ކުރީގެ ރައީސް މުހައްމަދު ނަޝީދުގެ އެންމެ އަރިސް އެންވަޔަރަމެންޓް މިނިސްޓަރު އައިޝަތު ޝައުނާގެ ތާއީދުވެސް އިކޮނޮމިކް މިނިސްޓަރު ފައްޔާޒު އިސްމާއިލަށް ކުރެއްވުމަށް ނިންމަވައިފިއެވެ.
"ހިންގާލަން" ކެމްޕެއިންގައި އާންމު ކުރަމުންދާ ވީޑިއޯތަކުގެ ތެރެއިން މިނިސްޓަރ ޝައުނާގެ ވީޑިއޯއެއް ވަނީ މިއަދު ހިއްސާކޮށްފައެވެ. މި ވީޑިއޯ މެސެޖުގައި ޝައުވާ ވިދާޅުވީ، ކުރިއަށް އޮތް 2023 ވަނަ އަހަރުގެ ރިޔާސީ އިންތިޚާބު ކާމިޔާބު ކުރުމަށް ކުރަންޖެހޭ ގިނަ މަސައްކަތްތަކެއް ހުރިކަމަށެވެ. މިކަން ކުރެވޭނީ، ޗެއާޕާސަންގެ މަޤާމަށް މިނިސްޓަރ ފަޔާ އިންތިޚާބު ކޮށްގެންކަމަށެވެ.
ޝައުނާ ވިދާޅުވި ގޮތުގައި, އޭނާ އާއި ފައްޔާޒު އެއްބަސްވާ ކަންކަން ވަރަށް މަދުވާނެ ކަމަށާއި ގިނަ ވާނީ ދެބަސްވާ ކަންކަމެވެ. އެހެން ނަމަވެސް, ޝައުނާ ވިދާޅުވި ގޮތުގައި ދެބަސްވެ ޒުވާބުކޮށް ވާހަކަ ބަދަލުކޮށް ކަންކަން ނިންމަދޭ އަދި ކަންކަން ކޮޅެއްގައި ޖައްސާ މީހެއްގެ ގޮތުގައި ފައްޔާޒު ފާހަގަކުރެވޭ ކަމަށެވެ.
2023 ވަނަ އަހަރު އަޅުގަނޑުމެން އިންތިހާބު ކާމިޔާބު ކުރުމަށް ވެސް ކުރަން ވަރަށް ގިނަ މަސައްކަތްތަކެއް އެބަހުރި, ޕާޓީއާއެކު މި ދެންނެވި މަސައްކަތްތައް ވެސް ކުރަން ޖެހޭނީ, އެހެންވީމަ ޖުމްލަކޮށް ބަލާއިރު މި ހުރިހާ ކަމެއް ކުރުމަށް އަޅުގަނޑު ގަބޫލު ކުރާ ގޮތުގައި ޗެއާޕާސަން ކަމަށް އިންތިހާބު ކުރުމަށް އެންމެ މުހިންމީ އަދި މިކަން ކުރެވޭނެ ބޭފުޅަކީ އަޅުގަނޑު ގަބޫލުކުރާ ގޮތުގައި, ފައްޔާ.
– ޝައުނާ ވިދާޅުވިއެވެ.
ޝައުނާގެ އިތުރުން ނަޝީދުގެ އަރިސް ހެލްތު މިނިސްޓަރ ނަސީމްގެ ތާއީދުވެސްވެސް އޮތީ ފަޔާއަށެވެ. ފިނޭންސް މިނިސްޓަރު އިބްރާހިމް އަމީރު, ފައްޔާޒުގެ ކެމްޕެއިންގައި އިސްކޮށް އުޅުއްވައެވެ. މިއިންތިޚާބުގެ ކެމްޕެއިންގެ ފޯރި ގަދަވެފައިވާއިރު، ސަރުކާރުގެ ތެރޭގެ އެކި މަޤާމުތަކުގައި ތިއްބެވި އެމްޑީޕީގެ ގިނަ ބޭފުޅުންގެ ތާއީދު އޮތީ ފައްޔާޒުއަށެވެ.
