ކެނޑިޑޭޓުންގެ ބަހުސް ކުރިއަށްގެންދާނެ ގަޑި ކަނޑައަޅާނީ ބަހުސް އިންތިޒާމްކުރާ ފަރާތުންކަމަށް ވިދާޅުވެ، އެމްޑީޕީ ޗެއަރޕާސަން އިންތިޚާބުގައި ވާދަކުރައްވާ އިމްތިޔާޒް ފަހުމީގެ ކެމްޕެއިންގެ ސްޕޯކްސްޕާސަން އުނގޫފާރު ދާއިރާގެ މެންބަރު މުޙައްމަދު ވަޙީދު (ވައްޑެ) ރައްދު ދެއްވައިފިއެވެ.
ވައްޑެ މިފަދައިން ވިދާޅުވީ ފައްޔާޒް އިސްމާޢީލް ބަހުސްގައި ބައިވެރިވެވަޑައިގަންނަވާނެކަމަށާއި، ނަމަވެސް ވާދަވެރި ކެނޑިޑޭޓް އިންތިއަށް ވަގުތު ދެވެން ނެތުމުގެ ސަބަބުން ބަހުސް ކެންސަލް ކުރެވިފައިވާކަމަށް ފައްޔާޒްގެ ކެމްޕެއިން މެނޭޖަރ އިބްރާހީމް ވަހީދު ވިދާޅުވުމާއި ގުޅިގެންނެވެ.
ވައްޑެ ވިދާޅުވީ ގަނޑި ކަނޑައަޅަންވާނީ ހުރިހާ ކެނޑިޑޓުންވެސް އެއްބަސްވާގޮތެއްގެ މަތިންކަމަށެވެ. އެކަން ކުރަންޖެހޭނީ އެއް ކެނޑިޑޭޓެއްގެ ކެމްޕެއިން މެނޭޖަރު ނޫންކަމަށްވެސް ވައްޑެ ވިދާޅުވިއެވެ.
ކެންޑިޑޭޓުންގެ ބަހުސެއްގެ ތާރީޚާއި ގަޑި ކަނޑައަޅާނީ ހުރިހާ ކެންޑިޑޭޓުން އެއްބަސްވާ ގޮތަކަށް، ބަހުސް އިންތިޒާމްކުރާ ފަރާތުން. އެކަން ކުރާނީ އެތަނުން އެއް ކެންޑިޑޭޓުގެ ކެމްޕެއިން މެނޭޖަރެއް ނޫން. https://t.co/0Y06fyUkNe
— Waddey (@waddey_) May 7, 2022
އެމްޑީޕީގެ ޗެއާޕާސަން އިންތިޚާބުގައި ދެކެނޑިޑޭޓުންވެސް އެންމެ ބޮޑަށް އިސްކަންދެނީ އާންމު މެމްބަރުންނާއި ބައްދަލު ކުރުމަށެެވެ. އެގޮތުން ރަށްރަށަށް ގޮސް އާންމު މެމްބަރުންނާއި ބައްދަލުކޮށް ވޯޓު ހޯދުމަށް ގިނަ މަސައްކަތްތަކެއް ދަނީ ކުރަމުންނެވެ.
ދެކެނޑިޑޭޓުންގެވެސް އަޒުމަކީ އިންތިޚާބުގެ ވޯޓުލުމުގެ ކުރިން ރާއްޖޭގެ ހުރިިހާ ރަށެއްގައި ތިބި އެމްޑީޕީގެ އާންމު މެމްބަރުންނާއި ހަމައަށް ގޮސް ކެމްޕެއިން ކުރުމެވެ. މިޓާގެޓަށް ވާސިލްވުމަށް ކުުރިއަށް އޮތީ މަދު ދުވަސްތަކަކަށް ވުމުން ދަތުތައް އިތުރަށް ބާރުބޮޑުވެގެންދާނެ ކަމަށް ބެލެވެއެވެ.
އެމްޑީޕީގެ ޗެއާޕާސަންގެ އިންތިޚާބު ބޭއްވުމަށް ހަމަޖެހިފައިވަނީ މިމަހުގެ 14 ވަނަ ދުވަހުއެވެ.
