الحمد لله، والصلاة والسلام على نبينا محمد وعلى آله وصحبه وسلم، وبعد:
ފަތިސްނަމާދު ގެ ކުރިން އޮންނަ ދެރަކްޢަތަކީ ވަރަށް މަތިވެރި، ދަރަޖަ ބޮޑު ދެރަކްޢަތެވެ. ކީރިތި ރަސޫލާ-ޞައްލަﷲ ޢަލައިހިވަސައްލަމަ- ދަތުރުމަތީގައިވެސް އަދި އެނޫން ދުވަސް ތަކުގައިވެސް ދޫކޮށް ނުލައްވާ ދެރަކްޢަތެވެ. އަދި އެ ދެރަކްޢަތަކީ ދުނިޔެ އާއި ދުނިޔޭގައި ވާހާ ތަކެއްޗަށްވުރެ މާތްކަން ބޮޑު ދެރަކްޢަތް ކަމުގައި ޙަދީޘް ގައި އައިސްފައިވެއެވެ.
ފަތިސްނަމާދުގެ ކުރިން މި ދެރަކްޢަތް ނުކުރެވިއްޖެނަމަ ފަހުންވެސް ކުރެވިދާނެއެވެ. ގައިސް ބިން ޢަމްރު-ރަޟިޔަﷲ ޢަންހު-ގެ ކިބައިން ރިވާ ވެގެންވެއެވެ. ކީރިތި ރަސޫލާ-ޞައްލަﷲ ޢަލައިހި ވަސައްލަމަ- ނިކުންނެވި ތަނުން ގަމަތް ދީފިއެވެ. ތިމަންކަލޭގެ ފާނު ކީރިތި ރަސޫލާ-ޞައްލަﷲ ޢަލައިހިވަސައްލަމަ-ގެ އަރިހުގައި ނަމާދު ކޮށްފީމެވެ. ރަސޫލާ-ޞައްލަﷲ ޢަލައހި ވަސައްލަމަ- މިސްކިތުން ނިކުމެވަޑައި ގަންނަވަނިކޮށް ތިމަން ކަލޭގެފާނު ނަމާދު ކުރައްވަނިކޮށް ފެނިވަޑައިގެން ކީރިތި ރަސޫލާ-ޞައްލަﷲ ޢަލައިހި ވަސައްލަމަ- ޙަދީޘް ކުރެއްވިއެވެ. "އޭ ގައިސެވެ. މަޑުކޮށްލާށެވެ. އެއްވަގުތެއްގައި ދެނަމާދު ތޯއެވެ؟" ތިމަންކަލޭގެފާނު ދެންނެވީމެވެ. "ތިމަންކަލޭގެފާނު ފަތިސްނަމާދުގެ އިހު ސުންނަތުގެ ދެރަކްޢަތް ނުކޮށް ހުރީމާ ކޮށްލަނީއެވެ"، ދެން ކީރިތި ރަސޫލާ-ޞައްލަﷲ ޢަލައިހި ވަސައްލަމަ- ވަކި އެއްޗެއް ވިދާޅުނުވެ ވަޑައިގެންފިއެވެ.
އަލްއިމާމުލް ޚައްޠާބީ-ރަޙިމަހުﷲ- ވިދާޅުވިއެވެ: "މި ޙަދީޘް އިން ބަޔާންވާ ގޮތުގައި ފަތިސްނަމާދުގެ އިހު ސުންނަތް ނުކުރެވިއްޖެމީހާ، ނަމާދުފަހުން، އިރު އެރުމުގެ ކުރިންވެސް ކުރިވިދާނެއެވެ".
والله أعلم.
