ކުރީގެ ރައީސް ޔާމީންގެ ވެރިކަމުގައި ހޯމް މިނިސްޓަރުގެ މަޤާމު ފުރުއްވީ "ހުދު ވަލެއްގައި ހިފައިގެން" ކަމަށާއި، 2023ގައި ރައީސް ކަމުގެ މަޤާމާއި ހަވާލުވެ މަސްއޫލިއްޔަތު އަދާކުރާނީވެސް "ހުދުވަލުގައި" ހިފައިގެންކަމަށް އުމަރު ނަސީރު ވިދާޅުވެއްޖެއެވެ.

އުމަރު މިހެން ވިދާޅުވީ ކުށްވެރިންގެ ފައިގައި ޓެގު އެޅުވުމުގެ މަސައްކަތް ހިންގުމުގައި ކޮރަޕްޝަން ހިންގާފައިވާ ކަމަށް ބުނެ ކުރީގެ ހޯމް މިނިސްޓަރ ޢުމަރު ނަސީރުގެ މައްޗަށް ދަޢުވާކުރުމަށް ފޮނުވާފައިވާ މައްސަލަ އަލުން އިޞްލާހުކުރުމަށް އަނބުރާ ފޮނުވާލާފައިވާ ކަމަށް ޕްރޮސިކިއުޓަރ ޖެނެރަލްގެ އޮފީހުން ވިދާޅުވި ޚަބަރު ދައުލަތުގެ މީޑިޔާއިން ގެނެސް ދިނުމާއި ގުޅިގެން އެކަމަށް ފާޑުކިޔައި ކުރި ޕޯސްޓެއްގައެވެ.

އުމަރު ވިދާޅުވީ ސަރުކާރުގެ މީޑިޔާ އިން މި ޚަބަރު މި ގެނެސްދިނީ މި މައްސަލައިގައި ދަޢުވާ ކުރެވޭ ވަރުގެ ހެއްކެއް ޕީޖީ އަށް ނުފެނިގެން މައްސަލަ އަނބުރާ ފޮނުވާލިތާ 1 މަސް ފަހުން ކަމަށެވެ. ނަމަވެސް މި ހެޑްލައިން ތަކުގެ ބޭނުމަކީ އިރުއިރު ކޮޅުން މި ޚަބަރު މީޑިޔާ ތަކުގައި ކިޔާލުންކަމަށެވެ.

މި މައްސަލައަށް 7 އަހަރުވީ އިރު އަދިވެސް ހެޑްލައިން ހެދުން ނޫން ކަމެއް ނުވި. "މިނިވަން50″ އޭ ކިޔައިގެންވެސް ވަރަށް ގިނަ ހެޑްލައިން ހެދިއ. އޮއްޓަރު ހުރި ހަމަ އެކައްޗެއްވެސް ނުނިކުތް. އަޅުގަޑު ވަޒީރުކަން ކުރީ "ހުދު ވަލެއްގައި ހިފައިގެން" އަޅުގަޑު ރައީސުލް ޖުމްހޫރިއްޔާގެ މަޤާމް އަދާކުރާނީވެސް ހަމަ މިދެންނެވި "ހުދުވަލުގައި" ހިފައިގެން.

– އުމަރު ވިދާޅުވިއެވެ.

އުމަރު ވިދާޅުވީ، ދިވެހިން ދުވަހުކެވެސް ނުދެކޭފަދަ ހަރުދަނާ، ހެޔޮލަފާ، ސާފު ވެރިކަމެއް ކުރާތަން ދިވެހިން ދެކޭނެކަމަށެވެ. އަދި 2023 ގެ އިންތިޚާބުގައި އޭނާއަށް ބައިވެރިވިޔަ ނުދިނުމަށް މިސަރުކާރުން ކުރާ މަސައްކަތް ތައް ދާނީ ނާކާމިޔާބުވަމުންކަމަށް އުމަރު ވިދާޅުވިއެވެ.

ޢުމަރު ނަސީރުގެ މައްޗަށް ދައުވާކުރާ މައްސަލާގައި އޭސީސީން ވިދާޅުވީ، އިލެކްޓްރޯނިކް ޓެގް ބޭނުންކޮށްގެން ކުށްވެރިން ބެލެހެއްޓުމުގެ ޚިދުމަތްދޭނެ ފަރާތެއް ހޯދުމަށް މިނިސްޓްރީ އޮފް ހޯމްއެފެއާޒުން ކޮށްފައިވާ އިޢުލާނާ ގުޅޭ ކަންކަން އެމިނިސްޓްރީން ކުރިއަށް ގެންގޮސްފައިވަނީ ޢާންމުކޮށް ޢަމަލުކުރަމުންދާ އުޞޫލުގެ ބޭރުން، އޭރުގެ މިނިސްޓަރ އޮފް ހޯމްއެފެއާޒް ޢުމަރު ނަޞީރުގެ ބެލުމުގެ ދަށުން އޭނާގެ އިރުޝާދުގެ ދަށުންކަމަށެވެ.

އެ އިޢުލާނާ ގުޅިގެން ހުށަހަޅާފައިވާ ބިޑުތަކުގެ ތެރެއިން ޓެގް އަޅުވައި ބަލަހައްޓާނެ ގޮތުގެ ޓްރައަލް ދައްކާފައިވާ ސްޓެލްވާޓް މޯލްޑިވްސް ޕްރައިވެޓް ލިމިޓެޑްގެ ޙިއްސާދާރުންގެ ތެރޭގައި ހިމެނޭ 4 މީހުންނަކީވެސް ޢުމަރު ނަޞީރުއާ ގާތްގުޅުން އޮންނަ ފަރާތްތަކެއްކަމަށާއި، އޭގެތެރެއިން ދެ ޙިއްސާދާރުންނަކީ ޢުމަރު ނަޞީރުގެ ވިޔަފާރި ޕާޓްނަރުން ކަމަށް އޭސީސީން ވިދާޅުވިއެވެ. އެ މީހުންނަކީ ޢުމަރު ނަޞީރުގެ ކްލޯޒް އެސޯސިއޭޓުން ކަމަށްވެސް އޭސީސީން ވިދާޅުވެފައިވެއެވެ.

އެހެންކަމުން، ސްޓެލްވާޓަކީ ޢުމަރު ނަޞީރުއާ މަސްލަހަތު ފުށުއަރާ ފަރާތްތަކެއްގެ ކުންފުންޏެއްކަމަށާއި، ނަމަވެސް، ސްޓެލްވާޓުން ދެއްކި ޓެގް ޓްރައަލް އިވެލުއޭޓް ކުރުމަށް ޢުމަރު ނަޞީރު އަމިއްލައަށް ޓެކްނިކަލް ކޮމެޓީއެއް ކަނޑައަޅައި އެ ކޮމެޓީގެ ޗެއަރގެ ގޮތުގައި ޢުމަރު ނަޞީރު ބައިވެރިވެފައިވާ ކަމަށް އޭސީސީން އުމަރު ނަސީރުގެ މައްޗަށް ދައުވާކުރަން ނިންމި ސަބަބުގެ ތެރޭގައި ހިމެނެއެވެ.