ގައުމީ ޔުނިވަރސިޓީ، އެމްއެންޔޫގެ މެޑިސިން ސްކޫލުގައި ކިޔަވާ ދަރިވަރުންތަކަކަށް ގަނާ ކުރި މައްސަލައެއް ބަލަމުން އަންނަ ކަމަށް އެ ޔުނިވަރސިޓީން މިއަދު ބުނެފިއެވެ.
ގައުމީ ޔުނިވަރސިޓީން ނެރުނު ބަޔާނެއްގައި ބުނީ މެޑިސިން ސްކޫލްގައި ކިޔަވާ ދަރިވަރުންތަކަކަށް ގަނާ ކުރާ މައްސަލައެއްގެ ޝަކުވާ ޔުނިވަސިޓީގެ ވައިސް ޗާންސެލަރ ޑރ. މުހައްމަދު ޝަރީފަށް މިދިޔަ ބުރާސްފަތި ދުވަހު ހުށަހަޅާފައިވާ ކަމަށެވެ.
ގަނާ ކުރުމަކީ ދަރިވަރުންގެ ކޯޑް އޮފް ކޮންޑަކްޓްގައި މަނާކަމެއް ކަމަށާއި އެކަން ޔުނިވަރސިޓީގެ މައްސަލަ ބަލާ ކޮމެޓީ އަކުން ތަހުގީގު ކުރަމުންދާ ކަމަށްވެސް އެމްއެންޔޫއިން ބުނެއެވެ. އަދި މައްސަލަ ނިމުނުހާ އަވަހަށް އެކަން ހިނގާފައިވާ ގޮތް ދަރިވަރުންނާ ހިއްސާކޮށް އަޅަންޖެހޭ ފިޔަވަޅުތައް އަޅާނެ ކަމަށްވެސް ބަޔާނުގައި ބުނެފައިވެއެވެ.
އެމްއެންޔޫގެ ތެރެއިން ކުރިމަތިވާ ގަނާކުރުމުގެ ކަންތައްތަކާ ގުޅޭގޮތުން ބައެއް ދަރިވަރުން ވަނީ ސޯޝަލް މީޑިއާގައި ވާހަކަ ދައްކާފައެވެ. އެގޮތުން އެއް ދަރިވަރަކު ބުނެފައިވާގޮތުގައި އޭނާ އާއި އޭނާގެ ރައްޓެއްސަކަށް ގަނާކޮށްފައިވަނީ ޔުނިވާސިޓީގެ ދަރިވަރެއް ކަމަށާއި އެކިއެކި ގޮތްގޮތުން ގަނާގެ ޝިކާރައަކަށް ވެފައިވާތާ 2 ވަރަކަށް އަހަރު ވެއްޖެ ކަމަށެވެ. އަދި މިފަދަ މައްސަލަތައް މެޑިސިން ސްކޫލްގެ ޑީންއަށް ހުށަހެޅުމުން ވެސް އަޅާނުލާ ކަމަށްވެސް ދަރިވަރުން ބުނެފައިވެެއެވެ.
އެއް ދަރިވަރަކު ބުނި ގޮތުގައި އެމްއެންޔޫ ވެފައި ވަނީ ގަނާ ކުރާ މީހުންނަށް ތާއީދުކޮށް އެމީހުން ރައްކާތެރިކުރާ ތަނަކަށެވެ.
