ކުރީގެ ރައީސް މުހައްމަދު ނަޝީދުގެ ހުރިހާ ހާސްކަމަކީ ވެރިކަން ނުލިބިއްޖެނަމަ ޖާހަތު ގެއްލިދާނެތީ ކަމުގައި ކުރީގެ ނައިބް ރައީސް ޑރ.މުހައްމަދު ޖަމީލް އަހުމަދު ވިދާޅުވެއްޖެއެވެ.

ޑރ.ޖަމީލް މިހެން ވިދާޅުވީ އެމްޑީޕީގެ ވެރިކަމެއް އަބަދަށްމެ އޮތުމަށް އެންމެ ގިނަ ވޯޓް ލިބޭ ކެންޑިޑޭޓަށް ރިޔާސީ އިންތިހާބު ކާމިޔާބުވާ އުސޫލަށް ގާނޫނު އަސާސީ ބަދަލުކުރުން މުހިންމު ކަމަށް އެމްޑީޕީގެ ރައީސް މުހައްމަދު ނަޝީދު ވިދާޅުވެ ދައްކަވަމުންދާ ވާހަތަކަށް އިޝާރާތް ކުރައްވާކަމަށް ބެލެވެއެވެ.

ނަޝީދުގެ ވާހަކަތަކާއި ގުޅިގެން ޖަމީލް ވިދާޅުވީ އެއްވެސް މީހަކަށް އެކަނި އެމީހެއްގެ ޖާހަތައްޓަކައި، ރައްޔިތުންގެ ފައިސާ ޚަރަދުކޮށްގެން ވެރިކަން ކުރަންވީ ގޮތެއް ނުނިންމޭނެކަމަށެވެ. ރައީސް ނަޝީދަކީ އަބަދުވެސް ވެރިކަން ނުލިބިއްޖެނަމަ، އަމިއްލަ ޖާހަތު ގެއްލިދާނެތީ އެކަމާއި ބިރުން އުޅުއްވާ ބޭފުޅެއްކަމަށް ޖަމީލް ވިދާޅުވިއެވެ.

އެއްވެސް މީހަކަށް އެކަނި ރައްޔިތުންގެ ފައިސާއާއި ވެރިކަންކުރަންވީ ގޮތް ނުނިންމޭނެ. ރައީސް ނަޝީދުގެ ހުރިހާ ހާސްކަމަކީ ވެރިކަން ނުލިބިއްޖެނަމަ ޖާހަތު ގެއްލޭތީ. މުރައިދޫ ގަނޑުވަރާއި އިމެއްނެތް ޚަރަދު. ދަހިވެތިކަން ހައްދުން ނައްޓައި ރަންނަމާރި ގޮތަށް ރައްޔިތުންނަށް ބިރަކަށްވެއްޖެ.

– ޖަމީލް ވިދާޅުވިއެވެ.

ރައީސް ނަޝީދުގެ ހުށަހެޅުއްވުމާ ގުޅިގެން އިދިކޮޅު ފަރާތްތަކާއި ބައެއް އާންމުން ގެންދަނީ ސޯޝަލް މީޑިއާގައި ރައީސް ނަޝީދަށާއި އެމްޑީޕީއަށް ވަރަށް ބޮޑަށް ފާޑު ކިޔަމުންނެވެ. އަދި ރައީސް ނަޝީދުގެ މިފޯމިއުލާއަކީ ހަމައެކަނި އެމްޑީޕީއަށް ވެރިކަން ކުރެވޭނެ ފޯމިއުލާއެއް ހޯދުމަށް ނަޝީދު ކުރައްވާ މަސައްކަތެއްގެ ގޮތުގައި ގިނަ ބަޔަކު ދަނީ ބުނަމުންނެވެ.

ޤާނޫނު އަސާސީގައި މިހާރު ކަނޑައަޅާފައިވަނީ ވެރިކަމަށް އާދެވޭނީ ރައްޔިތުންގެ 50 އިންސައްތައަށްވުރެއް މަތިން ވޯޓުލިބޭ ފަރާތެއްކަމަށެވެ.