މަޢުލޫމާތު ހޯދައި ލިބިގަތުމުގެ މައްސަލަތައް އިސްތިއުނާފްކުރުމާއި ގުޅޭގޮތުން ހައި ކޯޓުން ނެރުނު ޢަމުރު ގޯސްކަމަށް ކަނޑައަޅައި، އިސްތިއުނާފްގެ އެފަދަ މައްސަލަތައް ހައިކޯޓުން ބަލަން ޖެހޭކަމަށް ސުޕްރީމް ކޯޓުން ޙުކުމްކޮށްފިއެވެ.
އެމްޑަބްލިއުއެސްސީގެ މުވައްޒަފަކު ވަޒީފާއިން ވަކިކުރި މީހަކު، އިންފޮމޭޝަން ކޮމިޝަނަރުގެ އޮފީސް މެދުވެރިކޮށް ހޯދަން ހުށަހެޅި ރިޕޯޓަކާ ގުޅޭ މައުލޫމާތު ދިނުމަށް އެމްޑަބްލިއުއެސްސީއަށް އެންގުމުން، އެ ކުންފުނިން އެ ނިންމުން ހައިކޯޓުގައި އިސްތިއުނާފް ކުރިއެވެ. މައުލޫމާތު ހޯދައި ލިބިގަތުމުގެ ހައްގުގެ ގާނޫނުގައި ބަޔާންކުރަނީ އިންފޮމޭޝަން ކޮމިޝަނަރު ނިންމާ ނިންމުމަކާމެދު ހިތްހަމަނުޖެހޭނަމަ ހައިކޯޓަށް އިލްތިމާސްކުރުމުގެ ފުރުސަތު ލިބިދޭކަމަށެވެ.
އެމްޑަބްލިއުއެސްސީން ހައިކޯޓުގައި އިސްތިއުނާފްކުރުމަށް ހުށައެޅި މައްސަލާގައި އެކޯޓުން ވަނީ މައުލޫމާތު ހޯދައި ލިބިގަތުމުގެ ޤާނޫނުގައި އިސްތިއުނާފުން މައްސަލަ ބެލުމުގެ ބާރެއް ހައިކޯޓަށް ލިބިގެން ނުވާކަމަށް ނިންމާފައެވެ. މިގޮތުން ހައިކޯޓުގެ ނިންމުމުގައި އެ ކޯޓުގެ އިސްތިއުނާފީ އިހްތިޟާސް ބިނާވެފައިވަނީ ދަށު ކޯޓުތަކުންނާއި ޓްރައިބިއުނަލްތަކުން ނިންމާ ނިންމުންތައް އިސްތިއުނާފުން ބެލުމުގެ މައްޗަށްކަމަށެވެ. އަދި އެއީ ދަށު ކޯޓަކުން ނުވަތަ ގާނޫނަކުން އުފައްދާފައިވާ ޓްރައިބިއުނަލަކުން ނިންމާފައިވާ މައްސަލައެއް ނުވަތަ ޤާނޫނުއަސާސީއާއި، ޤާނޫނަކާ ނުވަތަ ޤަވައިދަކާއި ޚިލާފުވާކަމަށް ފާހަގަވެގެން މަސްލަހަތު އޮތް ފަރާތަކުން ހުށަހަޅާ މައްސަލަތަކެއް ކަމަށްވެސް ހުކުމްގައި ބަޔާންކޮށްފައިވެއެވެ.
ހައި ކޯޓުން މާނަކޮށްފައިވަނީ އިންފޮމޭޝަން ކޮމިޝަނަރުގެ އޮފީހަކި އަމިއްލަ ފަރުދެއް ކަމާއި، އެއީ މުއައްސަސާއެއް ނުވަތަ އިދާރާއެއް ނޫންކަމަށެވެ. އެހެންކަމުން އިންފޮމޭޝަން ކޮމިޝަނަރުގެ އޮފީހުގެ ނިންމުންތައް އެ އޮފީހަށް ނުބެލޭނެކަމަށްވެސް ހައިކޯޓުން ނިންމި ނިންމުމުގައިވެއެވެ.
ހައިކޯޓުގެ އެ ނިންމުމާއި ގުޅިގެން އިންފޮމޭޝަން ކޮމިޝަނަރުގެ އޮފީހުގެ ނިންމުންތަކަކީ ފަހުގެ ނިންމުންތައްކަމަށްބަލައި ހައިކޯޓްގައި އިސްތިއުނާފްކުރުމުގެ ފުރުޞަތު ގެއްލިގެން ދިޔައެވެ. މިއާއެކު އެއީ އަސާސީ ހައްގެއް ހަނިކުރުންކަމަށް ދެކި އެކަމުގެ ތެރެއަށް ބަންޑާރަނާއިބުގެ އޮފީހުން ވަދުނެވެ.
އަދި ބަންޑާރަ ނާއިބުގެ އޮފީހުން މި މައްސަލަ ސުޕްރީމް ކޯޓްގައި އިސްތިއުނާފްކުރިއެވެ. މި މައްސަލާގައި ސުޕްރީމް ކޯޓުން ކުރި ޙުކުމުގައި ވަނީ، އެމްޑަބްލިއުއެސްސީން ހައިކޯޓަށް ހުށައެޅި މައްސަލައަކީ، އެ މައްސަލަ އިސްތިޢުންފުން ބެލުމުގެ އިޚްތިޞާޞް ޤާނޫނުން ހައި ކޯޓަށް ލިބިދީފައިނެތް މައްސަލައެއް ކަމަށް ހައި ކޯޓުން ކުނޑައަޅާފައިވަނީ ޤާނޫން ޚިލާފަށްކަމަށެވެ. އަދި ހައި ކޯޓުގެ ޙުކުމް ބާޠިލްކުމަށް ކަނޑައަޅުއްވައި، މަޢުލޫމާތު ހޯދައި ލިބިގަތުމުގެ ޤާނޫނުގެ ދަށުން ހުށަހެޅޭ މައްސަލަތަކަކީ އެ ޤާނޫނުގައި ޞަރީޙަ ޢިބާރާތުން ދިވެހިރާއްޖޭގެ ހައި ކޯޓަށް އިސްތިއުނާފުން ބެލުމުގެ އިޚްތިޞާޞް ލިބިދީފައިވާ މައްސަލަތަކެއް ކަމަށް ކަނޑައަޅާކަމަށެވެ. އަ
އެހެންކަމުން އިންފޮމޭޝަން ކޮމިޝަނަރުގެ އޮފީހުގެ ނިންމުންތައް ހައިކޯޓްހައި އިސްތިއުނާފް ކުރެވޭނެކަން ކަނޑައަޅައި ހުކުމް ކުރެއްވީ ފަނޑިޔާރު ޑރ. އަޒްމިރަލްދާ ޒާހިރާއި ފަނޑިޔާރު ޑރ. މުހައްމަދު އިބްރާހިމާއި ފަނޑިޔާރު މަހާޒު އަލީ ޒާހިރުގެ އިއްތިފާޤުންނެވެ.
