ރަޝިއާއިން ކުރޫޒު މިސައިލުން ޔޫކުރެއިންގެ އެކިސިޓީތަކަށް ހަމަލާ ދެމުންދާ ކަމަށާއި، އަދި ވެރިރަށް ކީވް ވަށާލުމަށްޓަކާ، ވެރިރަށް ކީވްގެ ކައިރީގައިވާ އަސްކަރީ ބޭސްތައް ރަޝިއާގެ ބާރުގެދަށް ގެންނަމުންދާ ކަމަށް ޔޫކުރެއިން ސަރުކާރުން ބުނެފިއެވެ. މިގޮތުން ރަޝިއާގެ އެއަރބޯން ޓްރޫޕްތަކުން ޔޫކުރެއިންގެ ވެރިރަށް ކީވްއާއި 25 މޭލު ދުރުގައިވާ އެންޓޮނޯވޯ އެއަރޕޯޓު މިހާރު ރަޝިއާގެ އަސްކަރިއްޔާގެ ބާރުގެ ދަށަށް ގެނެސްފައިވާކަމަށް ސީއެންއެންއިންވަނީ ރިޕޯޓު ކޮށްފައެވެ. އަދި ރަޝިއާގެ އަމާޒަކީ، ވެރި ރަށަށް ވަދެގަނެ، އެގައުމުގެ ސަރުކާރު ބަދަލު ކޮށްލުން ކަމަށް ވިދާޅުވެ، ވެރިރަށް ކީވްއަށް ވަދެގަތުމަށް ރަޝިއާގެ އަސްކަރިއްޔާއިން މަސައްކަތް ކުރަމުންދާ ކަމުގައި ބޯޑަރޔ އޮފިޝަލުންނާއި ހަވާލާދީ ޔޫކުރެއިންގެ ޑިފެންސް މިނިސްޓަރ ވިދާޅުވެއްޖެއެވެ.
ޔޫކުރެއިންގެ ނޭޝަނަލް ޕޮލިސް ފޯރސްއިން ބުނެފައިވަނީ، ރަޝިއާއިން ޔޫކުރެއިންގެ ހުރިހާ ސިޓީއަކަށް ހަމަލާ ދެމުން ދާކަމުގައެވެ. އަދި މީގެ އިތުރުން ޔޫކުރެއިންގެ ޑިފެންސް މިނިސްޓަރު ވިދާޅުވެފައިވަނީ، ހިގަމުންދާ ހަގުރާމައިގައި ރަޝިއާގެ ބައެއް ސިފައިން ރަހީނުންގެ ގޮތުގައި މިހާރު ހައްޔަރު ކުރެވިފައި ވާކަމުގައެވެ.
ހަމަ އެއާއެކު، ޔޫކުރެއިން އަސްކަރިއްޔާގެ 74 އަމާޒަކަށް ހަމަލާދީ އެތަންތަން ހަލާކު ކޮށްލާފައިވާކަމަށް ރަޝިއާގެ ޑިފެންސް މިނިސްޓްރީންވަނީ ބުނެފައެވެ. އަދި ރަޝިއާއިންވަނީ އެގައުމުގެ Su-25 މަރުކާގެ ފައިޓަރ ޖެޓެއް ޕައިލެޓަށް ހެދުނު ގޯހަކުން ގެއްލިފައިވާކަަމަށް ބުނެފައެވެ.
ރަޝިއާގެ ރައީސް ޕުޓިން ވަނީ، ޔޫކުރެއިންގައި ހިގަމުންދާ ހަމަނުޖެހުމުގެ ތެރެއަށް އެހެން ގައުމުތަކުން ވަދެއްޖެނަމަ، އެގައުމުތަކުގެ ތާރީޚުގައި ދެކެފައި ނުވާފަދަ ބޮޑެތި ގޮންޖެހުމާއި ކުރިމަތިލާން ޖެހޭނެކަމަށް ވިދާޅުވެ ޔޫރަޕްގެ ގައުމުތަކަށް އިންޒާރު ދީފައެވެ. އަދި ރަޝިއާއިން ބުނެފައިވަނީ، އެގައުމާ ދެކޮޅަށް ޔޫރަޕްގެ ގައުމުތަކުން އަޅަމުންދާ ފިޔަވަޅުތަކާއި އެއްވަރުގެ ދަތިކުރުމުގެ ފިޔަވަޅުތައް އެގައުތަކާއި ދެކޮޅަށް ރަޝިއާއިންވެސް އަޅާނެ ކަމުގައެވެ.
ރަޝިއާއިން ޔޫކުރެއިންއަށް އުދުވާނީ ހަމަލާ ދޭން ފަށާފައިވާއިރު، ނޭޓޯއިން ދަނީ، އެ ޖަމާއަތުގެ މެމްބަރު ގައުމުތަކަށް ސިފައިންނާ ހަތިޔާރުތައް ޖަމާކުރަމުންނެވެ. އެމެރިކާ އަދި އިގިރޭސިވިލާތުގެ އިތުރުން ޔޫރަޕްގެ އެހެން ގައުމުތަކުންވެސް ވަނީ، ޔޫކްރެއިންގެ ވަށައިގެންވާ، ސޯވިއެޓް ޔޫނިއަންގައި ކުރިން ހިމެނުނު، މިހާރު ނޭޓޯގެ މެމްބަރު ގައުމުތަކުގެ ގޮތުގައި ހިމެނޭ ގައުމުތަކަށް ސިފައިން ޖަމާ ކުރަމުންނެވެ. އަދި މިއިން އެއްވެސް ގައުމަކަށް އުދުވާނީ ހަމަލާ ދީފިނަމަ، ރައްދު ހަމަލާދޭނެ ކަމުގެ އިންޒާރު ނޭޓޯއިންވަނީ ދީފައެވެ.
ނޭޓޯގެ ޗާޓަރުގައި ވާގޮތުން، އެ ޖަމާއަތުގެ އެއްވެސް މެމްބަރުގައުމަށް އުދުވާނި ހަމަލާއެެއް ދީފިނަމަ، އެ ގައުމެއް ހިމާޔަތް ކުރުމަކީ ހުރިހާ މެމްބަރު ގައުމުތަކުގެ ޒިންމާއެކެވެ.
