ވެރިކަން ކުރާ މައި ޕާޓީ އެމްޑީޕީއަކީ ނަފްރަތުގެ ރަމްޒަކަށް ހަދަން ކުރާ މަސައްކަތަކީ ވަރަށް ވިޔާނުދާ ދަށު ދަރަޖައިގެ ކަމެއްކަމުގައި އެމްޑީޕީގެ ޗެއާޕާސަންގެ މަޤާމަށް ވާދަ ކުރައްވާ އިކޮނޮމިކް މިނިސްޓާރ ފައްޔާޟު އިސްމާއިލް ވިދާޅުވެއްޖެއެވެ.
މިމަހުގެ 14 ވަނަ ދުވަހު ބޭއްވުމަށް ހަމަޖެހިފައިވާ އެމްޑީޕީގެ ޗެއާޕާސަން އިންތިޚާބުގައި ހދ.ކުޅުދުއްފުއްޓަށް ވަޑައިގެން އެރަށުގެ އެމްޑީޕީ މެމްބަރުންނާއި ވާހަކަ ދައްކަވަމުން ފައްޔާޟު ވިދާޅުވީ އެމްޑީޕީގެ ތެރޭގައި ކެމްޕެއިން ކުރުމުގެ ރީތި އާދަތައް އޮންނަން ޖެހޭކަމަށެވެ. ކެމްޕެއިން ކުރާއިރު، ބައިބައިވުމާއި، ފިތުނައަށް ޖާގަދީ "ނަފްރަތު" އުފައްފާ ތަނަކަށް އެމްޑީޕީ ވެގެން ނުވާނެކަމަށް ފައްޔާޟު ވިދާޅުވިއެވެ.
އަޅުގަނޑުމެން ކަންބޮޑުވޭ މި ޕާޓީއަކީ ނަފްރަތުގެ ރަމްޒަކަށް ހަދަން މަސައްކަތް ކުރާތީ. ކެމްޕެއިން ކުރަން ޖެހޭނީ ނަފްރަތު އުފައްދައިގެނެއް ނޫން. ހަމަ ވަރަށް ރީތިކޮށް ދެ ފަރާތުންވެސް ކެމްޕެއިން ކޮށްލަން ޖެހޭނީ.
– ފައްޔާޟު ވިދާޅުވިއެވެ.
ފައްޔާޟު ވިދާޅުވީ އެމްޑީޕީން މަސައްކަތް ކުރަންޖެހޭނީ ނަފްރަތާއި ދުރުން އެކަތި ގަނޑެއްގެ ގޮތުގައި ކަމަށެވެ. އެމްޑީޕީއަށް އޮތް އެންމެ ބޮޑު ޗެލެންޖަކީ ކުރިއަށް އޮތް ރިޔާސީ އިންތިޚާބު ކަމަށާއި، އެއިންތިޚާބު ކާމިޔާބު ނުވާނޭ ގޮތަކަށް މަސައްކަތް ކުރުމަކީ ބަލައި ގަނެވޭނެ ކަމެއް ނޫންކަމަށެވެ. މިހާތަނަށް ދެވުނު 145 ރަށުންވެސް ފެނުނީ އެމްޑީޕީގެ ހަރަކާތެއް ނުހިނގައި މަޑުމަޑުން އޮތް ތަން ކަމަށާއި، އެމްޑީޕީ ހިންގާލަންޖެހޭކަމަށް ފައްޔާޟު ވިދާޅުވިއެވެ.
145 ރަށަށް ދެވުނުއިރު މަދު ރަށެެއް ފިޔަވާ އެއްވެސް ރަށެއްގައި ޕާރޓީގެ ހަރަކާތެއް ނުހިނގާ، އަޅުގަނޑުމެން މި ނިކުތީ ހުއްޓިފައިހުރި ޖަގަހަ ތަކާއި ހަރަކާތްތަށް ހިންގާލަން 2023 ބޭނުން ވާ ކަމުގައި ވަނީނަމަ ހުރި ދެބަސް ވުން ތަށް އެެއްފަރާތްކޮށް އެންމެން އެކަތި ގަޑެެއްގެ ގޮތުގައި މަސައްކަތް ކުރަން ޖެހޭ.
– ފަޔާ ވިދާޅުވިއެވެ.
މިއިންތިޚާބަކީ އެއްކެނޑިޑޭޓަކު އަނެއް ކެނޑިޑޭޓަކަށް ނަފްރަތު އުފައްދައިގެން ކާމިޔާބު ލިބޭނެ އިންތިޚާބެއް ނޫންކަން ފާހަގަކޮށް ފައްޔާޟު ވިދާޅުވީ، އޭނާ މަސައްކަތް ކުރާނީ ޕާޓީއަށް 2023 ކާމިޔާބު ކުރުމަށް ކަމަށެވެ. އަދި މިވަގުތު އޭނާ ހުންނެވީ ސަރުކާރުގައި ކަމަށްވުމުން އާންމު މެމްބަރުން ބޭނުންވާ ކަންކަން ފަސޭހައިން ކޮށްދެވޭނެ މަގު ތަނަވަސް ވާނެކަމަށް ވިދާޅުވިއެވެ.
އެެއްގޮތަކަށްވެސް ވާދަވެރި ކެންޑިޑޭޓް. ގޯސް ކޮށް ދަށް ކުރަނީ އެއް ނޫން، މިއުޅެނީ މި ޕާރޓީ ހިންގާލަން، ހިންގުމުގެ ދާއިރާއިން އަޅުގަނޑު މާ ގަދަ ވާނެ. އަޅުގަނޑަކީ މިވަގުތު ސަރުކާރުގައި ހުރި މީހަކަށް ވާތީ، މެމްބަރުންގެ ހުރި ކަންބޮޑުވުންތަކާއި ޝަކުވާތަށް ސަރުކާރުތެރެއިން ހައްލު ކޮށް ބޭނުންވާ ފަރުވާ ހޯދަދެވޭނެ މީހަކީ އަޅުގަނޑު، އަޅުގަނޑަށް އެކަން ކުރެވޭނެ.
– ފައްޔާޟު ވިދާޅުވިއެވެ.
ވާދަވެރިކަން ބޮޑުވެފައިވާ އެމްޑީޕީގެ ޗެއާޕާސަން އިންތިޚާބުގައި ބޮޑު ތިލަދުންމަތިން ފަޔާގެ ޓީމަށް ވަނީ ވަރަށް ހޫނު މަރުހަބާއެއް ކިޔާފައެވެ. ބޮޑު ތިލަދުންމަތީގެ މަޖިލިސް މެމްބަރުންނާއި، ސިޓީ ކައުންސިލް މޭޔަރުވެސް ތާއީދު ކުރައްވަނީ ފައްޔާޟުއަށެވެ.
