ރައްޔިތުންގެ މަޖިލީހުގެ ރައީސްކަމުގައި، މަޖިލީހުގެ މެމްބަރުންގެ ތާއީދެއް ނެތް ކަމަށާއި، މިހާރު މަޖިލީހުގެ ރައީސްކަމުން މުހައްމަދު ނަޝީދު ވަކި ކުރަންޖެހޭކަމަށް ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު ޖާބިރު ވިދާޅުވެއްޖެއެވެ.
މިއަދު މަޖިލީހުގައި ވާހަކަ ދައްކަވަމުން ޖާބިރު ވިދާޅުވީ، މަޖިލީހުގެ ސުޕަމެޖޯރިޓީ އޮތް އެމްޑީޕީގ ޕީޖީ ލީޑަރުގެ މަޤާމާއި، އެޕާޓީގެ ޕީޖީގެ އެކި މަޤާމުތައް އިންތިޚާބު ވެފައިވާ ގޮތަށްބަލާއިރު ނަޝީދަށް މަޖިލީހުގައި ތާއީދެއްނެތްކަން ހާމަވާކަމަށެވެ. މަޖިލީހުގެ ރައީސަކަށް އިންނަންވާނީ މެމްބަރުންގެ ތާއީދު އޮތް ބޭފުޅެއްކަމަށާއި، މިއަދު މަޖިލީހުގެ މެމްބަރުންގެ ތާއީދު އޮތީ އަސްލަމަށް ކަމަށް ޖާބިރު ވިދާޅުވިއެވެ.
ތާއީދު ނެތް ރައީސަކު މަޖިލީހުގެ ގޮޑީގައި އިދެގެން ނުވާނެ. މަޖިލީހުގެ މިއަދު އެމަނިކުފާނަށް އައުލަބިއްޔަތު ގެއްލިއްޖެ. މަޖިލީހުގެ ރައީސްކަމަށް އެންމެ ރަނގަޅު ބޭފުޅަކީ އަސްލަމް.
– ޖާބިރު ވިދާޅުވިއެވެ.
އެމްޑީޕީގެ ޕާލަމެންޓްރީ ގުރޫޕްގެ އިންތިޚާބުގައި، އާލީ އާޒިމްއާއި ވާދަކޮށް އެމްޑީޕީގެ ޕީޖީ ލީޑަރުކަން ހިތަދޫ އުތުރު ދާއިރާގެ މެންބަރު މުޙައްމަދު އަސްލަމް ވަނީ ކާމިޔާބުކޮށްފައެވެ. އެމްޑީޕީގެ ޕީޖީ ގުރޫޕުގެ އިންތިޚާބު އަސްލަމް ކާމިޔާބު ކުރައްވާފައި ވަނީ ޕީޖީ ގުރޫޕުގެ 40 މެމްބަރުންގެ ވޯޓު ހޯއްދަވައިގެންނެވެ. އަސްލަމްއާއި ވާދަކުރެއްވި މެދުހެންވޭރު ދާއިރާގެ މެމްބަރު އަލީ އާޒިމަށް ލިބިފައިވަނީ 25 ވޯޓެވެ.
އެމްޑީޕީގެ ޕީޖީ ލީޑަރުގެ އިންތިޚާބުގައި ރައީސް ނަޝީދަށް ތާއީދު ކުރާ މެމްބަރުން ބަލިވެފައިވާއިރު، މިއިންތިޚާބުގައި ހުރިހާ ގޮޑިއެއް ކާމިޔާބް ކޮށްފައިވަނީ ރައީސް ޞާލިހަށް ތާއީދުކުރާ މެމްބަރުންނެވެ. މިއިންތިޚާބާއިއެކު އެމްޑީޕީގެ ޕީޖީ ތެރޭގައި ރައީސްގެ ނުފޫޒު އިތުރަށް ގަދަވެގެންދާނެކަމަށް ގިނަ ބޭފުޅުންދެކެއެވެ.
