މަސްތުވާތަކެތީގެ ވިޔަފާރިކުރާކަމުގެ ތުހުމަތުގައި ހުޅުމާލެ ހިޔާ ފްލެޓެއް ބަލައި ފާސްކުރުމުން ގިނަ ޢަދަދެއްގެ މަސްތުވާތަކެއްޗާއި ފައިސާ ފެނުނު މައްސަލާގައި ފަސް މީހަކު ހައްޔަރުކޮށްފިއެވެ. މި މައްސަލާގައި ހައްޔަރުކުރި މީހުންގެ ބަންދަށް ކްރިމިނަލް ކޯޓުން ވަނީ 15 ދުވަސް ޖަހައިދީފައެވެ.
މި މައްސަލާގައި ހައްޔަރުކުކޮށްފައިވަނީ 19 އަހަރާއި 26 އަހަރާއި ދެމެދުގެ މީހުންނެވެ. އެމީހުންގެ މައްޗަށް ތުހުމަތުކޮށްފައިވަނީ، މަސްތުވާތަކެތިި ބޭނުންކޮށް، އެތަކެތީގެ ވިޔަފާރިކުރާކަމުގެ ތުހުމަތެވެ.
މި މައްސަލާގައި ފުލުހުން ވަނީ ކޯޓަށް ހެކި ހުށައަޅާފައެވެ. ފުލުހުން ހެކީގެ ގޮތުގައި ހުށައަލާފައިވާ ތަކެތީގެ ތެރޭގައި އެ ފްލެޓްގެ ސިޓިންރޫމްގައި ހުރި ޓީވީ ރެކުގެ ތެރެއިން ފެނުނު މަސްތުވާތަކެތިކަމަށް ޝައްކުކުރެވޭ އެއްޗެހި ހުރި ހަ ރަބަރު ޕެކެޓާއި، ސޯފާއާއި، އެ އެޕާޓްމަންޓްގެ ދެ ކޮޓަރި ބަލައި ފާސްކުރުމުން ހާމަކަން ބޮޑު ގޮތެއްގައިގިނަ އަދަދެއްގެ ފައިސާ ހުރި ކަމަށްވެސް ފުލުހުން ވިދާޅުވެފައިވެއެވެ.
އެ އެޕާޓްމަންޓް ބަލައި ފާސްކުރުމުން 50،300 ރުފިޔާ ފެނިފައިވެއެވެ. އަދި މަސްތުވާތަކެތި ބަންދުކުރުމަށް ބޭނުންވާ އާލާތްތައްވެސް ފެނުނުކަމަށް ފުލުހުން ވިދާޅުވިއެވެ.
މި މައްސަލާގައި ހައްޔަރުކުރި ފަސް މީހުންގެ ތެރޭގައި މަސްތުވާތަކެތި ބޭނުންކޮށް ރިހިބިލިޓޭޝަން ސެންޓަރުން ފަރުވާހޯދާފައިވާ މީހަކުވެސް ހިމެނެއެވެ. މި މައްސަލާގައި ހައްޔަރުކުރި ބައެއް މީހުން ވަނީ މަސްތުވާތަކެތި ބޭނުންކުރާކަމަށް އެއްބަސްވެފައެވެ.
