ތަރައްގީ އަކީ އުސް އިމާރާތާއި، ކޮންކްރިޓް ބްރިޖެއް ނޫން ކަމަށާއި، ތަރައްޤީއަކީ މަސައްކަތްތެރިންނާއި، އާންމު ނިކަމެތި މީހާގެ ޖީބަށް ވަންނަ ފައިސާ ކަމުގައި ރައްޔިތުންގެ މަޖިލީހުގެ ކުޅުދުއްފުށި އުތުރު ދާއިރާގެ މެމްބަރު ޔާސިރު ޢަބްދުއްލަޠީފް ވިދާޅުވެއްޖެއެވެ.

އެމްޑީޕީ ޗެއާޕާސަން އިންތިޚާބުގެ ކެމްޕެއިންގައި ކުޅުދުއްފުށީގެ ގިނަ އަދަދެއްގެ އާންމު މެމްބަރުންނާއިއެކު ބޭއްވި ބައްދަަލުވުމުގައި ވާހަކަ ދައްކަވަމުން ޔާސިރު ވިދާޅުވީ މިސަރުކާރުން ދިވެހި ރައްޔިތުން އެދޭ ތަރައްޤީ ހާސިލް ކޮށްދެއްވަމުންދާކަމަށެވެ. ރައްޔިތުން ބޭނުންވަނީ އާންމު މީހާއަށް އަންނަ ތަރައްޤީ ކަމަށާއި، އެކަން ކިތަންމެހާވެސް ރަނގަޅަށް ސަރުކާރުން ކޮށްދެމުންދާކަމަށެވެ.

ވަކިވަކި ކަންމުގެ ތެރެއިން ދާދިފަހުން ޓީޗަރުންގެ މުސާރައަށް ގެނައި ބޮޑު ބަދަލާއި ގުޅިގެން ޔާސިރު ވިދާޅުވީ މިއީ ރައްޔިތުން ބޭނުންވާ ތަރައްޤީކަމަށެވެ. ކުޅުދުއްފުށި ސިޓީގައި 292 ޓީޗަރުން ތިބިއިރު، ބޮޑު މުސާރައާއިއެކު އޭގެ މަންފާ ލިބެނީ އެއާއިލާތަކާއި، ދަރިންނާއި، މުޅި މުޖުތަމައަށް ކަމުގައި ޔާސިރު ވިދާޅުވިއެވެ. ރައްޔިތުން ބޭނުންވާ ތަރައްޤީއަކީ މިއީ ކަމަށާއި، ބޮޑެތި އިމާރާތްތަކާއި، ބްރިޖު އަޅައިގެން ލިބޭނެ ވަކި މޮޅު ތަރައްޤީއެއް ނޯންނާނެކަމަށް ޔާސިރު ވިދާޅުވިއެވެ.

ތަރައްގީ އަކީ އުސް އިމާރާތާއި، ކޮންކްރިޓް ބްރިޖެއް ނޫން. މި ސިޓީގައި އެކަނި 292 ޓީޗަރުން އެބަތިބި، ކިތަށް ދަރިންނަށްތޯ، ކިތަށް ގެއަށް ކިތަށް އާއިލާއަށް ތޯ މި ބޮޑުވި ޓީޗަރުންގެ މުސާރައިގެ ސަބަބުން ދިރިއުޅުން އުޖާލާވެ އާ އުންމީދެއް ލިބިގެން މި ދިޔައީ.

– ޔާސިރު ވިދާޅުވިއެވެ.

ޓީޗަރުންގެ މުސާރައަށް ގެނެސްފައިވާ ބަދަލާއި ގުޅޭގޮތުން މައުލޫމާތު ދިނުމަށް ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ފިނޭންސް މިނިސްޓަރ އިބްރާހިމް އަމީރު ވިދާޅުވީ ޓީޗަރުންގެ ތެރެއިން މުސާރައަށް އެންމެ ބޮޑު ބަދަލެއް އަންނާނީ ރޭންކު 2 ގެ ޓީޗަރުންގެ ކަމަށެވެ. އެގޮތުން މިހާރު 12398 ރުފިޔާގެ މުސާރައެއް ލިބޭ ޓީޗަރުންނަށް މިގެންނަ ބަދަލާއެކު 19467 ރުފިޔާގެ މުސާރައެއް ލިބޭނެ ކަމަށެވެ. މިއީ 50 އިންސައްތަ އިތުރު އަދަދެކެވެ.

އެންމެ ދަށް ރޭންކުގެ ޓީޗަރަށް މުސާރައިގެ ގޮތުގައި ކުރިން 10،889 ރުފިޔާ ލިބޭއިރު، މިހާރު މުސާރަ ވަނީ 22 އިންސައްތައަށް އިތުރުކޮށް، 13266 ރުފިޔާއަށް ބޮޑުވާނެއެވެ. އަދި އެންމެ މަތީ ރޭންކު ކަމުގައިވާ ރޭންކު 5 އިންސައްތައިގެ ޓީޗަރަކަށް މުސާރައިގެ ގޮތުގައި 25958 ރުފިޔާ ލިބޭނެކަމަށް ފިނޭންސް މިނިސްޓަރ ވިދާޅުވިއެވެ.

ކުޅުދުއްފުށީ ޖަލްސާގައި ޔާސިރު ވިދާޅުވީ މިގެންނަ ބަދަލު ތަކާއިއެކު ދެން އޮތް އެންމެ ބޮޑު މަސައްކަތަކީ 2023 އެމްޑީޕީއަށް ކާމިޔާބު ކުރުންކަމަށެވެ. އެކަން ކުރެވޭނީ ފައްޔާޟު ޗެއާޕާސަން ކަމަށް އިންތިޚާބު ކޮށްގެންކަމށް އޭނާ ވިދާޅުވިއެވެ.

އަޅުގަނޑުމެން މިއަދު 2023 ހޯދަން ނިކުމެ މިތިބީ ހަމަ މި ޕާރޓީ އާއެކީ، ޕާރޓީ ހިންގާލާ 2023 ސަރުކާރަށް ހޯދަދެވޭނެ އެންމެ ގާބިލް މީހަކީ ފައްޔާޟު.

– ޔާސިރު ވިދާޅުވިއެވެ.

އެމްޑީޕީގެ ވާދަވެރި ޗެއާޕާސަން އިންތިޚާބު އޮންނާނީ މިމަހުގެ 14 ވަނަ ދުވަހުއެވެ.