އެމްޑީޕީގެ ޗެއާޕާސަން އިންތިޚާބާއި ގުޅިގެން ގުޅުން ވަރަށް ބޮޑަށް ގޯސްވެފައިވާ، ރައީސް ޞާލިހާއި އޮތް ގުޅުން އަދިވެސް ވާހަކަ ދައްކައިގެން ހައްލު ކުރެވޭނެކަމަށް ގަބޫލު ކުރައްވާކަމަށް އެމްޑީޕީގެ ރައީސް އަދި ރައީސް ޞާލިހުގެ ޒަމާންވީ އެކުވެރިޔާ ރައީސް ނަޝީދު ވިދާޅުވެއްޖެއެވެ.
އަންނަ މަހުގެ 14 ވަނަ ދުވަހު ބޭއްވުމަށް ހަމަޖެހިފައިވާ އެމްޑީޕީގެ އެތެރޭގެ އިންތިހާބުގެ ފޯރި ގަދަވަމުން އަންނައިރު، އެމްޑީޕީގެ ތެރޭގައި ދެ ފެކްޝަނެއް އުފެދި ޕާޓީ ވަނީ ވަރަށް ބޮޑަށް ބައިބައި ވެފައެވެ. އެމްޑީޕީގެ ޗެއާޕާސަން ހޮވުމަށް ބާއްވާ މި އިންތިހާބުގައި ނަޝީދުގެ ތާއީދު އޮތީ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ (އިންތި)އަށެވެ. އަދި ރައީސް ޞާލިހުގެ ތާއީދު އޮތީ އިކޮނޮމިކް މިނިސްޓަރ ފައްޔާޒް އިސްމާއިލްއެވެ.
އިންޑިއާގެ ދޫރުދަރުޝަން ޗެނަލަށް ދެއްވި އިންޓަވިއު އެއްގައި ރައީސް ނަޝީދު ވިދާޅުވީ އެމަނިކުފާނާއި ރައީސުލްޖުމްހޫރިއްޔާ އިބްރާހިމް މުހައްމަދު ސާލިހް ވެސް ވަކި ބޭފުޅަކަށް ތާއިދުުކުރައްވާކަން ހާމަކޮށްފައި ނުވާނެ ކަމަށާއި ނަމަވެސް ދެބޭފުޅުންގެ ވެސް ވިސްނުމާ ތާއިދު ހުރި ގޮތް ވަރަށް ސާފް ކަމަށެވެ.
ރައީސް އިބްރާހިމް މުހައްމަދު ސޯލިހާއި ނަޝީދާ ދެމެދު އުފެދިފައިވާ ދެބަސްވުންތަކާ ގުޅޭ ގޮތުން އެ އިންޓަވިއުގައި ސުވާލުކުރެއްވުމުން ނަޝީދު ވިދާޅުވީ އެމަނިކުފާނާއި ރައީސް ވެސް ބޭނުންފުޅު ވަނީ ގައުމަށް އެންމެ ރަނގަޅު ގޮތް ކަމަށް ގަބޫލުކުރައްވާ ކަމަށެވެ. އެ ބޭފުޅުންގެ މެދުގައި ވާހަކަފުޅު ދައްކަވައިގެން ހައްލުނުވާނެ ވަރުގެ ކަމެއް އަދި ނެތް ކަމަށް ނަޝީދު ވިދާޅުވެއެވެ.
ރީތި ގޮތުގައި މައްސަލަތައް ހައްލުނުކުރެވޭނެ ކަމަށް އަޅުގަނޑު ގަބޫލެއް ނުކުރަން. އަޅުގަނޑު ގަބޫލުކުރަނީ ވާހަކަ ދައްކައިގެން ހައްލުކުރެވޭނެ ކަމަށް.
– ނަޝީދު ވިދާޅުވިއެވެ.
ނަޝީދު ވަނީ މިއިންޓަރވިއުގައި އެމްޑީގެ ތެރޭގައި އޮތް ކޯޅުން ބޮޑުވި ނަމަވެސް އަދިވެސް އެކަތި ގަނޑަކަށް ވެވޭނެ ކަމަށް ވިދާޅުވެފައެވެ. ނަޝީދު ވިދާޅުވީ އެންމެ ބޮޑަށް ޚިޔާލު ތަފާތުވީ ވެރިކަމަށް ވަޑައިގެންނެވިއިރުވެސް ވެފައިވާ ވައުދުތަކުގެ ތެރެއިން ކުރީގެ ވެރިކަމުގެ ކޮރަޕްޝަން ނުބެލުންކަމަށެވެ. މިހާރުވެސް އެކަން އެންމެ ރަނގަޅަށް ބެލި ތަހުގީގް ކުރެވެމުން ނުދާކަމަށް ނަޝީދު ވިދާޅުވިއެވެ.
ނަޝީދު ވަނީ މިއިންތިޚާބުގެ ކެމްޕެއިންގައި މިސަރުކާރުން ވެފައިވާ ވައުދުތައް ނުފެއްދާކަމަށް ތަކުރާރުކޮށް ވިދާޅުވެފައެވެ. އަދި ރައީސް ޞާލިހާއިއެކު ސިޔާސީ ގޮތުން މަސައްކަތް ކުރައްވަަން ދެން ބޭނުން ނުވާކަމަށްވެސް ވިދާޅުވެފައެވެ.
