ރަޝިއާއިން އުދުވާނީ ހަމަލާދީ، ސިޓީގެ ހުރީހާ އިމާރާތްތަކެއް ކަހަލަގޮތަކަށް ބިމާ ހަމަވެފައިވާ، ޔޫކުރެއިންގެ މަރިއޮޕޯލް ވަށާލާ، އެސީޓީގައި ބަންދުވެފައިތިބި ޔޫކުރެއިންގެ ސިފައިން އަމާން ދިނުމަށް ރަޝިއާއިން މުހުލަތު ދީފިއެވެ.
ޔޫކުރެއިންގެ ދެކުނުގެ ސިޓީއެއް ކަމުގައިވާ، މަރިއޮޕޮލްގެ ދިފާއުގައި އަދިވެސް ހަނގުރާމަ ކުރަމުންދާ ޔޫކުރެއިން ސިފައިން އަމާން ދިނުމަށް ރަޝިއާއިން މުހުލަތު ދީފައިވާއިރު، އަދިވެސް ރަޝިއާ ސިފައިންދަނީ އެ ސިޓީއަށް ހަމަލާތައް ދެމުންކަމަށް މީޑިއާތަކުން ރިޕޯޓު ކޮށްފައި ވެއެވެ.
ރަޝިއާގެ ޑިފެންސް މިނިސްޓްރީއާއި ހަވާލާދީ، އެގައުމުގެ ދައުލަތުގެ ޓީވީ ރިއާއިން ރިޕޯޓު ކޮށްފައިވާ ގޮތުގައި، "އެއްވެސް މީހަކު ބާކީ ނުކޮށް" ޔޫކުރެއިންގެ "ހުރިހާ ސިފައިންނާއި ކުލީ ސިފައިން" ރަޝިއާގެ ގަޑިން ރޭގެ 10:00 އިން ފެށިގެން ހެނދުނު 6:00 އާއި ދެމެދު، "އެއްވެސް ހަތިޔާރަކާއި ނުލާ" އެ ސިޓީ ދޫކޮށް ދިއުމަށް ވަނީ ފުރުސަތު ދެވިފައެވެ.
450،000 އެއްހާ މީހުންގެ އާބާދީއެއް އޮން މަރިއޮޕޯލްގެ އެކި ސަރަހައްދުތަކުގައި އަދިވެސް 100،000 މީހުން އަދިވެސް ތިބިކަމަށް މީޑިއާތަކުން ރިޕޯޓު ކޮށްފައި ވެއެވެ. އަދި ސިޓީގެ އެކި ސަރަހައްދު ތަކުގައި އަދިވެސް ޔޫކުރެއިންގެ ސިފައިން ސިޓީގެ ދިފާޢުގައި ހަނގުރާމަ ކުރަމުންދާކަމަށްވެ ރިޕޯޓު ކޮށްފައި ވެއެވެ. މި ސިޓީގެ ބޮޑު ބައެއް މިހާރުވަނީ ރަޝިއާގެ ބާރުގެ ދަށަށް ގޮސްފައެވެ.
ޔޫކުރެއިންގެ ރައީސް ޒެލެންސްކީ ހޮނިހިރު ދުވަހު ވިދާޅުވެފައިވަނީ، މަރިއޮޕޯލްގެ ހާލަތު ވަނީ ވަރަށް ގޯސްވެފައެއެވެ. "ރަޝިއާއިން ދަނީ އެ މަރިއޮޕޯލް ތިބި މީހުން ނައްތާލުމަށް މަސައްކަތް ކުރަމުން،" އެންމެ ފަހުން އާންމު ކުރެއްވި ވީޑިއޯގައި ޒެލެންސްކީ ވަނީ ވިދާޅުވެފައެވެ.
ރަޝިއާއިން ހިސޯރު ކޮށްފައިވާ، މަރިއޮޕޯލްގެ މޭޔަރު ކުރިން ވިދާޅުވެފައިވާ ގޮތުގައި، ރަޝިއާއިން އެސިޓީ ހިސޯރުކޮށް، ދީފައިވާ ހަމަލާތަކުގައި މިހާތަނަށް 10،000 މީހުން ވަނީ މަރުވެފައެވެ. އަދި އޭނާ ވިދާޅުވެފައިވާ ގޮތުގައި، މަގުމަތީގައި މަރުވެ ކުނިވަމުންދާ މީހުންގެ ގަބުރުތައް ނަގާ ސާފުކުރުމުން މި އަދަދު 20،000 އަށް އަރައިގެން ދާނެއެވެ.
އޭއެފްޕީއާއި ވާހަކަ ދައްކަވަމުން އޭނާ ވިދާޅުވެފަ ވާގޮތުގައި، ރަޝިއާ ސިފައިން ވަނީ އެސިޓީއަށް، މަރުވެފައިވާ މީހުންގެ ހަށިތައް އެންދުމަށްޓަކާ މޯބައިލް ކުރިމޭޝަން އެކުއިޕްމަންޓްތައް (މަރުވެފައިވާ މީހުންގެ ހަށިތައް އަންދާ ނައްތާލުމަށް ބޭނުންކުރާ މެޝިނަރީ) ގެނެސްފައެވެ.
އަދި އޭނާ ވިދާޅުވި ގޮތުގައި، މިއީ އެ ސިޓީގައި ރަޝިއާ ސިފައިން ހިންގާފައިވާ އިންސާނިއްޔަތާ ޚިލާފް ޖަރީމާތައް ފޮރުވުމުގެ މަގުސަދުގައި ކުރަމުންދާ ކަމެކެވެ.
މަރިއޮޕޯލްއަކީ، ރަޝިއާއިން 2014ވަނަ އަހަރު ހިފާފައިވާ ޔޫކުރެއިންގެ ކްރައިމިއާ އާއި، މިހާރު ރަޝިއާއިން ހިފުމަށް މަސަކަތް ކުރަމުންދާ ޑޮމްބަސް ސަރަހައްދުގެ މެދުގައި އޮންނަ ސިޓީއަކަށް ވުމާއެކު، ކްރައިމިއާއާއި ޔޫކުރެއިންގެ ޑޮމްބަސް ސަރަހައްދު ގުޅުވާލުމަށް މިސިޓިއަކީ ރަޝިއާއަށް ވަރަށް މުހިންމު ސިޓީއެކެވެ. އަދި މިއީ 52 ދުވަސްވީ ހަގުރާމާގައި މިހާތަނަށް ރަޝިއާގެ ބާރުގެދަށަށް ދިޔަ ޔޫކުރެއިން އެންމެ ބޮޑު ފުރަތަމަ ސިޓީއެވެ.
