އިނގިރޭސި ޕްރިމިއާ ލީގުގައި ރޭ ކްރިސްޓިއާނޯ ރޮނާލްޑޯ ޖެހި ގޯލުން 1-1 އިން އެއްވަރުކޮށް، މެންޗެސްޓާ ޔުނައިޓެޑް އަމިއްލަ ދަނޑުގައި ޗެލްސީ އަތުން ބަލިނުވެ ސަލާމަތްވެއްޖެއެވެ.
މި މެޗަށް ނުކުތްއިރު ޔުނައިޓެޑް އެންމެ ފަހުން ކުޅުނު ދެ މެޗުން ވަނީ ލިވަޕޫލާއި އާސެނަލް އަތުން ބަލިވެފައެވެ. ރޭ، ޗެލްސީން ލީޑުނެގި ނަމަވެސް ރޮނާލްޑޯ ވަނީ ގޯލެއް ޖަހައި، ނަތީޖާ ހަމަހަމަކޮށްދީފައެވެ. އެކަމަކު، މި ނަތީޖާއާ އެކު ޔުނައިޓެޑުން ގަދަ ހަތަރެއްގައި ނިންމަން އޮތް ފުރުސަތު އިތުރަށް ވަނީ ކުޑަވެފައެވެ. އެންމެ ފަހުން ހުރިހާ މުބާރާތެއްގައި ޔުނައިޓެޑް ކުޅުނު ހަ މެޗުގެ ތެރެއިން މޮޅުވީ އެންމެ މެޗަކުންނެވެ.
މެޗުގައި ފުރަތަމަ ލަނޑު ޖަހާ ލީޑު ނަގާފައިވަނީ ޗެލްސީންނެވެ. މި ލަނޑު 60 ވަނަ މިނެޓުގައި އެޓީމަށް ކާމިޔާބުކޮށްދީފައިވަނީ މާކޮސް އެލެންސޯއެވެ. ނަމަވެސް އޭގެ ދެ މިނެޓު ފަހުން ރޮނާލްޑޯ ވަނީ ޔުނައިޓެޑަށް ނަތީޖާ ހަމަހަމަކޮށްދީފައެވެ.
މި ލަނޑުތަކަށްފަހު، ދެޓީމުންވެސް ފަހު 10 މިނެޓުގައި ބަދަލުތައް ގެނެސްފައިވާއިރު، އެ ބަދަލުތަކާއެކު ދެޓީމުވެސް ފެނިގެންދިޔައީ އިތުރަށް ވަރުގަދަކޮށެވެ. ނަމަވެސް ދެޓީމަށްވެސް ލީޑު ނެގުމަށް ލިބުނު ފުރުސަތުތައް ލަނޑަކަށް ބަދަލުކޮށްލެވޭ ގޮތް ވަނީ ނުވެފައެވެ.
މި ނަތީޖާއާއެކު ޔުނައިޓެޑަށް 35 މެޗުން 55 ޕޮއިންޓް ލިބިފައިވާއިރު، އެޓީމު އޮތީ ހަވަނައިގައެވެ. އަދި ޔުނައިޓެޑަށް ލީގުގައި ބާކީ އޮތް ތިން މެޗުން މޮޅުވެގެންވެސް ގަދަ ހަތަރަކުން ފުރުސަތު ނުލިބޭނެކަން މިހާރު ވަނީ ކަށަވަރުވެފައެވެ.
ލީގުގެ ގަދަ ހަތަރަކަށް މިހާރު ވާދަކުރަނީ 60 ޕޮއިންޓާއެކު ހަތަރު ވަނައިގައި އޮތް އާސެނަލްގެ އިތުރުން 58 ޕޮއިންޓާއެކު ފަސް ވަނައިގައި 58 ޕޮއިންޓާއެކު އޮތް ޓޮޓެންހަމް ހޮޓްސްޕާއެވެ. އެ ދެޓީމަށްވެސް ލީގުގައި ބާކީ އަދި ފަސް މެޗު އެބައޮތެވެ.
