ށ. ނަރުދޫ ބަނދަރު ތަރައްޤީ ކުރުމުގެ މަޝްރޫޢު ސަރުކާރުން އެމްޓީސީސީއާއި ހަވާލުކޮށްފިއެވެ.
މި މަޝްރޫޢު ޙަވާލުކުރުމަށް ބޭއްވި ރަސްމިއްޔާތުގައި، އެމްޓީސީސީގެ ފަރާތުން ސޮއިކުރެއްވީ ޗީފް އެގްޒެކެޓިވް އޮފިސަރ އާދަމް އާޒިމްއެވެ. އަދި މިނިސްޓްރީގެ ފަރާތުން ސޮއިކުރެއްވީ ޕާރމަނަންޓް ސެކްރެޓަރީ ޒީނިޔާ އަޙުމަދު ޙަމީދެވެ. މި މަޝްރޫޢުގެ ދަށުން، ށ. ނަރުދޫ ބަނދަރުގައި ޓީ -ޖެޓީއެއް ތަރައްޤީކޮށް ބަނދަރުގެ ޖާގަ މިހާރަށްވުރެ ދެގުނަ ބޮޑުކުރެވިގެން ދާނެއެވެ.
މިގޮތުން މި މަޝްރޫޢު ނިމޭއިރު ބަނދަރުގެ ޖުމްލަ ދިގުމިނުގައި 786 ފޫޓު ހުންނާނެއެވެ. މި މަޝްރޫޢުގެ ތެރޭގައި ޖުމްލަ 210 މީޓަރުގެ އެއްގަމުތޮށި ތަރައްޤީކުރުމާއި، ލޭންޑިންގ ކްރާފްޓް ފަދަ އުޅަނދުފަހަރު ކައިރިކުރުމަށް ރޭމްޕް ތަރައްޤީކުރުމާއި، އަދި ހަމަމިއާއެކު ބަނދަރު ބޭނުންކުރާ އުޅަނދުފަހަރު ވާ އެއްސުމަށް ބޮއި ހަރުކުރުމުގެ އިތުރުން ބަނދަރު ދިއްލުން ވަނީ ހިމެނިފައެވެ.
މި މަޝްރޫޢު ނިމިގެންދާއިރު މިހާރު ބޭނުންކުރަމުން އަންނަ ނެރު ބަދަލުކުރެވިގެން ދާނެއެވެ. މިގޮތުން ނެރުގެ ދެފަރާތުގައި ބޮޑުހިލައިން ފައިކަށިލުމާއި، 371 މީޓަރު ދިގުމިނުގައި ކަނޑުތޮށި ލުމަށް މިކުންފުންޏާއި ހަވާލުކޮށްފައިވެއެވެ. އަދި ބަނދަރު ކޮނެގެން ނެގޭ ވެލި އެޅުމަށްފަހު 205 މީޓަރު ސަރަޙައްދެއްގައި ރިވެޓްމެންޓް ޖަހައި އެސަރަޙައްދު ހިމާޔަތް ކުރުންވެސް މި މަޝްރޫޢުގެ ތެރޭގައި ހިމެނިފައިވެއެވެ. މިއީ 92.602،829،43 މިލިއަން ރުފިޔާ އަށް 365 ދުވަސް ތެރޭގައި ނިންމުމަށް ހަމަޖެހިފައިވާ މަޝްރޫއެކެވެ.
ވޭތުވެދިޔަ 3 އަހަރުތެރޭ އެމްޓީސީސީން ވަނީ ބަނދަރު ހެދުމާއި، ބިން ހިއްކުމާއި އަދި ގޮނޑުދޮށް ހިމާޔަތްކުރުމުގެ ގިނަ މަޝްރޫޢުތަކެއް ނިންމާފައެވެ. 1980 ވަނަ އަހަރު އެމްޓީސީސީ އުފެދުނީ ރާއްޖޭގެ ތަރައްޤީގެ ދަތުރުގެ މުހިއްމު މަރުޙަލާއެއްގައެވެ. ކުންފުނި އުފެދުނީއްސުރެ ރާއްޖޭގެ ޢުމްރާނީ ތަރައްޤީ އާއި އިޖުތިމާޢީ ވަޞީލަތްތައް ބިނާކުރުމުގައި އެމްޓީސީސީން ވަނީ މުހިއްމު ދައުރެއް އަދާކޮށްފައެވެ.
