އިނގިރޭސި ޕްރިމިއާ ލީގުގައި މިރޭ ލިވަޕޫލުން ރަށުން ބޭރުގައި މެންޗެސްޓާ ސިޓީއާ ދެކޮޅަށް ކުޅުނު މެޗު 2-2 އިން އެއްވަރު ވެއްޖެއެވެ.
މެޗުގައި ސިޓީއަށް ފުރަތަމަ ގޯލް ޖަހައިދިނީ މިޑްފީލްޑަރު ކެވިން ޑި ބުރައިނާއެވެ. ލިވަޕޫލަށް އެއްވަރުކޮށްދިނީ ޖޮޓާއެވެ. ހާފް ނިމުމުގެ ކުރިން ސިޓީން ދެވަނަ ފަހަރަށް އެއްވަރުކުރީ ޖެސޫސް ޖެހި ލަނޑުންނެވެ. ދެވަނަ ހާފް ފަށައިގެން ދެވަނަ މިނިޓްގައި ލިވަޕޫލުން ނަތީޖާ ހަމަހަމަކުރީ 30 ވަނަ އުފަން ދުވަސް ފާހަގަކުރި މާނޭއެވެ.
މެޗުގެ 63 ވަނަ މިނިޓުގައި ސްޓާލިންގެ ގޯލަކުން ސިޓީން ތިންވަނަ ފަހަރަށް ލީޑު ނެގި ކަމަށް ހީކޮށް އުފާފާޅު ވެސް ކުރިއެވެ. ނަމަވެސް ވީއޭއާރު ބެލުމަށް ފަހު ސްޓާލިން އަށް ބޯޅަ ލިބުންއިރު އޭނާ ހުރީ އޮފްސައިޑުގައި ކަމަށް ނިންމިއެވެ.
ބަދަލު ކުޅުންތެރިއެއްގެ ގޮތުގައި ރޭ ކުޅެން ނުކުތް ރިޔާދް މަހްރޭޒް މެޗުގެ 90 ވަނަ މިނިޓުގައި ފޮނުވާލި ހިލޭ ޖެހުމެއް ވަނީ ހޯލު ދަނޑިއަށް އަމާޒުވެފައެވެ. އަދި އިތުރު ވަގުތުގެ ވެސް އެންމެ ފަހު މިނިޓުގައި ޑިބްރޭނާ ހުސްކޮށްލާފައި ދިން ބޯޅައެއް ކީޕަރު އެލިސަން ބޯ މަތިން ފޮނުވާލަން މަހްރޭޒް ޖެހި ބޯޅަ އަށް ހުރަސް އެޅީ މަޓިޕްއެވެ.
މެޗުން މޮޅުވެގެން ސިޓީ އަށް ހަތަރު ޕޮއިންޓަށް ލީޑުފުޅާކުރެވެން އޮތެވެ. އަނެއްކޮޅުން ސިޓީ ބަލިކޮށްގެން ލިވަޕޫލަށް އެއް ވަނަ އަށް އެރުމުގެ ފުރުސަތު އޮތެވެ. އެކަމަކު، ދެ ޓީމަށް ވެސް ހާލަތުގެ ފައިދާ ނުނެގި ޖެހުނީ ޕޮއިންޓަކުން ފުއްދާލާށެެވެ. ލީގުގައި ސިޓީ އާއި ލިވަޕޫލަށް ބާކީ ހަތް މެޗު އޮތްއިރު، ސިޓީ އެއް ވަނައިގައި އޮތީ އެއް ޕޮއިންޓުގެ ލީޑަކާ އެކުއެވެ. ސިޓީ އަށް 31 މެޗުން 74 ޕޮއިންޓް ލިބިފައިވާއިރު، ދެ ވަނައިގައި އޮތް ލިވަޕޫލަށް ވަނީ 31 މެޗުން 73 ޕޮއިންޓް ލިބިފަ އެވެ.
