ލުބުނާންގެ ހިޒުބުﷲ ޖަމާއަތުން މިހާރު ދަނީ ހަގުރާމަމަތީ ޑްރޯން އުފައްދަމުން ކަމަށާއި، އަދި މި ޑްރޯންތައް، އަމާޒަށް ވާސިލްވާ މިސައިލްތަކަށް ބަދަލު ކޮށްލުމުގެ ގާބިލްކަން އެ ޖަމާއަތުގައި މިހާރު ހުރިކަމަށް ހިޒްބުﷲ ޖަމާއަތުގެ ލީޑަރު ހަސަން ނަސްރުﷲ ބުދަ ދުވަހު ވިދާޅު ވެއްޖެއެވެ.
"އަހަރެމެން މިދަނީ ފާއިތުވެދިޔަ މުއްދަތުގައި ޑްރޯން އުފައްދަމުން، އަދި މި ޑްރޯންތައް ގަންނަން ބޭނުންވާ ފަރާތްތަކުން އެކަމަށް އެދެންވީ،" ތާއީދުކުރާ ފަރާތްތަކާ ޓީވީ މެދިވެރިކޮށް ވާހަކަ ދައްކަވަމުން ނަސްރުﷲ ވިދާޅު ވެފައި ވެއެވެ.
ހިޒްބުﷲ ޖަމާއަތަކީ ލުބުނާނުގައި ހަރަކާތްތެރި ވަމުން އަންނަ ހަގުރާމަވެރި ޖަމާއަތެކެވެ. އަދި 1992 ވަނަ އަހަރުންފެށިގެން މިޖަމާއަތުގެ ވެރިއަކަށް ހުންނަވަމުން ދަނީ އެޖަމާއަތުގެ ސެކެޓްރީ ޖެނެރަލެއްގެ ހައިސިއްޔަތުން ހަސަން ނަސްރުﷲ އެވެ.
ހިޒްބުﷲ ހަމާއަތުގެ އަސްކަރީ ގާބިލްކަން ވަނީ 2006ވަނަ އަހަރުން ފެށިގެން ވަރަށް ބޮޑަށް އިތުރުވެގެން ގޮސްފައެވެ. މިގޮތުން އެ ޖަމާއަތުގެ އަސްކަރީ ބާރު ލުބުނާނުގެ އަސްކަރިއްޔާއަށްވުރެ ފަހަކަށް އައިސްވަނީ ވަރުގަދަ ވެގެން ގޮސްފައެވެ. އަދި ހިޒުބުﷲ ހަމާއަތުގެ ބާރު ލުބުނާނުގައި ގަދަވެ، އެ ޖަމާއަތަށް ނިސްބަތްވާ ވަޒީރުން ލުބުނާނުގައި ކެބިނެޓްގައިވެސް ހިމެނިގެން ގޮސްފައިވެއެެވ. އަދި މިޖަމާއަތުން ރޭޑިއޯ ސްޓޭޝަނަކާއި އަމިއްލަ ޓީވީ ސްޓޭޝަނެއް ހިންގާ، އިޖުތިމާޢީ އެތައް ޚިދުމަތެއް ފޯރު ކޮށްދިނުމުގެ އިތުރުން މިޖަމާއަތުގެ ހަގުރާމަވެރިން ލުބުނާނުގެ އެކި ކަންކޮޅުތަކުގައި ހަރަކާތްތެރި ވަމުންދެއެވެ.
ހިޒްބުﷲ ޖަމާއަތަކި އިރާނުން އެހީތެރި ވެދެމުންދާ ޖަމާއަތެކެވެ.
