ޓުވަރިޒަމްގެ ރަންޔޫބީލް ރާއްޖޭގައި ފާހަގަ ކުރަމުންދާއިރު، ރަލާއި، ނުލައި ޚިދުމަތް ދޭން ރާއްޖެ ނުކުޅެދުމަކީ ލަދުގަންނަންޖެހޭ ކަމެއް ކަމުގައި ދީނީ އިލްމުވެރިޔާ ޝައިޚު އަލީ ޒައިދު ވިދާޅުވެއްޖެއެވެ.
ރާއްޖޭގެ ފަތުރުވެރިކަމަށް 50 އަހަރު ފުރުން ކުލަދަގަކޮށް ދަނީ ފާހަގަކުރަމުންނެވެ. އަހަރުގެ އެކި ދުވަސްތަކުގައި 50 އަހަރުގެ އެކި ހަރަކާތްތައް ވަނީ ރާވާލާފައެވެ.
ފަތުރުވެރިކަމަށް 50 އަހަރު ފުރިގެންދާއިރު، ރާއްޖޭގެ ޓުވަރިޒަމް ދާއިރާގައި އަދިވެސް ރަލުގެ ޚިދުމަތް ދެމުންދާތީ ޝައިޚު ޒައިދުގެ ފާޑުކިޔުންވަނީ އަމާޒުވެފައެވެ. ޒައިދު ވިދާޅުވީ ފާއިތިވެދިޔަ 50 އަހަރު ރާއްޖެއަށް ރަލާއި ނުލައި ޓުވަރިޒަމް ކުރިއަރުވަން ނޭގުމަކީ ލަދުގަނަންޖެހޭ ކަމެއްކަމަށެވެ. ލިބޭ ކުރިއެރުމަކީ މަސްތުވާތަކެތީގެ ވިޔަފާރިއާއި ދުރުވެ، ހޯދޭ ކާމިޔާބީކަމުގައި ޒައިދު ވަނީ ވިދާޅުވެފައެވެ.
ޓުވަރިޒަމަށް 50 އަހަރު ވީއިރު ރަލާއި، ނުލައި ޚިދުމަތް ދޭން ރާއްޖެ ނުކުޅެދުމަކީ ލަދުގަންނަންޖެހޭ ކަމެއް! ކޮބައިތޯ އަސްލު ހޯދުނު ކާމިޔާބަކީ، ހޯދުނު ތަރައްޤީ އަކީ ސުވާލު ކޮށްލަންޖެހޭ! މަސްތުވާތަކެތީގެ ވިޔަފާރި ކޮށްގެން ބަނޑަށް އެއަޅަނީ އަލިފާން! ކިތަންމެ ގިނަ ބަޔަކު ކުރިޔަސް!
– ޒައިދު ވިދާޅުވިއެވެ.
މިއަހަރު ރާއްޖޭގައި ފަތުރުވެރިކަމުގެ ރަންޔޫބީލް ފާހަގަ ކުރަމުންދާއިރު ޚާއްސަ ހަރަކާތްތަކެއް ދަނީ ކުރިއަށް ގެންދަމުންނެވެ. އެގޮތުން ރާއްޖޭގެ މީހުން ދިރިއުޅޭ ރަށްތަކުގައި ހޯމސް ސްޓޭ ތަޢާރަފް ކުރުމާއި، މިނޫންވެސް ފަތުރިވެރިކަމާއި ގުޅުންހުރި އާ ކަންތައްތަކެއް ދަނީ ތަޢާރަފް ކުރަމުންނެވެ.
ހޯމް ސްޓޭއަކީވެސް ގިނަ ދީނީ އިލްމުވެރިންގެ ފާޑުކިޔުން އަމާޒުވިކަމެކެވެ.
