ރަޝިއާއިން ޔޫކުރެއިންއާއި ދެކޮޅަށް ކުރަމުންދާ ހަނގުރާމާގައި، މިހާރު ހިފާފައިވާ ސަރަހައްދުތަކުގައި، ރަޝިއާއިން ބޭނުންވާގޮތަށް ބާއްވާ ޚިޔާލު ހޯދުންތަކުގެ ވޯޓަކަށްފަހު، އެ ސިޓީތަކުގައި ރަޝިއާގެ ގޮނޑިކޮއްކޮ ސަރުކާރުތަކެއް އުފައްދައިފިނަމަ، ރަޝިއާއާއެކު ބާއްވަމުންދާ ސުލްހައިގެ ވާހަކަތައް ހުއްޓުމަކަށް ގެންނާނޭކަމުގެ އިންޒާރު، ޔޫކުރެއިންގެ ރައީސް ޒެލެންސްކީ ދެއްވައިފިއެވެ.
ޔޫކުރެއިންގެ ރައީސް ޒެލެންސްކީ މިހެން ވިދާޅުވެފައިވަނީ، ޔޫކުރެއިންގެ ވެރިރަށް ކީވްގެ ސަބްވޭ ސްޓޭޝަނެއްގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުންނެވެ.
"މަރިއޮޕޯލްގައި އަހަރެމެންގެ ރައްޔިތުން މަރާ، އަދި ދެކުނު ސިޓީއެއްކަމުގައިވާ ޚާސަންގައި ގޮނޑިކޮއްކޮ ރެފެރަންޑަމެއް ބާއްވައިފިނަނަ، ކުރިޔަށްދާ ސުލްހައިގެ ވާހަކަތަކުން ޔޫކުރެއިން ބޭރުވާނަން،" ޒެލެންސްކީ ވިދާޅުވެފައި ވެއެވެ.
ޒެލެންސްކީ ވިދާޅުވިގޮތުގައި، ރަޝިއާއިން މިހާރު ވަށާލާފައިވާ، މަރިއޮޕޯލް ދިފާޢު ކުރަމުންދިޔަ ސިފައިންގެ ފުރާނަ ސަލާމަތް ކުރުމަށްޓަކާ، އޭނާ ހުންނެވީ ކޮންމެ ގޮތަކަށްވެސް މަސައްކަތް ކުރައްވަން ތައްޔާރަށެވެ.
ޒެލެންސްކީ ވިދާޅުވިގޮތުގައި، ނޫސްވެރިންގެ ބައްދަލުވުމުގެ އެއް ގަޑިއިރު ކުރިން، މަރިއޮޕޯލްގައި ތިބި ޔޫކުރެއިން ސިފައިނާ އޭނާއަށް ގުޅުއްވުނު ކަމަށާއި، ރަޝިއާއިން މާރޗްމަހު އެސިޓީ ހިއްސޯރުކުރިފަހުން ސިޓީގެ ދިފާއިގައި ހަނގުރާމަ ކުރަމުންދާ ސިފައިންނަށް ކުރިމަތިލާން ޖެހުނު އެންމެ ދަތި ދުވަހަކީ މިއަދު ކަމުގައެވެ.
ޔޫކުރެއިންގެ އޮފިޝަލުން ވިދާޅުވެފައިވަނީ، ރަޝިއާއިން މިސިޓީއަށް ދީފައިވާ ހަމަލާތަކުގައި، އެ ސިޓީގެ 20،000 ރައްޔިތުން މަރުވެފައިވާކަމަށް ވަނީ ބެލެވިފައެވެ. 450،000 މީހުންގެ އާބާދީއެއް އޮތް މިސިޓީގެ އިމާރާތްތަކުގެ ބޮޑުބައެއް ފުނޑުފުނޑުވެފައިވާއިރު، ސިޓީ ދޫނުކޮށް މިހާރު ތިބީ 100،000 އެއްހާ މީހުންނެވެ.
