އިންޑިއާ އައުޓް ޖަހާފައިވާ ބެނާތައް ނުނަގާނެކަމަށާއި، އިތުރުބެނާތައް ދާނީ ހަރުކުރަމުންކަމަށް ޕީއެންސީގެ ރައީސް ޢަބްދުއްރަހީމް ޢަބްދުﷲ (އަދުރޭ) ވިދާޅުވެއްޖެއެވެ. އޭނާ މިހެން ވިދާލުވީ ރައީސް ޔާމީންގެ ގެކޮޅުގައި އިންޑިއާ އައުޓް ޖަހާފައިވާ ބޮޑު ބެނާއެއް ދެމުމުން އެއީ ޤާނޫނުލް އުގޫބާތާ ޚިލާފްކަމެއްކަމަށް ވިދާޅުވުމުންނެވެ. ރައީސް ނަޝީދު ވަނީ އެ ބެނޭ ނެގުމަށް ފުލުހުނަށް ގޮވާލައްވާފައެވެ.
ރައީސް ނަޝީދުގެ އެ ވާހަކަތަކަށް ރައްދު ދެއްވާ އަދުރޭ ވިދާޅުވީ، އިންޑިއާ އައުޓް ބެނާ ދެމުން ނުހުއްޓުވޭނެކަމަށެވެ. އަދި ގޭގޭގައި އިންޑިއާ އައުޓް ބެނާދެމުން ދާނީ އިތުރަށް ކުރިއަށްކަމަށްވެސް އަދުރޭ ވިދާޅުވިއެވެ. އަދުރޭ ވިދާޅުވީ އިންޑިއާ އައުޓް ހަރަކާތް މުޅި ރާއްޖޭގައި ދާނީ ހިންގަމުންކަމަށެވެ. ގޭގޭގައި ބެނާ ހަރުކުރާތީ ބެނާތައް ހަރުކުރާ ގޭގޭގެ ވެރީންނަށް ބިރުދައްކަމުންދާކަމަށްވެސް އަދުރޭ ތުހުމަތުކުރެއްވިއެވެ.
އަޅުގަނޑު ދަންނަވާނީ މި ބެނާތައް ދަމާ ގޭގެ ދާނީ އެއް ދުވަހުން އަނެއް ދުވަހަށް އިތުުރުވަމުންނޭ. ހަމައެކަނި މާލެއަކު ނޫން މިކަން ހިނގާނީ. ރާއްޖޭގެ ހުރިހާ ދިމާއެއްގައި އެކަން ކުރާނެ. އިންޑިއާ އައުޓް ހަރަކާތް ދާނީ އެކި ސިފަ ސިފާގައި ކުރިއަށް.
– ޢަބްދުއްރަހީމް ޢަބްދުﷲ (އަދުރޭ)
އިންޑިއާގެ މުސްލިމުންނަށް ކުރާ އަނިޔާއާއި ގުޅިގެން ދިވެހި ސަރުކާރުން އެކަމާ ދެކޮޅަށް އަޑުއުފުލުމަށް ގޮވާލާ ނައިފަރު ދާއިރާގެ މެންބަރު އަޙްމަދު ޝިޔާމް ހުށައެޅުއްވިކުއްލި މައްސަލައަށް ފުރުޞަތު ނުދިނުމަށް ނިންމަވާ ރައީސް ނަޝީދު ވިދާޅުވީ، މާލޭގެ ބޮޑެތި ޢިމާރަތްތަކުގައި އިންޑިއާއާއި ގުޅޭގޮތުން ބަދުބަސް ބުނެ ބެނާތައް ހަރުކުރުމަކީ ޤާނޫނުލް އުގޫބާތާއި ޚިލާފްކަމެއްކަމަށެވެ. ނަޝީދު ވިދާޅުވީ، އެއީ އާންމު މަސްލަހަތާއިވެސް ހިލާފު ކަމެއްކަމަށާއި، އެމަނިކުފާނު ދެކެވަޑައިގަންނަވާގޮތުގައި ވަގުތުން ވަގުތަށް ފުލުހުން އެ ނަގަން ޖެހޭނެކަމަށެވެ.
ރައީސް ނަޝީދު މިހެން ވިދާލުވެފައިމިވަނީ ރައީސް ޔާމީންގެ އަމިއްލަފުޅު ގެކޮޅުގައި އިންޑިއާ އައުޓް ލިޔެފައިވާ ބޮޑު ބެނާއެއް ދެމުމާއި ގުޅިގެންނެވެ. ރައީސް ޔާމިން ދިރިއުޅުއްވަމުން ގެންދަވާ ގެކޮޅުގެ އެންމެ މަތިން ތިރިއަށް ވާގޮތަށް ދަމާފައިވާ ބޮޑު ބެނަރ ދަމާފައިވަނީ އިއްޔެ އަސުރު ނަމާދަށްފަހުއެވެ. އަދި ހަވީރުގެ ވަގުތު މިބެނަރ ނެގި ގަޑީގައި މި ސަރަހަދުގައި ގިނަ އަދަދެއްގެ ބަޔަކު އެ ސަރަހައްދަށް އެއްވެފައި ވެއެވެ. އަދި ބެނަރ ދަމާފައިވަނީ، ރޯދަމަހުގެ ހަވީރު މާލޭގެ ވަށައިގެން އޮންނަ ބޮޑު ތަކުރުފާނު މަގަށް، އާންމު އުސޫލުން، މީހުން "ފިނިބުރު ޖަހަން" ނިކުންނަ ވަގުތުގައިކަން ފާހަގަ ކޮށްލެވެއެވެ.
އިންޑިއާ އައުޓު ހަރަކާތަކީ، ރާއްޖޭގައި އިންޑިއާ ސިފައިން ގާއިމްވެ ތިބުމާއި ދެކޮޅަށް ޕީޕީއެމްއިން އިސްނަގައިގެން ކުރިޔަށް ގެންދާ ހަރަކާތެކެވެ. އަދި މި ހަރަކާތުގެ އެންމެ އިސް ބޭފުޅެއްގައި ގޮތުގައި ރައީސް ޔާމިން ހަރަކާތްތެރި ވެވަޑައިގަންނަވަމުން ގެންދަވާއިރު، އެމަނިކްފާނު ޖަލުން މިނިވަންވުމަށްފަހު މިހަރަކާތައް އާދިރުމެއް އައިސްފައިވެއެވެ. އަދި އެއަށްފަހު، މިހަރަކާތް ރާއްޖޭގެ އެކި ކަންކޮޅުތަކަށް ފުޅާކޮށް، ފަހަކަށް އައިސް ޕީޕީއެމްއިން ވަނީ، މިހަރާކާތް ހިންގުމަށްޓަކާ ރާއްޖެތެރޭގެ ގިނަ ރަށްތަކަކަށް ދަތުރު ކޮށްފައެވެ.
