ރަޝިއާއިން އެގައުމުގެ އަސްކަރިއްޔާގެ ބާރުގެދަށަށް ގެނެސްފައިވާ، ޔޫކުރެއިންގެ ޕޯޓު ސިޓީއެއް ކަމުގައިވާ މަރިއޮޕޯލްގެ ރަށްބޭރުގައި ބޮޑެތި ކަށްވަޅުތައް ހުރިކަމުގެ ހެކިތައް ސެޓްލައިޓްތަކުން ފެންނާން ހުރި ކަމުގައި އެމެރިކާގެ ސެޓްލައިޓް ފާރމަކުން ބުނެފިއެވެ.

މަރިއޮޕޯލް ހިފުމަށްޓަކާ ރަޝިއާއިން އެސިޓީއަށް ހަމަލާދެމުންދާތާ މިހާރުވަނީ އެތައް ހަފްތާތަކެއް ފާއިތުވެގެން ގޮސްފައެވެ. އަދި ރަޝިއާއިން މިސިޓީން މިހާރު އެގައުމުގެ އަސްކަރިއްޔާގެ ބާރުގެދަށް ގެންދެވިފައިވާ ކަމަކަށް ބުނަމުން އައިނަމަވެސް، އެމަރިކާއިން ބުނަނީ، ރަޝިއާގެ ވާހަކަތައް މުޅިން ސައްޙަ ނޫންކަމުގައެވެ.

އެމެރިކާގެ ސެޓްލައިޓް ފާރމެއް ކަމުގައިވާ، މަސާރއިން ބުނެފައިވަނީ، ސެޓްލައިޓް ފޮޓޯތަކުން ފެންނާންހުރި ގޮތުގައި، މާރޗްމަހުގެ ފަހުކޮޅު ފެނިފައިވާ ކަށްވަޅުތައް މިހާރުވަނީ ބޮޑު ސަރަހައްދަކަށް ފެތުރިގެން ގޮސްފައެވެ.

ޔޫކުރެއިންގެ އޮފިޝަލުން ތުހުމަތުކުރާ ގޮތުގައި، ރަޝިއާގެ ހަމަލާތަކުގައި މަރުވެފައިވާ ގިނަމީހުން، ރަޝިއާ ސިފައިވަނީ އެކި ސަރަހައްދުތަކުގައި ވަޅުލާފައެވެ. މިތުހުމަތަކާއި ގުޅޭގޮތުން މިހާތަނަށް މޮސްކޯއިން އެއްވެސް ކޮމެންޓެއް ކޮށްފައެއް ނުވެއެވެ.

އެތައް ހަފްތާގެ ހަނގުރާމައަށްފަހު، ރަޝިއާއިން މިހާރު މަރިއޮޕޯލްގެ ބޮޑުބައެއް ކޮންޓްރޯލް ކުރަމުންދާއިރު، އެސިޓީ ހިމާޔަތްކުރަމުންދިޔަ ގިނަ އަދަދެއްގެ ސިފައިން މިހާރު ހައްޔަރު ވެފައިތިބީ، އެސިޓީގައި ހުންނަ ބޮޑު ސްޓީލް ކާރުޚާނާ ހިމެނޭ ސަރަހައްދުގައެވެ.

އަޒޮވްސްޓާލް ސްޓީލް ޕްލާންޓަށް ހަމަލާ ދިނުމަށް ރަޝިއާއިން ތައްޔާރުވަމުން ދަނިކޮށް، އެގައުމުގެ ރައީސް ލާޑީމިރު ޕުޓިންވަނީ، އެ ކާރުޚާނާއަށް ހަމަލާ ނުދިނުމަށް އަމުރުކޮށްފައެވެ. އޭގެ ބަދަލުގައި ޕުޓިން ވިދާޅުވެފައިވަނީ، "މެއްސަކަށްވެސް ކާރުޚާނާ ދޫކޮށް ނުދެވޭނޭހެން" އެ ކާރުޚާނާ ވަށާލުމަށެވެ.

ސެޓްލައިޓް ފޮޓޯތަކުން ފެންނަން ހުރިކަމަށް ބުނާ ކަށްވަޅުތައް ހުރީ، މައިރޮޕޯލްގެ ހުޅަގުން 20 ކިލޯ މީޓަރު ދުރުގައި އޮންނަ، މަންހުޝް ވިލެޖް ކައިރީގައެވެ. ސެޓްލައިޓް ފާރމް މަސާރއިން ބުނެފައިވާ ގޮތުގައި، އެއް ބަރިއަކަށް، 85 މީޓަރު ދުރަށް ފެތުރިފައިވާ، ހަތަރު ބަޔަކަށް ބެހިފައިވާ ކަށްވަޅުތަކެއް ފޮޓޯތަކުން ފެންނާން އެބަހުއްޓެވެ.

މަރިއޮޕޯލް ސިޓީގެ ސިޓީ ކައުންސިލުންވެސް މީގެ ކުރިންވަނީ، ރަޝިއާ ސިފައި، އެ ސިޓީގައި މަރުވެފައިވާ މީހުން މިސަރަހައްދުގައި ވަޅުލާފައިވާ ކަމުގެ ތުހުމަތު ކޮށްފައެވެ. ކައުންސިލުން ބުނެފައިވަނީ، މި ސަރަހައްދުގައި ބޮޑެތި ވަޅުގަޑުތައް ކޮނެ، މީހުންގެ ހަށިތައް ޑަމްޕް ލޮރީތަކުގައި ގެނެސް މި ވަޅުގަޑުތަކަށް ވަނީ އަޅާލާފައެވެ. އަދި ސިޓީ ކައުންސިލުންވެސް ވަނީ މިސަރަހައްދުގެ ސެޓްލައިޓް ފޮޓޯތަކެއް ކުރިން އާންމުކޮށްފައެވެ. އަދި ބުނެފައިވަނީ، މި ސަރަހައްދުގައި މީހުން ވަޅުލާފައިވާ ސަރަހައްދު، ކައިރީގަ އޮތް ބަރުސްތާނަށްވުރެ ދެގުނަ ބޮޑު ކަމުގައެވެ.

ޔޫކުރެއިންގެ އޮފިޝަލުން ވިދާޅުވެފައިވަނީ، ރަޝިއާއިން މިސިޓީއަށް ދީފައިވާ ހަމަލާތަކުގައި، އެ ސިޓީގެ 20،000 ރައްޔިތުން މަރުވެފައިވާކަމަށް ވަނީ ބެލެވިފައެވެ. 450،000 މީހުންގެ އާބާދީއެއް އޮތް މިސިޓީގެ އިމާރާތްތަކުގެ ބޮޑުބައެއް ފުނޑުފުނޑުވެފައިވާއިރު، ސިޓީ ދޫނުކޮށް މިހާރު ތިބީ 100،000 އެއްހާ މީހުންނެވެ.