އެންމެ ބޮޑު ބްރިޖު އެޅުމުގައި އުޅުމަށްވުރެ އިޖްތިމާއީ މައްސަލަތައް ހައްލުކުރަން އުޅުން މާ ބުއްދިވެރިވާނެކަމަށް ވިދާޅުވެ ކުރީގެ ފޮރިން މިނިސްތަރ އަދި އދ.ގެ ޚާއްޞަ ރެޕަޓުއަރ ޑރ.އަޙްމަދު ޝަހީދު ފާޑުވިދާޅުވެއްޖެއެވެ. އޭނާ މި ފާޑުކިޔުން ސަރުކާރަށް އަމާޒުކުރެއްވީ މާލޭގައި އެއް އާއިލާއެއްގެ ހަ ކުދިންނަށް ޖިންސީ ގޯނާކުރަމުން ގެންދާ ކަމުގެ ތުހުމަތުކުރެވޭ މައްސަލައެއް ފެންމަތިވުމާއި ގުޅިގެންނެވެ.
ޑރ.ޝަހީދު ވިދާޅުވީ އެންމެ ދިގު ބްރިޖު ނުވަތަ އެންމެ ގިނަ އެއަރޕޯޓް އަޅަން އުޅުމަށްވުރެ ރާއްޖޭގައި ހުރި ގިނަގުނަ އިޖްތިމަޢީ ބަލިމަޑުކަން ހައްލުކުރުން މާ ބުއްދިވެރިކަަމަށެވެ.
ޑރ.ޝަހީދު މިހެން ވިދާޅުވެފައިވާއިރު، ސަރުކާރުން އަންނަނީ ރާއްޖޭގައި ޢުމްރާނީ ގޮތުން ކުރެވޭ އެންމެ ބޮޑު މަސައްކަތްކަމަށްވާ ތިލަމާލެ ބްރިޖުގެ މަސައްކަތް ފެށުމަށް ތައްޔާރުވަމުންނެވެ. އެކަމަށް ބޮޑު ހޭދައެއް ސަރުކާރުން ކުރެއެވެ.
ޑރ.ޝަހީދު އިޖްތިމާޢީ މައްސަލަތަކުގެ ވާހަކަ ފާހަގަކުރައްވާފައިވާއިރު، ރާއްޖޭގައި ކުޑަކުދިންނަށް ޖިންސީ ގޯނާ ކުރުމުގެ ބޮޑެތި ގިނަ މައްސަލަތަކެއް އަންނަނީ ފެންމަތިވަމުންނެވެ. ސަރުކާރުން ވަނީ އެފަދަ މައްސަލަތައް ހައްލުކުރުމަށް މަސައްކަތްކުރަމުން އަންނަކަމަށް ބުނެފައެވެ.
