ރައީސް ޔާމިން އަމިއްލަފުޅު ޓުވިޓަރ އެކައުންޓެއް ހައްދަވާ، ޕާރސަނަލް ޓުވިޓަރ އެކައުންޓެއް ބޭނުން ކުރައްވަން ފެއްޓެވިތާ 24 ގަޑިއިރު ނުވަނީސް، އެމަނިކުފާނުގެ ފޮލޯވަރުންގެ އަދަދު 5،000 އަށް އަރައިފިއެވެ.
ރައީސް ޔާމީންގެ އަމިއްލަފުޅު ރަސްމީ ޓުވިޓާ އެކައުންޓެއް ބޭނުން ކުރައްވަން ފެއްޓެވިކަން ހާމަކުރެއްވީ ރޭގައެވެ. ރޭގައި އެމަނިކުފާނު ކުރެއްވި ފުރަތަމަ ޓުވީޓުގައި ލިޔުއްވާފައި ވަނީ "ބިސްމި" އެވެ. އަދި އޭގެ ފަހުން ގައުމީ ދިދަ ހިއްސާ ކުރެއްވުމަށް ފަހު އެމަނިކުފާނު ވިދާޅުވީ، ދިވެއްސަކަށް ވީތީ ފަހުރުވެރިވެ ވަޑައިގަންނަވާ ކަމަށް ވިދާޅުވެ ޓުވީޓެއް ކުރައްވާފައެވެ.
ރައީސް ޔާމީން ޓްވީޓާ ބޭނުންކުރައްވަން ފެއްޓެވުމުން އެމަނިކުފާނުގެ އަރިސް ބޭފުޅުންނާއި އިދިކޮޅުން ސަޕޯޓަރުން ގެންދަވަނީ މަރުހަބާ ދަންނަވަމުންނެވެ. ރައީސް ޔާމީންގެ ޓުވިޓާއިން އެމަނިކުފާނު ފްލޯކުރައްވާފައިވަނީ ހަމައެކަނި ޕީޕީއެމްގެ އޮފިޝަލް ޓުވިޓާއެވެ.
އަދި މިއީ މިދަނޑިވަޅުގައި ރައީސް ޔާމީނާއި ވަރަށް ކައިރިން ބައްދަލުވެވޭ ކަމުގެ އިހުސާސް ކުރެވޭ ކަމެއްކަމަށާއި، މިކަމުގެ ސަބަބުން އެމަނިކުފާނުގެ މެސެޖުތައް ވަރަށް ފަސޭހައިން ރައްޔިތުންނާއި ހަމައަށް ލިބިގެންދާނެކަމަށެވެ. ރައީސް ޔާމީނަކީ ވެރިކަން ކުރެއްވި އިރުވެސް ސޯޝަލް މީޑިއާއާއި ދުރު ބޭފުޅެކެވެ. ވެރިކަމުގެ ތެރޭގައި ހިންގެވި އެއްވެސް ތަރައްޤީގެ މަސައްކަތެއް، އަދި ކުރެއްވި އެއްވެސް ކަމެއް އަމިއްލަފުޅަށް ސޯޝަލް މީޑިއާގައި ހިއްސާ ކުރައްވާފައި ނުވެއެވެ.
ރައީސް ޔާމީން ސޯޝަލް މީޑިއާ ބޭނުން ކުރަން ފަށާފައިވަނީ އިދިކޮޅު ކޯލިޝަނުން ރާއްޖޭގެ މިނިވަންކަމުގެ ދިފާއުގައި ބޮޑެތި މަސައްކަތްތަކެއް ކުރަމުންދާ ދަނޑިވަޅެއްގައެވެ. ރާއްޖޭގައި ތިބި އިންޑިއާގެ ސިފައިން ރާއްޖެއިން ފޭބުމަށް ގޮވާލައި އިދިކޮޅުން ވަރުގަދަ ކެމްޕެއިނެއް ހިންގަމުންދާއިރު މިކަމުގައި އިސްކޮށް ހަރަކާތްތެރިވަނީ ރައީސް ޔާމީނެވެ.
