އިނގިރޭސި އެފްއޭ ކަޕް ފުޓްބޯޅަ މުބާރާތުގެ ފަސް ވަނަ ބުރުގައި ރޭ ނޮވިޗް ސިޓީ ކޮޅަށް ލިވަޕޫލްގެ މިނަމީނޯ ޖެހި ދެ ލަނޑުން މޮޅުވެ މުބާރާތުގެ ކުއާޓާ ފައިނަލުން ޖާގައެއް ލިވަޕޫލް ކަށަވަރުކޮށްފިއެވެ.
ލިވަޕޫލްގެ އަމިއްލަ ދަނޑުގައި ކުޅުނު މި މެޗުގައި ނޮވިޗްގެ މައްޗަށް ލިވަޕޫލުން ކުރިހޯދީ 1-2 ގެ ނަތީޖާއަކުންނެވެ.
މި މެޗުގައި ލިވަޕޫލުން ޖެހި ދެ ލަނޑުވެސް ޖަހާފައިވަނީ މެޗުގެ ފުރަތަމަ ހާފުގައެވެ. އެގޮތުން ފުރަތަމަ ލަނޑު މެޗުގެ 27 ވަނަ މިނެޓުގައި އޮރީގީގެ އެހީތެރިކަމާއެކު ކާމިޔާބުކޮށްދިނީ ލިވަޕޫލްގެ ޖަޕާނުގެ ފޯވާޑް ޓަކޫމީ މިނަމީނޯއެވެ. ލިވަޕޫލަށް ލީޑު ފުޅާކޮށްދިން ލަނޑު 39 ވަނަ މިނެޓުގައި ކާމިޔާބުކޮށްދިނީވެސް މިނަމީނޯއެވެ. މި މެޗުގައި ނޮވިޗް ސިޓީން ޖެހި ހަމައެކަނި ލަނޑު ދެވަނަ ހާފުގައި އެޓީމަށް ކާމިޔާބުކޮށްދިނީ، ލުކަސް ރުޕްއެވެ.
މި މެޗުގެ އިތުރުން އެފްއޭ ކަޕް ފުޓްބޯޅަ މުބާރާތުގެ ފަސް ވަނަ ބުރުގައި ރޭ ސައުތެމްޓަނުން ވަނީ ވެސްޓް ހޭމް ޔުނައިޓެޑް ބަލިކޮށް ކުއާޓާ ފައިނަލަށް ދަތުރުކޮށްފައެވެ. ސައުތެމްޓަނުން ވެސްޓް ހޭމް ބަލިކުރީ 1-3 ގެ ނަތީޖާއަކުންނެވެ. މި މެޗުގައި ސައުތެމްޓަންގެ ލަނޑުތައް އެޓީމަށް ކާމިޔާބުކޮށްދިނީ، ރޮމެއިން ޕެރޯޑް އަދި ޖޭމްސް ވޯޑް ޕްރައުސްގެ އިތުރުން އަރްމާންޑޯ ބްރޯޖާއެވެ. ވެސްޓް ހޭމްގެ ހަމައެކަނި ލަނޑު އެޓީމަށް ކާމިޔާބުކޮށްދިނީ، މިކޭލް އެންޓޯނިއޯއެވެ.
