ރަޝިއާގެ ރައީސް ލާޑިމިރު ޕުޓިންގެ އޯޑަރަށް ރަޝިއާގެ އަސްކަރިއްޔާއިން އިރުމަތީ ޔޫކުރެއިންއަށް ވަދެއްޖެއެވެ. އަދި ރަޝިއާގެ އަސްކަރިޔާއިން އިރުމަތީ ޔޫކުރެއިންގައި ހިންގާ ޚާއްސަ އަސްކަރީ އޮޕަރޭޝަން ޔޫކުރެއިންގެ ޑޮންބަސް ރީޖަންގައި ކުރިޔަށް ދާނެކަން އިއުލާން ކުރައްވަމުން ޕުޓިން ވަނީ އެސަރަހައްދުގައި ތިބި ޔޫކުރެއިން ސިފައިން ހަތިޔާރު ބެހެއްޓުމަށް އަމިއްލަ ގެތަކަށް ދިއުމަށްވެސް ގޮވާލައްވާފައެވެ.
އަދި ޕުޓިންވަނީ، އެގައުމުގެ އަސްކަރިއްޔާ ޔޫކުރެއިންގެ އިރުމަތީ ޑޮންބަސް ސަރަހައްދުގައި ކުރިޔަށްދާ އަސްކަރީ އޮޕަރޭޝަންގެ ރައްދުގައި އެއްވެސް ފަރާތަކުން ރަޝިއާއަށް ހަމަލާދީފި ނަމަ އެފަރާތަކަށް ވަގުތުން ރައްދު ހަމަލާ ދޭނެކަމުގެ އިންޒާރުވެސް ދީފައެވެ.
ރަޝިއާއިން އިރުމަތީ ޔޫކުރެއިންއަށް އެރުމާއި ގުޅިގެން، ޔޫކުރެއިންގެ ފޮރިންގ މިނިސްޓަރވަނީ، ރަޝިއާއިން މުޅި ޔޫކުރެއިން ހިފުމުގެ ހަގުރާމަ ފަށާފައިވާ ކަމަށް ވިދާޅުވެ، ރަޝިއާގެ އުދުވާން ހުއްޓުވައި ދިނުމަށް ޔޫއެންގެ ކިބައިން އެދިފައެވެ. އަދި އެމެރިކާގެ ރައީސް ޖޯ ބައިޑްންވަނީ، އެތައްބައެއް ފުރާނަ ގެއްލިގެން ދާނެކަމަށް ވިދާޅުވެ، މުޅި ދުނިޔެ އެކަތިގަޑެއްގެ ގޮތުގައި، ރަޝިއާ ޒިންމާދާރު ކުރުވާނެކަމުގެ އިންޒާރުވެސް ދީފައެވެ.
އަދި ރަޝިއާއި ދެކޮޅަށް އަޅާނެ އިތުރު ފިޔަވަޅުތައް އިއުލާން ކުރެއްވުމަށްޓަކާ ބުރާސްފަތި ދުވަހު ބައިޑްން އެމެރިކާގެ ރައްޔިތުންނާއި މުޚާތަބް ކުރެއްވުމަށް ވަނީ ހަމަޖެހިފައެވެ.
ނޭޓޯގެ ޗީފް ޖެންސް ސްޓޮލްޓެމްބާގް ވިދާޅުވެފައިވަނީ މި ދަތި އުދަގޫވަތު ނޭޓޯ އޮތީ ޔޫކުރެއިންއާއެކު ކަމަށާއި، ނޭޓޯގެ ހުރިހާ ބައިވެރިންވެސް ހިމާޔަތް ކުރުމަށް ކުރެވެންހުރި ހުރިހާ މަސައްކަތެއް ކުރައްވާނެ ކަމަށެވެ.
ޔޫކުރެއިންގެ ރައީސް ވޮލޮޑިމިރު ޒެލެންސްކީ ވިދާޅުވެފައިވަނީ، ރަޝިއާއިން ޔޫކުރެއިންއަށް އެރުމަކީ މުޅި ޔޫރަޕްގެ ބައްރާއި ދެކޮޅަށް ރަޝިއާއިން ކުރިޔަށް ގެންދާނެ ހަގުރާމައިގެ ފެށުން ކަމުގައެވެ. އަދި ރޭގެ ދަންވަރު އެގައުމުގެ ރައްޔިތުންނާއި މުޚާތަބުކޮށް ވާހަކަ ދައްކަވަމުން ޒެކެންސްކީވަނީ، އެގައުމަށް ރަޝިއާއިން ހަމަލާ ދީފިނަމަ އެގައުމު ދިފާއު ކުރައްވާނެކަމަށް ތަކުރާރުކޮށް ވިދާޅުވެފައެވެ.
ޔޫކުރެއިންއިން މިއަދުވަނީ އެގައުމުގެ ވެރިރަށް ކީވްގައި، ރޭގެ ދަންވަރު 12އިން ފެށިގެން އެއް މަސްދުވަހުގެ މުއްދަތަށް ކުއްލި ނުރައްކަލުގެ ހާލަތު އިއުލާން ކުރައްވާފައެވެ.
ކޮމެންޓު ފޮނުވާ