މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ތަހުގީ ކުރާ ކޮމިޝަނަށް ސީނިއާ ރިސާޗް އޮފިސަރެއް ހޯދަން އަނެއްކާވެސް އިއުލާނުކޮށްފިއެވެ.
މިއީ މަރު ކޮމިޝަނަށް ރިސާޗް އޮފިސަރެއް ހޯދަން އިއުލާނު ކުރި ދެވަނަ ފަހަރެވެ. ކުރީން އިއުލާނު ކުރީ ޖަނަވަރީ 29 ވަނަ ދުވަހުއެވެ.
މިމަގާމުގެ އަސާސީ މުސާރައެއްގެ ގޮތުގައި 6,295 ރުފިޔާ ކަނޑައަޅާފައިވާއިރު, ހާއްސަ އެލަވެންސްގެ ގޮތުގައި 2،832 ރުފިޔާއާ އެކު ޖުމްލަ 11،127 ރުފިޔާ ލިބޭނެއެވެ. ރިސަރޗް އޮފިސަރ ކުރަންޖެހޭ މަސައްކަތުގެ ގޮތުގައި ފާހަގަކޮށްފައިވަނީ, ކޮމިޝަނުން ތަހުގީގުކުރަމުންދާ މައްސަލަތަކާގުޅޭ ރިސަރޗް ހެދުމާއި, އެ މައްސަލަތަކުގެ ބްރީފް ތައްޔާރުކޮށް މިކަންކަމާ ގުޅޭގޮތުން ފޮނުވަން ޖެހޭ ލިޔުންތައް ތައްޔާރުކޮށް ފޮނުވުމާއި، ބާއްވަން ޖެހޭ ބައްދަލުވުންތައް އިންތިޒާމުކުރުމާއި, ބައްދަލުވުންތަކުގެ ޔައުމިއްޔާ ތައްޔާރުކޮށް, ފޮނުވަން ޖެހޭ ފަރާތްތަކަށް ފޮނުވުމެވެ. އަދި ފޮލޯއަޕްހަދައި ބެލެހެއްޓުމުގެ އިތުރުން ޑޭޓާބޭސް ސެޓްއަޕްކޮށް ބެލެހެއްޓުމާއި މެނޭޖްކުރުންވެސް ހިމެނެއެވެ.
މި މަގާމަށް ޝަރުތު ފުރިހަމަވާ މީހުން ރައީސުލްޖުމްހޫރިއްޔާގެ އޮފީހުގެ ވަޒީފާއަށް އެދޭ މީހުން ފުރިހަމަކުރާ މައުލޫމާތު ފޯމާއެކު، 20 ފެބުރުވަރީ ވާ ބުދަ ދުވަހުގެ 14:00ގެ ކުރިން ހުށަހެޅުމަށް ރައީސް އޮފީހުން ބުނެއެވެ.
މަރު ކޮމިޝަނަށް ރިސާޗް އޮފިސަރަކު ހޯދަން އިއުލާންކޮށްފައިވާއިރު އެ ކޮމިޝަނާ ހަވާލުވެފައިވާ މަސްއޫލިއްޔަތު އަދާ ނުކުރެވޭ ކަމަށް ބުނެ ކޮމިޝަނަށް އާންމުން ގެންދަނީ ވަރަށް ބޮޑަށް ފާޑުކިޔަމުންނެވެ. ޚާއްސަކޮށް، ވެރިކަން ކުރާ މައި ޕާޓީ (އެމްޑީޕީ) އަށް ނިސްބަތްވާ ބޭފުޅުންވެސް ވަނީ އެކޮމިޝަން އުވާލަން ޖެހޭކަމަށް ވިދާޅުވެފައެވެ.
