އޭއެފްސީ އޭޝިއަން ކަޕް ކޮލިފައިންގައި ރާއްޖޭ އާއެކު އެއް ގްރޫޕެއްގައި އުޒްބެކިސްތާން ތައިލެންޑް އަދި ސްރީލަންކާ ހިމެނިއްޖެއެވެ.
އަންނަ އަހަރު ޗައިނާގައި ބާއްވާ އޭޝިއަން ކަޕުގެ ކޮލިފައިންގައި ރާއްޖެ ހިމެނުނީ ގްރޫޕް ސީ ގައެވެ. ގްރޫޕް ސީ ގެ މެޗުތައް ކުޅުމަށް ހަމަޖެހިފައިވަނީ ސެންޓްރަލައިޒްކޮށް އަންނަ ޖޫން މަހު އުޒްބެކިސްތާންގައެވެ.
ކޮލިފައިންގައި ރާއްޖެ ކުޅޭ ފުރަތަމަ މެޗުގައި ޖޫން މަހުގެ 8 ވަނަ ދުވަހު ރާއްޖެ ނުކުންނާނީ، ތައިލެންޑާއި ދެކޮޅަށެވެ. އަދި ދެވަނަ މެޗުގައި ޖޫން 11 ވަނަ ދުވަހު ކޮލިފައިން މެޗުތައް ބާއްވާ އުޒްބެކިސްތާނާއި ދެކޮޅަށް ނުކުންނައިރު، ފަހު މެޗުގައި ޖޫން 14 ވަނަ ދުވަހު ނުކުންނާނީ ސްރީލަންކާ އާއި ދެކޮޅަށެވެ.
އޭޝިއަން ކަޕްގެ ކޮލިފައިން ހަ ގްރޫޕުގެ އެއް ވަަނަ ޓީމާއި ހަ ގްރޫޕްގެ ދެ ވަނަ ޓީމުތަކުގެ ތެރެއިން ފަސް ޓީމަށް ޗައިނާގައި 2023 ވަނަ އަހަރު ބާއްވާ އޭޝިއަން ކަޕްގެ ޖާގަ ލިބޭނެ އެވެ. މިހާރު އޮތްގޮތުން އޭޝިއަން ކަޕް ކުރިއަށްދާނީ 2023 ވަނަ އަހަރުގެ ޖޫން 16 އިން ޖުލައި 16 ގެ ނިޔަަލަށެވެ.
