މިދިޔަ ހުކުރު ދުވަހު ކުރި "އިންޑިއާ އައުޓް" ހަރާކާތުގެ ތެރެއިން ހައްޔަރުކޮށް ބިޑިއަޅުވައި، ލާއިންސާނީ ގޮތްތަކަށް މެމްބަރު ސައީދާއިމެދު އަމަލުކޮށްފައިވާ ހިތްފަޅައިގެންދާ ކަމުގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
މަޖިލީހުގެ މިއަދުގެ ޖަލްސާގައި އާދަމް ޝަރީފް ހުށަހެޅުއްވި މައްސަލާގައި ވާހަކަ ދައްކަވަމުން ސައީދު ވިދާޅުވީ އިންސާނީ ހައްތުތަކޭ ކިޔައިގެން މިސަރުކާރުން ވާހަކަދައްކަން ލަދު ގަންނަން ޖެހޭކަމަށެވެ. ހުކުރު ދުވަހުގެ މުޒާހަރާގައި ހައްޔަރު ކުރުމަށްފަހު ޖަލަށް ގެންގޮސް ވަނީ ވަރަށް އަނިޔާވެރިގޮތަކަށް އަމަލުކޮށްފައިކަމަށް ސައީދު ވިދާޅުވިއެވެ.
އަދި ޖަލަށް ގެންގޮސް ބާތިއްބާފައިހުރި ގޮޅީގެ ފާނާގައިވެސް ހުރީ ކެމެރާ ހަރުކޮށްފައިކަމަށެވެ. ޤާނޫނު އަސާސީގައި ބަންދު ކުރެވޭ މީހާ 24 ގަޑިއިރުގެ ތެރޭގައި ގާޟީއެއްގެ ކުރިމައަށްޗަށް ގެންނަން ޖެހޭކަމަށް ބުނެފައިވާތީ 17 މީހުން ގެނެސް 8 ގަޑިއިރު ވަންދެން ގޮޑި ތަކުގައި އަތުރާފައި ބާތިއްބައި ބޮޑެތި ލާއިންސާނީ އަމަލު ހިންގާފައިވާކަމަށް ސައީދު ވިދާޅުވިއެވެ.
އަޅުގަނޑުމެން ގެންގޮސް ބައިތިއްބާފަ ހުރި ގޮޅިގެ ފާހާނައިގެ މަތީގެ މަތީގައި ކެމެރާ ހަރުކޮށްފަ. އިމްރާނު ގެނައި އިސްލާހު ފާހަނަ ތެރޭގައި މީހުންގެ އޮރިޔާން ބަލަންތޯ މި ކެމެރަ ހަރުކޮށްފައި މިހުންނަނީ. މީތޯ އެމްޑީޕީގެ އެޖެންޑާ 19 ތަފާތުވާ ގޮތަކީ. ކޮން ހިއުމަންރައިޓްއެއްތޯމީ. ގަޑިޖެހެންވާއިރަށް ފަނޑިޔާރެއްގެ ކުރިމައްޗަށް ގެންނަން ޖެހޭނެއޭ ބުނީމާ ބަކަރި ކޮށްޓެއްކަހަލަ ތަނަކަށް ގެެނސް 8 ގަޑިއިރު ވަންދެން 17 މީހުން އަތުރާލާފައިތިބީ. މިއީ ކޯޓޯ.
– ސައީދު ވިދާޅުވިއެވެ.
ސައީދުގެ ވާހަކަތަކާއި ގުޅިގެން މަޖިލިސް ރައީސް ވިދާޅުވީ، ސައީދަށް ލިބިވަޑައިގެންނެވި ލާއިންސާނީ އަނިޔާތަކާއިމެދު ހިތްފަޅައިގެން ގޮސްފައިވާކަމަށެވެ. އަދި ގޮޑިއެއްގައި އެހާގިނަ އިރު ބައިންދާފައި އިނުމުން މާބޮޑަށް ހިތްފަޅައިގެން ގޮސްފައިވަކަމަށް ނަޝީދު ވިދާޅުވިއެވެ.
އިއްޒަތްތެރި މެމްބަރަށް ތިދިމާވި އަނިޔާވެރި ގޮތުގެ ސަބަބުން އަޅުގަނޑުގެ ހިތް ފަޅައިގެންދޭ. ތިވިދާޅުވި 24 ގަޑިއިރު ގޮޅިގައި އިންނަވަން ޖެހިވަޑައި ގަތުމާއި، ގޮޑިއެއްގައި ބައިންދާފައި އިނުމާއި، އަޅުގަނޑުވެސް ހަމަ ހިތްފަޅައިގެންދިޔަ ތި ކަންކަމާ.
– މަޖިލިސް ރައީސް މުހައްމަދު ނަޝީދު ވިދާޅުވިއެވެ.
މުޒާހަރާގައި މެމްބަރު ސައީދާއި ޣައްސާން ހައްޔަރުކުރުމަށްފަހު ކޯޓަށް ގެނައީވެސް ބިޑިއަޅުވައިގެންނެވެ. މިމައްސަލަ ބެލުމަށް މަޖިލީހަށް ހުށަހެޅި ނަމަވެސް މިމައްސަލަ ބަލައި ނުގަންނަން މަޖިލީހުން ވަނީ ފާސްކޮށްފައެވެ.
