމުގެ ނުރައްކާ މިހާރު ކުރިމަތިވެފައިވާކަމަށްވެސް މި ގަރާރުގައި ފާހަގަ ކޮށްފައި ވެއެވެ.
މި ގަރާރުގައި، ޑަބްލިއުއެޗްއޯއިން ރަޝިއާގައި ބާއްވާ ހުރިހާ ބައްދަލުވުންތަކެއްވެސް ސަސްޕެންޑް ކުރުމަށް ވަނީ ގޮވާލާފައެވެ.
