ހއ.އަތޮޅުގެ އެމްޑީޕީގެ އަންހެނުން ބޭނުންވަނީ އައު މީހަކަށް ފުރުޞަތު ދޭންކަމަށާއި، އެއަތޮޅުގައި ވަރަށް ތަޢީދު އެބައޮތްކަމަށް އެމްޑީޕީގެ އަންހެނުންގެ ރޫހުގެ ރައީސްކަމަށް ވާދަކުރައްވާ ޞަފާތު އަޙްމަދު ޒާހިރު ވިދާޅުވެއްޖެއެވެ.
އެމްޑީޕީގެ ޗެއަރޕާސަން އިންތިޚާބުކުރުމާއި އަންހެނުންގެ ރޫހުގެ ރައީސްއަކު އިންތިޚާބު ކުރުމަށް ބާއްވާ ކެމްޕެއިން ވަރަށް ފޯރީގައި ކުރިއަށްދަނީ އެހާމެ ވާދަވެރިކޮށެވެ. އަންހެނުންގެ ރޫހުގެ ރައީސްކަމަށް ޞަފާތާއި ވާދަކުރައްވަނީ ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެންބަރު ރޮޒައިނާ އާދަމެވެ.
ޞަފާތުވެސް ގެންދަވަނީ ކެމްޕެއިނަށް އަތޮޅުތަކަށް ވަޑައިގެން ދޮރުން ދޮރަށް ހިންގަވާ ކެމްޕެއިން ކުރައްވަމުންނެވެ. މިގޮތުން ޞަފާތު ވަނީ ހއގެ ބައެއް ރަށްރަށް ވަޑައިގެންފައެވެ. އޭގެ ތެރޭގައި ކެލާ، މުރައިދޫ، ވަށަފަރު، އިހަވަންދޫ އަދި ހޯރަފުށި ހިމެނެއެވެ. އެ ރަށްރަށުގައި ދޮރުން ދޮރަށް ހިންގަވާ އެރަށްރަށުގެ އެމްޑީޕީގެ މެންބަރުންނާއި އިސްކޮށް އުޅުއްވާ ބޭފުޅުންނާއި ބައްދަލުކުރައްވާފައިވެއެވެ.
މި ދަތުރާއި ގުޅޭގޮތުން ޞަފާތު ވިދާޅުވީ އެ ރަށްރަށުގައި އެކަމަނާއަށް ވަރަށް ތަޢީދު އެބައޮތްކަމަށެވެ. ހއ.ގެ އަންހެނުން ބޭނުންވަނީ މިފަހަރު އައު މީހަކަށް ފުރުޞަތު ދޭންކަމަށްވެސް ޞަފާތު ވިދާޅުވިއެވެ. ޞަފާތަށް ލިބިވަޑައިގަންނަވާ ފުރުޞަތަކީ ސިޔާސީ މައިދާނުގައި އައު އަންހެނަކަށް ލިބޭނެ ފުރުޞަތުކަމަށާއި، އަންހެނުންގެ މަސައްކަތްތަކުގައި އެކަމަނާއަށް ލިބިވަޑައިގެންފައިވާ ތަޖުރިބާއަށް ރިޔާއަތްކޮށް މިވަގުތު އަންހެނުންގެ ރޫހަށް އެންމެ އެދެވޭ ޚިދުމަތްތަކެއް ކޮށްދެވޭނީވެސް އެކަމަނާއަށްކަމަށް އެ އަތޮޅުގެ އަންހެނުން ޤަބޫކުރާކަން ޞަފާތު ފާހަގަކުރެއްވިއެވެ.
އެމްޑީޕީގެ އަންހެނުންގެ ރޫހުގެ ރައީސްކަމަށް ވާދަކުރައްވާ ޞަފާތަކީ ސިޔާސީ ޙަޔާތުގެ ފާއިތުވި 7 އަހަރުގައި އެމްޑީޕީ ފިޔަވައި އިތުރު އެހެން އެއްވެސް ޕާޓީއެއްގައި އުޅުއްވާފައިނުވާ ފަރާތެއްކަން އެމްޑީޕީގެ މެންބަރުން ފާހަގަކުރެއެވެ. ޞަފާތަކީ 2016 ވަނަ އަހަރުންފެށިގެން އެމްޑީޕީ އިޤްތިޞާދީ ކޮމިޓީއާއި އަންހެނުންގެ ރޫހުގެ އެކްޓިވް މެންބަރެކެވެ.
