ތިމާ ހިތްނުރުހޭ ކޮންމެ މީހަކާއި ދިމާލަށް ވަގަށް ގޮވައި އަބުރު ކަތިލުމަކީ ބަލައި ގަނަވޭނެ ކަމެއް ނޫންކަމަށް ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު އިކްރާމް ހަސަން ވިދާޅިވެއްޖެއެވެ.
އިކްރާމް މިހެން ވިދާޅުވީ ކުރިއަށް އޮތް އެމްޑީޕީގެ ޗެއާޕާސަން އިންތިޚާބުގައި އިންތިއަށް ތާއީދުކުރައްވާ ފޮނަދޫ ދާއިރާގެ މެމްބަރު މޫސާ ސިރާޖު ދެއްކެވި ވާހަތަކާއި ގުޅިގެންނެވެ. ޓީވީ ޗެނަލެއްގައި ވާހަކަ ދައްކަވަމުން ސިރާޖު ވަނީ އެމްޑީޕީގެ ތިލަފަތުގެ ރަމްޒު ހިފެހެއްޓޭނީ ވައްކަމާއި، ކޮރަޕްޝަނާއި، އިންސާފު ޤާއިމް ވެގެންކަމަށެވެ.
ރައްޔިތުން ވޯޓު ދެނީ ހިންގޭ ޕްރޮޖެކްޓްތަކާއި، ކުރާ މަސައްކަތަށް އެކަނި ނޫންކަމަށާއި، ތިލަފަތުގެ ރަމްޒުގައި ހުރި އުސޫލުތައް ދޫކޮށްލައިނަމަ 2023 ވަނަ އަހަރުގެ ރިޔާސީ އިންތިޚާބުވެސް ކާމިޔާބު ކުރުމަކީ ފަސޭހަ ކަމެއް ނޫންކަމަށެވެ. އެމްޑީޕީގެ އާންމު މެމްބަރުންވެސް ގަބޫލުކުރާނެ އަސާސްތަކާއި އުސޫލުތަކަކީ، ތިލަފަތުގެ ރަމްޒު ކަމަށާއި، އޭގައި ހުރި އަސާސްތައް ދޫކޮށްލައި އަމިއްލަ ކަންކަން ހިމަނައިގެން ކަންކަން ކުރަން އުޅުނަސް އެކަން ކާމިޔާބު ނުވާނެކަމަށް ސިރާހޖު ވިދާޅުވިއެވެ.
އެމްޑީޕީއަށް 2023 ލިބޭނީ އެމްޑީޕީގެ އުސޫލުތައް ހިފަހައްޓައި ދަމަހައްޓައިގެން. ތިލަފަތް ރަމްޒު ކޮށްދޭ ހަމަތައް ނަގަހައްޓައިގެން.
– ސިރާޖު ވިދާޅުވިއެވެ.
ސިރާޖުގެ ވާހަކަތަކާއި ގުޅިގެން އިކްރާމް ވިދާޅުވީ، ސަރުކާރުގައި ތިބޭއިރު، ގޯސް ހަދާނެ މީހުންނައި، ގޯސްކޮށް ކުރެވޭ ކަންކަންވެސް ހުންނާނެކަމަށެވެ. އެކަންކަން އިސްލާހު ކުރުމަކީ ސަރުކާރުގައި ތިބޭއިރު ސަރުކާރަށް ތާއީދުކުރާ މީހުން ކުރަންޖެހޭ ކަމެއްކަމަށެވެ. އޭގެ ބަދަލުގައި ވަގަށް ގޮވައި، މީހުންގެ އަބުރު ކަތިލުމަކީ ކޮށްގެންވާނެ ކަމެއް ނޫންކަމަށް އިކްރާމް ވިދާޅުވިއެވެ.
ސަރުކާރުގައި ތިބޭއިރު އެކި ޒާތުގެ ތުހުމަތު ކުރާނެކަމާއި، ބައެއް މީހުން ގޯސްވެސް ހަދާނެކަމާއި، ނިޒާމުގެ ތެރެއިން މި ކަންކަމަށް ހައްލު ހޯދައި ކަންކަން ރަނގަޅު ކުރުމަކީ ތިމާމެންގެވެސް ޒިންމާއެއްކަން ދަންނަންޖެހޭ. ތިމާ ހިތް ނުރުހޭ މީހެއްނަމަ ވަގަށް ގޮވާ އަބުރު ކަތިލުން ބަލައެއް ނުގަނެވޭނެ.
– އިކްރާމް ވިދާޅުވިއެވެ.
އެމްޑީޕީގެ ޗެއާޕާސަން އިންތިޚާބުގައި މިނިސްޓަރ ފައްޔާޟު އިސްމާއިލަށް ރާއްޖޭގެ އެކި ކަންކޮޅުތަކުން ބޮޑު ތާއީދެއް އޮތްކަން ދަނީ ފެންނަމުންނެވެ. ފައްޔާޟާއި އިދިކޮޅު ފަރާތްތަކުން އެންމެ ބޮޑަށް ތުހުމަތު ކުރަމުންދާ ކަންކަމަކީ މިސަރުކާރުގައި ހިމެނޭ ވައްކަންތަކާއި، ގޯސްކޮށް ހިނގާ ކަންކަމަކީ ފައްޔާޟު އިސްކޮށް ހުންވައިގެން ކުރާ ކަންކަމުގެ ގޮތުގައެވެ. ނަމަވެސް މިކަން ފައްޔާޟުގެ ޓީމުން ދަނީ ދޮގު ކުރަމުންނެވެ.
