ވެރިކަން ކުރާ އެމްޑީޕީގައި ބޭއްވޭ އިންތިޚާބުތަކަށް، ހުޅުވާލެވޭ ޕްރައިމަރީއެއްގައި ވާދަކުރުމުގެ ފުރުސަތު އެމްޑީޕީގެ ކޮންމެ މެމްބަރަކަށްވެސް ލިބިގެންވާކަމަށް ރައްޔިތުންގެ މަޖިލީހުގެ ކޮމަންޑޫ ދާއިރާގެ މެމްބަރު މުހައްމަދު ރާޝިދު ވިދާޅުވެއްޖެއެވެ.
ރާޝިދު މިހެން ވިދާޅުވީ ކުރިއަށް އޮތް 2023ގެ އެމްޑީޕީގެ ރިޔާސީ ޓިކެޓަށް ރައީސް ނަޝީދު ވާދަ ކުރައްވާނެކަން މަޖިލިސް ނައިބް ރައީސް އީވާ އިއުލާން ކުރެއްވިތާ އިރުކޮޅެއްގެ ތެރޭގައި ކުރެއްވި ޓުވީޓެއްގައެވެ. އެމްޑީޕީގެ ޗެއާޕާސަން އިންތިޚާބުގައި، ރޭ ކުޅުދުއްފުށީގައި ބޭއްވި މާހެފުމެއްގައި ބައިވެރިވި މީހުންނާއި މުޚާތަބުކޮށް ވާހަކަ ދައްކަވަމުން، އީވާ ވިދާޅުވީ 2023ގެ ރިޔާސީ އިންތިޚާބުގައި ރައީސް ނަޝީދު ވާދަ ކުރައްވާނެކަމަށެވެ. އެމަނިކުފާނު ވާދަ ކުރައްވާނީ އެމްޑީޕީގެ ތެރޭގައި އޮންނަ ޕްރައިމަރީގައި ވާދަކޮށް، އެޕްރައިމަރީ ކާމިޔާބު ކޮށްގެންކަމަށް އީވާ ވިދާޅުވިއެވެ.
އީވާގެ މިވާހަތަކާއި ގުޅިގެން ރާޝިދު ވިދާޅުވީ، އެމްޑީޕީގެ ކޮންމެ އިންތިޚާބެއްގައިވެސް ޕްރައިމަރީއަކަށް ހުޅުވާލައިފިނަމަ ޕްރައިމަރީގައި ވާދަ ކުރުރުމުގެ ފުރުސަތު ކޮންމެ އެމްޑީޕީ މެމްބަރަކަށް ލިބިގެންވާކަމަށެވެ.
އެމްޑީޕީ ކޮންމެ ޕްރައިމަރީއެއްގައިވެސް ވާދަކުރުމުގެ ފުރިހަމަ ހައްގު އެމްޑީޕީ އާންމު ކޮންމެ މެމްބަރަކަށްވެސް ލިބިގެންވޭ.
– ރާޝިދު ވިދާޅުވިއެވެ.
ރިޔާސީ އިންތިޚާބުގައި ވާދަކުރެއްވުމާއިމެދު ރައީސް ނަޝީދުވެސް އަދި ރައީސް ޞާލިހުވެސް ސީދާ ވަކި ގޮތެއް އަދި ނިންމަވާފައި ނުވެއެވެ. އިންތިޚާބުގައި އެމްޑީޕީގެ ޓިކެޓްގައި ވާދަކުރައްވާނެ ބޭފުޅަކު ކަނޑައެޅިގެންދާނީ އެމްޑީޕީގެ ތެރޭގައި ބާއްވާ ޕްރައިމަރީ އަކުންނެވެ. ނަމަވެސް ޕްރައިމަރީއަކާއި ނުލައި ރައީސް ޞާލިހަށް އިތުރު ދައުރަކަށް ޓިކެޓް ދޭންޖެހޭކަމަށް އެމްޑީޕީގެ ބައެއް ބޭފުޅުން ގެންދަނީ ވިދާޅުވަމުންނެވެ.
ރައީސް ނަޝީދާއި ރައީސް ޞާލިހުގެ ވާދަވެރިކަން ބޮޑުވެފައިވަނީ އަންނަ މަހު ބާއްވާ އެމްޑީޕީގެ ޗެއާޕާސަން އިންތިޚާބާއި ހަމައިންނެވެ. މިއިންތިޚާބުގައި ފައްޔާޟާއި، އިންތި ވާދަ ކުރި ނަމަވެސް މިއީ ރައީސް ނަޝީދާއި، ރައީސް ޞާލިހުގެ މެދުގައި އޮތް ރިޔާސީ ވާދަވެރިކަމުގެ އިންތިޚާބު ކަމަށް ގިނަ ބަޔަކު ދެކެއެވެ. އަދި މިއިންތިޚާބު ކާމިޔާބު ކުރާ ބޭފުޅެއްގެ ފަހަތުގައި ހުރި ލީޑަރަކަށް އެމްޑީޕީގެ ރިޔާސީ ޓިކެޓް ލިބޭނެކަމަށް ގިނަ ބަޔަކު ގަބޫލު ކުރެއެވެ.
