މެމްބަރު އިކްރާމަކީ ރައީސް ޔާމީންގެ ވެއިކަމުގައި ސްޓޭޓް މިނިސްޓަރު ކަމުގެ މަޤާމުގައި އުޅުއްވި ބޭފުޅަކަށް ވުމުން، އެމްޑީޕީގެ އަސްލު ވިސްނުން ނުހުރެދާނެކަމަށް ރައްޔިތުންގެ މަޖިލީހުގެ ފޮނަދޫ ދާއިރާގެ މެމްބަރު މޫސާ ސިރާޖު ވިދާޅުވެއްޖެއެވެ.

ސިރާޖު މިހެން ވިދާޅުވީ ކުރިއަށް އޮތް އެމްޑީޕީގެ ޗެއާޕާސަން އިންތިޚާބުގައި ތިމާ ހިތްނުރުހޭ ކޮންމެ މީހަކާއި ދިމާލަށް ވަގަށް ގޮވައި އަބުރު ކަތިލުމަކީ ބަލައި ގަނަވޭނެ ކަމެއް ނޫންކަމަށް ވިދާޅުވެ އިކްރާމް ވިދާޅުވި ވާހަތަކަށް ރައްދު ދެއްވަމުންނެވެ.

އިކްރާމްގެ ވާހަތަކާއި ގުޅިގެން ސިރާޖު ވިދާޅުވީ، ނިމިދިޔަ ރައީސް ޔާމީންގެ އަނިޔާވެރިކަން ނިންމުމަށްޓަކައި، އެމްޑީޕީގެ މެމްބަރުން އެންމެ ބޮޑަށް މަސައްކަތް ކުރެއްވިއިރު، ސްޓޭޓް މިނިސްޓަރަކަށް ހުންނަވައި ޔާމީންގެ ވެރިކަން ދިފާއުކޮށް މަޤާމުން ވަކި ކުރުމާއި، މަސައްކަތް ކުރެއްވުމުން އިކްރާމަށް އެމްޑީޕީގެ ކަންކަން ނޭގިދާނެކަމަށެވެ. އަދި މިއަދު އެމްޑީޕީގެ ތެރޭގައި ހިންގާ ކަންކަމުގައިވެސް އެހެން ވިސްނުމެއް އިކްރާމުގެ ހުރުމަކީ އޭރުގެ ސަރުކާރުގެ ތެރޭގައި އުޅުމުން ހުރި ވިސްނުމެއްކަމަށް ސިރާޖު ވަނީ ވިދާޅުވެފައެވެ.

އަޅުގަނޑުމެން ރައީސް ޔާމީނުގެ އަނިޔާވެރިކަމާ ދެކޮޅަށް މަސައްކަތްކުރިއިރު މަނިކުފާނު ހުންނެވީ ޔާމީން ސަރުކާރުގެ ޑެޕިއުޓީ މިނިސްޓަރަކަށް. ޔާމީނަށް ކަމުނުގޮސްގެން އެމަގާމުން ވަކިކުރުމާ ހަމައަށް ގަދަޔަށް ޔާމީނު ސަރުކާރާވެގެން އުޅުނު މީހަކަށް ފަހަރުގަ ތިޔަގޮތައް ވިސްނުންހުރެދާނެ.

– ސިރާޖު ވިދާޅުވިއެވެ.

އިކްރާމް ވިދާޅުވީ، ސަރުކާރުގައި ތިބޭއިރު، ގޯސް ހަދާނެ މީހުންނައި، ގޯސްކޮށް ކުރެވޭ ކަންކަންވެސް ހުންނާނެކަމަށެވެ. އެކަންކަން އިސްލާހު ކުރުމަކީ ސަރުކާރުގައި ތިބޭއިރު ސަރުކާރަށް ތާއީދުކުރާ މީހުން ކުރަންޖެހޭ ކަމެއްކަމަށެވެ. އޭގެ ބަދަލުގައި ވަގަށް ގޮވައި، މީހުންގެ އަބުރު ކަތިލުމަކީ ކޮށްގެންވާނެ ކަމެއް ނޫންކަމަށް އިކްރާމް ވިދާޅުވިއެވެ.

ސަރުކާރުގައި ތިބޭއިރު އެކި ޒާތުގެ ތުހުމަތު ކުރާނެކަމާއި، ބައެއް މީހުން ގޯސްވެސް ހަދާނެކަމާއި، ނިޒާމުގެ ތެރެއިން މި ކަންކަމަށް ހައްލު ހޯދައި ކަންކަން ރަނގަޅު ކުރުމަކީ ތިމާމެންގެވެސް ޒިންމާއެއްކަން ދަންނަންޖެހޭ. ތިމާ ހިތް ނުރުހޭ މީހެއްނަމަ ވަގަށް ގޮވާ އަބުރު ކަތިލުން ބަލައެއް ނުގަނެވޭނެ.

– އިކްރާމް ވިދާޅުވިއެވެ.

އެމްޑީޕީގެ ޗެއާޕާސަން އިންތިޚާބުގައި މިނިސްޓަރ ފައްޔާޟު އިސްމާއިލަށް ރާއްޖޭގެ އެކި ކަންކޮޅުތަކުން ބޮޑު ތާއީދެއް އޮތްކަން ދަނީ ފެންނަމުންނެވެ. ފައްޔާޟާއި އިދިކޮޅު ފަރާތްތަކުން އެންމެ ބޮޑަށް ތުހުމަތު ކުރަމުންދާ ކަންކަމަކީ މިސަރުކާރުގައި ހިމެނޭ ވައްކަންތަކާއި، ގޯސްކޮށް ހިނގާ ކަންކަމަކީ ފައްޔާޟު އިސްކޮށް ހުންވައިގެން ކުރާ ކަންކަމުގެ ގޮތުގައެވެ. ނަމަވެސް މިކަން ފައްޔާޟުގެ ޓީމުން ދަނީ ދޮގު ކުރަމުންނެވެ.